Tuggi altine 21 abriil 2014 haa aset 26 abriil 2014, Fedde Ɓamtaare Pulaar e Muritani woni ko e heblo jannginooɓe. Ɓeen jannginooɓe fotɓe jogaade duɗe sappo, tawi ko rewɓe tan njanngata heen, to leegal Daar Nayiim (leegal Nuwaasoot).
Ɗum fof noon ko e eɓɓaande nde fedde wiyeteende Caritas waɗdi e Fedde Ɓamtaare Pulaar e Muritani, ngam jannginde 200 debbo (rewɓe mawɓe) e 60 suka debbo, fotɓe fecciteede e nder duɗe 10 ngam ɓoorde ɓe humambinnaagu. Ɗum noon ko jaŋde yahdinaande e golle njeñu, woni jaŋde waawnde wallitɓe ɓe e golle ɓe ngollotoo ngam moƴƴitinde nguurndam maɓɓe.
Nii woni, Fedde ndee, ko adii ɗii ñalɗi, waɗii ko ina wona lewru to leegal Daar Nayiim too ngam suɓtaade fotɓe janngineede ɓee. Caggal ɗuum, nde suɓtii jannginooɓe 10, (Jannginooɓe Arab 3 e jannginooɓe Pulaar 7). Ko ɓeen jannginooɓe kebletee e ɗiiɗoo ñalɗi. Huufi golle ɗee to bannge Fedde ndee ko ɓee ɗoo : Aamadu Umar Jah (Hooreejo Fedde), Abdullaay Muusaa Sal (Kalfinaaɗo jaŋde FƁPM), Abdullaay Haaruuna Sih (Koolaaɗo Kuuɓal Fedde ndee), Bookara Aamadu Bah (Kalfinaaɗo kumpital fedde ndee), Jibi Umar Mbooc, e Maalik Aamadu Saar (Kalfinaaɗo eɓɓaaɗe Fedde ndee). Njoyo idiiɓe limteede ɓee fof ko jannginde woni fannu mum en, tee ko jannginooɓe Pulaar gila 1976 (ko famɗi fof), haa jooni.
To bannge heblo too, ñalnde altine 21 abriil ndee, ko kollitgol tuugnorgal jaŋde ngal to bannge « taro », « binndol » e « hiisa ». Ñalnde talaata 22 ndee ko kollitgol kuutorɗe janngirdu, e hol no njogortee. Balɗe tati keddiiɗe ɗee mbaɗiraa ko heblo ɗowgol winndannde e fannuuji tati kaalaaɗi ɗii, gila e keblugol mum, haa e keɓnugol mum janngooɓe ɓee.
Maa en ngartoy heen.
