Pottital Google I/O ko kewu ngu Google yuɓɓinta hitaande kala ngam hollude geɗe kese ɗe heblani aduna oo. E pottital 2023 ngal (Google I/O 2023) ñalnde 10 mee (duujal) 2023, ɓuri holleede heen ko geɗe paatuɗe e ƴoƴre tafaande. Ine heen Firo Huuɓtodinngo (traduction universelle) tuugiingo he PaLM 2.
Yeru, firde wideyoo he nder ɗemngal goɗngal : ɗum fuɗɗortoo ko winnditaade haala wideyoo kaa, e firde ɗum he ngala ɗemngal. Daande woɗnde tara winndannde ndee, kono tawa yaltata ko e hunuko kaalatnooɗo he wideyoo gadano oo. Ƴoƴre tafaande ndee fotnda ɗum haa toni kaaloowo oo e daande mum njahda, nannda he nder wideyooji ɗiɗi ɗii…
No paamraten, maa firo Google yetto nokku ɗo pullo waawoyta yeeɓde filmo piilaaɗo he ɗemngal goɗngal, ɗoon e ɗoon he pulaar.
Walla winndannde waɗaande he gootal e ɗemɗe ɗe Google tammbii ɗee, ndeen winndannde heɓoto ɗoon e ɗoon he ɗemɗe keddiiɗe ɗee, so he binndol, he hito walla he wideyoo, yeru, ɗo Albert Einstein darii ine janngina he engeleere ɗoo, aɗa waawi heɗaade mo ɗoon, omo janngina he pulaar walla he kala ɗemngal ngal njiɗ-ɗaa.
Kattanɗe ngal ɗoo karallaagal ko moolanaaɗe, kono kadi ko kulɓiniiɗe, sibu angal waawi huutoreede he yeeso ngo moƴƴaani, ko wayi no fuuntude (deepfakes). Ɗum noon alaa e sago caaktugol maggal yahda e paddorɗe mawɗe…
