HAWRAANDE FAATUNDE E JOJJUGOL KUƁTODINGOL JAŊGE ƊEMƊE NGENNDIIJE
Fedde Ɓamtaare Pulaar he Muritani (FƁPM) jooɗiinde he Batu mum Mooɓondiral njeetaɓu ñalnde 28 e 29 bowte 2024 he Nuwaasoot, caggal nde sunnii ngonka ɗemɗe ngenndiije e darnde mum en nder ƴellitaare to bannge jaŋde e pinal :
E teskaade :
- Wiiñooji baɗaaɗi e winndere ndee ine kollita wonde janngirgol ɗemɗe neeniije ine yuumtina jaŋde, moƴƴina ɗum, wallita potal nder renndo.
- Njeñtudi moƴƴiri keɓanoondi e ƴeewndo Duɗal Ɗemɗe Ngenndiije Muritani ɓooyngal ngal (ILN) e kitaale 1980, keɓtinaandi :
- Ngo biro diiwaaniiwo Unesco to Ndakaaru (BREDA) e hitaande 1984, wasiyinoongo kuɓtodingol janngirgol ɗemɗe ngenndiije ;
- Ngo Jaagordu Jaŋde ngenndi e hitaande 1987, teeŋtinngo juumtugol ndeen jaŋde, wasiyii jaajtingol mum.
3. Darnde ɗemɗe ngenndiije nder ɓamtaare e naant-naatondiral renndo e neɗɗaagu to bannge pinal e ƴellitaare duumiinde.
Amin teeŋtina :
- Darnde amen timmunde ngam ɓamtaare ɗemɗe ngenndiije, calɗi tippudi nehdi e jaŋde nuunɗundi, moƴƴiri.
- Himme jaajtingol jaawngol jaŋde he ɗemɗe pulaar, sooninke e wolof no salndu ƴellitaare pinal, faggudu e renndo.
Amin ɗaɓɓi :
- Jaajtingol jaŋde ɗemɗe ngenndiije ɗoo he lajal duuɓi ɗiɗi :
- Tuugnorgal ngenndiwal ine foti lelneede jooni jooni ngam heblude kuɓtodingol jaŋde nder ɗemɗe pulaar, sooninke e wolof nder denndaangal duɗe laamu tuggi udditgol ekkol 2026-2027.
- Daawal heblo cañingal :
- Kesɗitingol kaɓirɗe jaŋde : peewnugol e laawɗingol defte jaŋde moƴƴe he nder ɗemɗe ngenndiije tati ɗee.
- Heblo jannginooɓe : lelnugol tuugnorgal heblo keñorangal, kuuɓtidinngal ngam heblude jannginooɓe e huufooɓe nder ɗemɗe ngenndiije toɗɗaaɗe ɗee.
- Gollodagol tiiɗtinangol : ballondiral IPELAN e gollodiiɓe haralleeɓe ngam gaddaade moƴƴugol kuutorɗe jaŋde ɗee.
- Kumpital e hirjino jaajngo :
- Oorle ngenndiije ngam famminde yimɓe ɓee nafoore janngirgol ɗemɗe ngenndiije.
- Ƴellitde kuutoragol ɗemɗe ngenndiije ɗee nder jaayɗe e nokkuuji laamu denndaaɗi.
Amin nodda :
- Laamu nde huuɓnata kaalis jonɗo e kala geɗe katojinaaɗe ngam gaddaade ciynugol jaawngol, juumtungol nguu mbayliigu.
- Renndo ngoo e ɓiɓɓe leydi nde tammbotoo ndee ummannde ngam wallitde ƴellitaare ɗemɗe ngenndiije.
Tonngol :
Ndee hawraande teeŋtinta ko pellital waylude ɗemɗe ngenndiije pulaar, sooninke e wolof, waɗta ɗum en kuutorɗe doolnuɗe ɓamtaare e naat-naatondiral renndo. So en tuugniima e ƴeewndo yuumtungo ngo UNESCO e Jaagordu jaŋde ngenndi keɓtini, eɗen njenanaa kuuɓtodingol majje he nder duɗe laamu ɗee ko daawal teeŋtungal ngam mahde Muritani jaggondirɗo, gootiɗɗo, belɗo wuurde.
Nuwaasoot, ñalnde 29 bowte 2024, batu mooɓondiral 8ɓu FƁPM
Hawraande faatunde e laawɗingol ɗemɗe ngenndiije
Batu Mooɓondiral njeetaɓu Fedde Ɓamtaare Pulaar he Muritani njooɗiingu ɗoo he Nuwaasoot ñalnde 28 e 29 bowte 2024, sabu mum en yenaneede nafoore ɓamtugol ɗemɗe ngenndiije nder ƴellitaare leydi to bannge faggudu, pinal, jaŋde e faggudu :
Sabu teskaade :
- Doosgal leydi Muritani ine teeŋtini ɗooftagol keewal pine e ɗemɗe.
- Laamu Muritani fellitii ko sakkitii koo naattinde ɗemɗe ngenndiije pulaar, sooninke e wolof nder tippudi nehdi e jaŋde leydi ndii;
- Wasiyaaji aduna oo, haa teeŋti ɗi UNESCO paatuɗi e kimmugol janngirgol ɗemɗe neeniije ngam moƴƴinde jaŋde e hisnude keewal pine;
- Nafoore teeŋtunde ɗemɗe pulaar, sooninke e wolof ngaddanta pinal leydi ndii kam e moƴƴingol nguurdiigu.
A min teeŋtina :
- darnde amen he ƴellitgol, ɓeydugol faayiida e ndeenka kisal ɗemɗe ngenndiije Muritani ;
- yenaneede wonde laawɗingol ɗemɗe pulaar, sooninke e wolof ko daawal jojjungal ngam gaddaade kuutoragol majje he nder denndaangal fannuuji nguurdam leydi ndii, kam e tiiɗtingol mahondiral renndo.
A min ɗaɓɓa :
- Laawɗingol ɗemɗe pulaar, sooninke e wolof haa ɗe ngona ɗemɗe gollorɗe, ɗemɗe kumpitirɗe nder juɓɓule renndo, jaayɗe e njuɓɓudi laamu ;
- Lelnugol laabi sariya e tippudi gaddotooɗi kuutoragol ɗee ɗemɗe nder jaŋde, ñaawoore, cellal, e laamu ;
- Kirjingol yimɓe ko faati e nafoore ɗee ɗemɗe nder ƴellitaare leydi ndii rewrude e oorle kumpital kam e kewuuji pinal ;
A min :
- ɗaɓɓi he laamu Muritani nde ɗooftotoo ko huninoo, heñoo waɗa mbayliigaaji jojjuɗi ngam naatnude ɗee ɗemɗe no haaniri nii nder jaŋde kam e nguurndam leydi ndii ;
- ɗaɓɓi he muritaninaaɓe kala ko aldaa e paltoor, nde njaggondirta ngam hisnude e alɗinde ɗemɗe ngenndiije sibu ko ɗe ngalu ngu muritaninaaɓe fof ndenndi.
Nuwaasoot, ñalnde 29 bowte 2024, Batu Mooɓondiral 8ɓu FƁPM
————————————————-
Hawraande jangde gaggaaji
Batu Mooɓondiral ine waggina Yiilirde ngenndi nde wasiytoo udditgol duɗe gaggaaji nder nokuuji mum en sabu ɗum jeyaa ko e fotde ɓesngu.
Nuwaasoot, ñalnde 29 bowte 2024
——————————
Hawraande njettoraaji
Batu Mooɓondiral 8 njooɗiingu ñalnde 28 e 29 bowte 2025, ine huccitina njettoraaji mum teeŋtuɗi faade e :
1. Yiilirde ngenndi sabu darnde mum teeŋtunde he ngalɗoo daawal ɓennungal ngam ƴellitaare ɗemɗe ɗee ko fuɗɗii jibinde :- naattingol jaŋde ɗemɗe pulaar, sooninke e wolof nder Tippudi Nehdi e Jaŋde ;
– hisnude galle fedde e jeeyngal mum e yahdinde ɗum e karalleeji kese ɗee ;
2. Cate ɗee e darnde mum en ngam timminde golle Yiilirde ngenndi.
Nuwaasoot, ñalnde 29 bowte 2024
——————————
Hawraande Galle Fedde
Teskaade mahngo Galle Pulaar fotii ummande ko ɓooyi he nder fedde ndee, kono ronkaama siyde sabu caɗeele ngalu, Batu mooɓondiral njeetaɓu FƁPM ine waggina :
– Yiilirde hesere ndee nde sakkata peeje (jeeyngal jaajngal), semmbina piye e gatte nder fedde ndee, ɗaɓɓa balle e sifaaji kala faade e laamu e julaaɓe e kala jarlitiiɗo ;
– rewindo duumiingo ngam timminde ndee ɗoo eɓɓaande so leelii, ɗoo e batu mooɓondiral njeenaɓu.
Nuwaasoot, ñalnde 29 bowte 2024
——————————
Hawraande njettoor
Batu mooɓondiral njeetaɓu FƁPM ine huccina njettoor mum keeriiɗo faade e Goomu njuɓɓudi Batu Mooɓondiral sabu darnde mum maantinnde ngam newnude kala peeje moƴƴingol batu nguu.
Nuwaasoot, ñalnde 29 bowte 2024
——————————
