8 silto ko ñalawma jaŋde mawɓe hakkunde leyɗe. Hikka, Unesco suɓii ko teeŋtinde jaŋde nder ɗemɗe keewɗe e semmbinde jaŋde mawɓe ngam ɓeydude paamondiral e jam.
Ko huunde haannde e yonta ɗo caɗeele baaɗe no ɓurondire, kareeli e mbayliigu ngonka weeyo ɓeydotoo, ine moƴƴi yimɓe teeŋtina nafoore jaŋde mawɓe sabu mum wonde hakke aadee kuuɓtodinɗo, kono kadi no geɗal jojjungal ngam mahde dente jamuyame, dente udditiiɗe, nuunɗuɗe.
Jaŋde mawɓe ko geɗal jojjungal ngam addande neɗɗo kala feɗɗitaade e waawde addude ballal mum nder renndo wuuri ngoo. Jettagol Toɓɓanɗe Ƴellitaare Duumiinde (Objectifs de Développement Durable (ODD)) he Lajal 2030, haa teeŋti e ODD-4, faatunde e jaŋde moƴƴere, huuɓtodinnde, e ƴellitde fartaŋŋeeji jaŋde he tolno nguurndam kala wonande yimɓe fof.
“Hakkunde 2016 e 2021, tolno jaŋde mawɓe ɓeydii tan ko 1%”
Unesco ine hiisii wonde, golle denndaaɗe ɗee, e golle ɗe leydi kala gollanii hoore mum ɗee, kaɗaani ɓeydaare ndee leelde haa ɓurti. Hakkunde 2016 e 2021 tolno jaŋde mawɓe ɓeydii tan ko 1%. Ɗum ɗoo firti ko golle keewɗe ine padi yimɓe. Ɓurondire ɗee kadi ine teeŋti he nder won ɗiin nokkuuji winndere ndee, ɗo miliyoŋaaji miliyoŋaaji sagataaɓe e mawɓe mbaawaa heɓde jaŋde lesre.
Yeru, he Muritani, tataɓal mawɓe ɓee ko humambinneeɓe, wondude e ɓurondire puŋŋiniiɗe hakkunde rewɓe e worɓe e hakkunde nokkuuji.
So en tuugniima e limooje goodaaɗe ɗee, golle laamu gollii ɗee fof kaɗaani ko ɓuri feccere rewɓe Muritani ko humambinneeɓe, haa teeŋti he nder dowri ndii, ɗo tolno mum yettii 57%, haa nii 65% nder diiwe ɓurɗe yeebeede ɗee.
Caɗeele jaŋde mawɓe noon ko kuuɓtodinɗe. He nder Muritani e leyɗe keewɗe, ɗe naatti ko he caɗeele ɗo ŋakkeende nuunɗal nder renndo, nder faggudu, e nder politik, he nder leyɗe ɗee teppi ƴellitaare, ɗe caɗeele winndere ɓurɗe mawnude e jiiɓaade teeŋtini.
Ñawu Cowid19 ɓeydii ɗeen caɗeele, haa teeŋti noon wonande yimɓe joñaaɓe. Ɗee geɗe fof ine teeŋtina dañangol ɗee caɗeele safaruuji kuuɓtodinɗi, tawa hay gooto joñaaka.
Yanti heen, he nder Afrik, janngirgol ɗemngal ngal wonaa ɗemngal neeniwal ine teppi keɓgol kattanɗe ɓurɗe famɗude he taro, e binndol, e hiisa, tawi kadi ine haɗa joomum waawde ɗemɗe keewɗe e hisnude pinal mum.
Jaŋde mawɓe ine nafa kadi he nder ngonka ɗo ɗemɗe keewɗe nguurdi, sibu ine wallita to bannge jokkondiral kam e kisnugol pinal heen ɗemngal kala, kam e paggagol ganndal.
Wonande Unseco, teeŋtingol kuutoragol ɗemɗe neeniije nder jaŋde e nder geɗe nguurndam leydi, ine jojji ngam kisnugol keewal ɗemɗe e pine e ngam kadi gaddanaade mo woni kala ɗaɓɓirgol ganndal nder ɗemngal mum neeniwal.
“jaŋde mawɓe ine waawi wallitde tigi-rigi paamondiral e jam”.
He nder ɗuum, he miijo Unseco, jaŋde mawɓe ine waawi tigi rigi wallitde paamondiral e jam he nder nokkuuji ɗo ɗemɗe keewɗe nguurdi. Ko idii fof, ine jojji jaŋde mawɓe naatnee he nder denndaangal politikaaji jaŋde leydi, ko nanndi e peeje ƴellitaare, e politikaaji ekko he nder nguurndam neɗɗo no diidorinoo, kam e tuugnorɗe jaŋde mawɓe.
Foti reweede ko laawol kuuɓtodinngol, ɗo jaŋde mawɓe jaggiraa no ɓeydugol kattanɗe. Tawa kadi ine yahdi e tippule huufo ɗe njejjitaani hay gooto, e dañirɗe kaalis moƴƴe, e pellital mawngal to bannge politik.
E silto 2022, Muritani lelnii sariya kesa kuccam jaŋde, ɗo ɗemɗe ngenndiije mbaɗaa ngooroondi Tippudi nehdi e jaŋde.
Kaa sariya tuugii ko he ɓure mahondiral renndo, ngootaagu ngenndi, e hakkeeji aadee. Faandaare makka ko tiiɗtinde kuutoragol ɗemɗe ngenndiije nder janngirɗe. Ɗum ɗoo ko taaɓal moƴƴal faade he jaŋde huɓtodinnde, yahdunde e piɓle jojjanɗe aadee, e yeeso aaɓnude ekko he tolno nguurndam kala.
Faandaare eɓɓaande UNESCO wootere he Muritani, e ballal huunde e leyɗe rewo, ko tiiɗtinde kattanɗe paatuɗe he jaŋde mawɓe e jaŋde nde wonaa jaŋde laamu. Amin ngollodoo heen e laamu nguu ngam heblude sukaaɓe e mawɓe, haa teeŋti e rewɓe, heblo moƴƴo to bannge jaŋde e mecce, haa teeŋti kadi e dente ɓurɗe farwude, haa mbaawa soɗaade no moƴƴi nder faggudu renndo ngoo.
Ñalawma winnde jaŋde mawɓe 2024, ko fartaŋŋe teeŋtinde darnde amen ngam huuɓnude jaŋde nde ɗawaani hay gooto, nuunɗunde, tawi ko jaŋde moƴƴere, wonande yimɓe fof.
So en tiiɗtinii jokkondiral hakkunde jaŋde mawɓe e jaŋde ɗemɗe e deeƴre (jam), eɗen mbaawi aafdude ngooroondi janngo ɗo gooto kala jogotoo kattanɗe jeytoreede e timmal nder renndo e ɗo keewal pine e ɗemɗe heɓtinaa ko semmbe gaddoowo jam e ƴellitaare duumiinde, ɗum fof noon e ballondiral e ɓesngu Muritani.
Ndee winndannde ƴoogaa ko he Le Calame.
Winndi nde ko biyeteeɗo Eric Falt ;
Fuli nde ko Bookara Aamadu Bah
———————
*Eric Falt ko Gardiiɗo Unesco nder diiwal Magreb, Jooɗaniiɗo ɗum kadi to Alaseri, Libi, Maruk, Muritani e Tuunus.
