G20 : Mbayliigu FMI

2
365

Goomu 20 (G20) woni hooreeɓe leyɗe 20 ɓurɗe alɗude e winndere nde ndentii ñalnde alkamiisa 24 e aljumaa 25 settammbar 2009 to Pennsylvanie (Amerik), e nder wuro wiyeteengo Pittsburgh  ngam yiylaade maslahaa paytuɗo e jiilgol kaalis winndere nde.  Mbayliigu FMI ina jeyaa e toɓɓe ɗe ɓe njeewti toon. Ɓe pellitii ittude 5% e mbaawka leyɗe mawɗe, ɓe ndokka ɗum leyɗe pamare doole. Nguuɗoo mbayliigu nanondiraangu fuɗɗotoo siyneede ko e hitaande 2011.

Ko nii mbaawkaaji ɗi peccitortoo e oon sahaa : Orop jogii 32% e daaɗe ɗe, tawi teddeendi mum e faggudu winndere nde ko 25% fat. Dental Dowlaaji Amerik jogii 17% e daaɗe ɗe, kono ina jogii kadi ko wiyetee «droit de véto», ɗum firti ko kala ko ina waɗee alaa e sago ɓe njaɓa, kala ko ɓe luulndii ɓennataa.  Hannde o, leyɗe ƴellitiiɗe ina njogii 57% e daaɗe FMI, leyɗe keddiiɗe ɗe ndenndi 43% keddiiɗo o.

G20 : Goomu 20 ko Batu faggudu cosaangu ñalnde 25 settaambar 1999 to Washington, caggal iiñce faggudu deggondirɗe e kitaale 1990. Fayndaare maggu ko wallitde diisnondiral adunankeewal ko fayti e geɗe faggudu. G20 jogii ko ina tolnoo e tataɓe ɗiɗi njulaagu winndere nde e fotde 90% njeñamum. Terɗe G20 ko ɗeeɗoo leyɗe : Almaañ, Afrik worgo, Sauud, Arsantiin, Ostarali, Beresiil, Kanadaa, Siin, Koree worgo, Dental Dowlaaji Amerik, Farayse, Inndo, Indonoosi, Itaali, Japon, Meksik, Laamaandi-ndentundi (Angalteer), Riisi e Turki. Jooɗantoo toon Dental Orop ko Hooreejo Diiso mum kam e Hooreejo Banke Orop (ɗum addi innde G20 nde). Juɓɓule Bretton Woods, hono hooreejo FMI e persidaa Banke Adunanke ina tawtoree batuuji ɗi.

2 JOWE

Comments are closed.