… Jokkere dewle bonɗe
Ina jeyaa e ñaawooje ɗee ɗoo toɓɓere e ko arata koo:
1. so heefereeɓe ɗiɗo ndesondirii, gooto e maɓɓe tuubii, dewgal maɓɓe bonii. So ɗiɗmo oo tuubii noon ko adii nde edda joofata, dewgal maɓɓe wonta ɗo wonnoo. So tawii heen gooto tuubi ko caggal nde edda maɓɓe joofi, alaa e sago dewgal humtee goɗngol. Ko e ngoo miijo ko ɓuri heewde e annduɓe njahri.
2. so tawii ko debbo oo tuubi ko adii naatdiigu, hay huunde woodanaani ɗum e teŋe, ngam ko tuubgol ngol adii ceergal ngal. So tawii noon ko gorko oo tuubi hade naatdiigu, woodani debbo oo feccere teŋe. So tawii noon debbo oo tuubi ko caggal naatdiigu, woodanii mo teŋe timmuɗe. Ñawoore jartodinɗo (jaltuɗo diine) e resondirɓe ɗiɗo wayi ko no tuubde gooto e maɓɓe, ko gootum, alaa ɗo seerti.
3. Oon tuubɗo ina resi ko ɓuri rewɓe nayo, yo o suɓo e maɓɓe rewɓe nayo o seera heddiiɓe ɓee. walla so o resi ko joom`en diineeji asamaaniyaŋkooɓe, yo o suɓo e maɓɓe nayo, o seera heddiiɓe, hay so ɓe tuuba, ngam konngol nulaaɗo Alla (JKM) wiyiino: “oon tuubnooɗo tawi ina jogii rewɓe sappo, suɓo e maɓɓe nayo”. Humpiti ɗuum ko Termesiyyu, Ibnu hibbaan sellini ɗum.
4. Ko hono noon kadi ina resi miñiraaɗo e mawniraɗo, yo o seer heen gooto, ngam konngol Alla toowɗo oo: “ina haɗaa e mon rendinnde miñiraaɗo e mawniraaɗo.”
Oon tuubɗo tawi ina resi miñiraaɗo e mawniraaɗo yo o seer e maɓɓe mo o haajaa (humpiti ɗuum ko Ahmed, sellini ɗum ko ibnu hibbaan.
Rewɓe harmuɓe resde
Rewɓe harmuɓe resde ina peccii pecce ɗiɗi :
a) -harmuɓe resde haa cay (haa abada)
b) -harmuɓe resde jogingol happu.
Rewɓe harmuɓe resde haa cay ɓee, ko to bannge asko ko yumma e maamiraaɗo, so dewol so gorol, no toowiri fof.
– Ɓiɗɗo debbo e taaniraaɗo debbo, foti ko ɓiye debbo jibini ɗum walla ko ɓiye gorko jibini mo no lesɗiri fof. Banndiraaɗo debbo ɗo heedi fof e ɓiɓɓe mum rewɓe e taaniraaɓe rewɓe e worɓe no lesɗiri fof. E gorgolaaɗo ɗo heedi fof, hay so toowii.
Yumma cawndiiɗo to heedi fof, hay so toowii, ɓiy miñiraaɗo walla mawniraaɗo gorko to heedi fof. Ɓiy ɓiyiiko gorko walla debbo no lesɗiri fof.
Ɗuum ko ngam konngol Alla Toowɗo Oo : “e nder Quraana tedduɗo oo: haɗaama e mon resde yummiraaɓe mon e ɓiɓɓe mon e banndiraaɓe mon rewɓe e gorgolaaɓe mon e yummiraaɓe mon sawndiiɓe e ɓiɓɓe banndiraaɓe mon worwɓe e ɓiɓɓe banndiraaɓe mon rewɓe e yummiraaɓe mon muyninɓe on.” (simoore rewɓe, maande: 23)
To bannge harmirɓe desondirgol ko joom suudu maamiraaɗo no toowiri fof. ngam konngol Alla toowɗo oo: “woto ndestee ɓe baabiraaɓe mon ndesnoo woorti ko ɓenni (ko adii tuubgol) ngam ɗuum ko huunde nefniinde, añaande.” (simoore rewɓe: 22)
Ina haɗaa resde yummum joom suudu maa no toowiri fof, ɓiiy joom suudu maa (njutteen maa) mo mbirnodi-ɗaa e yummum, taanum joom suudu maa no lesɗiri fof, ngam konngol Alla Toowɗo oo: “haɗaama e mon resde yummiraaɓe rewɓe mon e njutteneeɓe ɓe nehɗon e nder galleeji mon, so tawii on kesii wirnodaade e yummiraaɓe mum`en. So on mbirnodaaki noon e yummiraaɓe maɓɓe, ɓe karmantaa on.” (simoore rewɓe: 23)
Ina haɗaa resde joom suudu ɓiye, walla joom suudu taane, ngam konngol Alla Toowɗo oo: “haɗaama e mon resde rewɓe ɓiɓɓe mon yaltuɓe e keeceeje mon” (duhi mon). (simoore rewɓe, 23).
ko Musiɗɗo mon jibiril Muusaa joob mo kayhayɗi jooɗiiɗo ɗoo e Nuwaasoot
Tonngoode: 46 56 51 10/ wats App: 34 46 64 47
Jibriil Muusaa Joob
