He hitaande 2016 ndee, leydi Siin hollii ñeeñal e karallaagal dowrowal to bannge mahngo salaaji (pomuuji) : ine jeyaa heen kurmbitgol sala Beipanjiang, hono sala ɓurka toowde he winndere ndee; sibu tooweeki makka ko 565 meeteer dow dallol (nadde) innirangol noon. Ndii mahdi moolanaandi jokkondiri ko diiwe Guizhou (Ginsu) e Yunnan joñiiɗe no feewi. Andi holla keɓindagol leydi ndii karallaagal e anniya mum to bannge mahdi.
Sala kaa lattinii ko he 1 341 m njuuteendi, ka faarnii he dow dallol cinkoriingol kaaƴe toowɗe baŋ-yoo-baŋ. Ka jaggiraa ko ɓoggi kaɓɓaaɗi e calɗi ɗiɗi mawɗi (haubans) deestondirɗi fotde 500 meeteer. 140 miliyoŋ oroo (hedde ujunnaaje capanɗe jeegom miliyaar MRO) peraama he makka. Mahdi moolanaandi mbaandi nii waawii taccude ɗee kaaƴe toowɗe, portiiɗe : golle caɗtuɗe, kuutoriiɗe karallaagal mahdi ceeɓngal, haa ɗoon waawi haaɗde. Ɓoggi jagguɗi sala kaa ko portaaɗi haa ŋeeri ngam haɗde ka dimmbaade hay so keneeli doolnuɗi keewɗi wuttude he kii tooweeki nguttii.
Hade sala kaa maheede, yimɓe hoɗɓe e diiwal ngal ine mbaɗatnoo ko ɓuri waktuuji joy ngam taccude jollol ngol, jooni, ɓe mbaɗata tan ko waktu gooto e feccere. Waɗde sala kaa waylii no feewi faggudu e renndo diiwe ɗiɗi Guizhou e Yunnan ɗee. Yimɓe mbaɗtii yettaade nokkuuji ɗi mbaawaano yettaade ndeen, huunde wallitnde njulaagu hakkunde diiwe kaaƴiije.
Duuɓi capanɗe jooni, Siin ine maantiniri mahɗeele ɓujeeje, yeru kaa sala. He nder salaaji sappo e ɗiɗi ɓurɗe toowde he winndere ndee, heen sappo ngoni ko Siin. Ndeke Siin woni hoore to bannge mahdi salaaji mawɗi, tee ko yeeso fayi, sibu eɓɓaaɗe goɗɗe ɓurɗe ɗoon tiiɗde kadi ine ummanaa.
Siin nana maha sala Jollol Mawngol Huahiang he nder diiwal Guizhou, ka 625 meeteer tooweeki, potka worteede he 2025. Ko jiidaa e eɓɓaande mahngo sala Yongchang Lancangjiang to Yunnan, he 2027, ka 610 meeteer tooweeki. So artii e mahngo salaaji, Siin ko ko hunii waɗde ko ɓuri ko waɗnoo.
Bookara A. Bah
