Gila PRDS e UPR haa heɓi INSAF, Kayhayɗi ko wuro yahdungo e laamu. Ko dokkal panndungal walla ko luɓal tan wonnoo ?
Gila duuɓi sappo e jeeɗiɗi hade Meer Kono Baraaji jooɗaade tuggi 2018 haa 2023. Ko lannda laamu tan heerorinoo gañaade suɓngooji meeri nokku oo, tawi jooɗinoo duuɓi sappo e jeeɗiɗi e ndeen jappeere ko Soh Muusaa Demmba lollirɗo Commbee. Tokkiti ngal dow ko suɓngooji minsipaal hitaande 2023. Jooɗorɗe tati mawɗe ko lannda laamu nguu ƴefti. Ɗeen jooɗorɗe ngoni ɗee ɗoo : Hooreejo Diiso Diiwan (Conseil régional) ko Bah Aamadu Abuu, Carɗoowo (dipitee) ko Soh Muusaa Demmba ganndiraaɗo Commbee, Meer ko Demmba Njaay lollirɗo Abdallaay. Ɗum noon gañii ɗee jooɗorɗe tati fof e ko lannda goota. Hay so ndeen hoolaare wonaani dokkal, nani wona luɓal ɓooyngal.
E ngol laawol, ɗiin mbiruuji e goɗɗi goownooɗi tellaade e dingiral ngal fof, alaa keddiiɗo. Haa nii e kesi pul ɗi ngoowaano yiyeede. Ɗuum ko mbele joɗɗitinde ƴamoowo e innde lannda laamu kaa, hono Hooreejo leydi Muhammed Seek Wul Gaswaani. Kono mbele luɓal ɓooyngal ngal e semmbeeji kesi ɗii njonii hoolaare e ɗaminaade poolgu ñande 29 Suwen 2024 ? Jaabawol ngol ina waawi wonde eey. Kono ina waawi kadi wonde alaa. Sabu e nder doole suɓngooji hannde ɗii, keewal ngal ko sukaaɓe. Ɓeen sukaaɓe yooɓiiɓe e kunuɗe mum en ngol ɗoo konngol : “ Min calaaki laamu, kono amin teskii taƴondiral hakkunde amen e ardiiɓe ɓee.” tawi saabii ɗuum ko yoga e lommbiiɓe ɗoon ɓee. Lommbiiɓe ɗoon arooɓe tan e sahnga ngoƴaaji mumen, majja menndeŋ tuma nde kumti haajuuji mumen, ɓe njettintaa goytaali amen, ɓe tintintaa min kewkewe kawgelaaji (konkuuraaji) e fartaŋŋeeji balle maa luɓe kaalisaaji (finaasmaaji) ɗi min poti naftoraade. Teeŋti noon e ƴetteede e golle laamu toowɗe, nomeede he postooji, haa teeŋti noon jannguɓe jom en seedanteeje toowɗe (joom dippolomaaji) ine ngoodi he maɓɓe, kono ƴettetaake.
Ko ɗuum sukaaɓe nokku oo kolliti e nder batuuji keewɗi ɗi njooɗodii e ardiiɓe ɓee. Ardiiɓe ɓee ne kunaniima ɓe, maa cafru denndaangal ɗeen caɗeele, hay wirnaawo wooto wontaa won ɗoon. Heen nii kollitii so ɓe ndariima kamɓe sukaaɓe ɓee darnde yiɗde wonde, kañum en ina mbaawi yahde fooftere. Sabu duuɓi mumen keɓii ɗoon. Hakkunde kaaloowo e keɗotooɗo eey e alaa ina mbeeɓi ɗoon. Kono eey e alaa ñaawatee ko nde keesuuji njuppaa jamma 29/6/2024.
Daawuuda Sammba Ndonngo
