Hol ko woni 5G ?

Winndannde yaltunde e lewru suweŋ 2019 (luural Siin-Amerik)

So a nanii walla a yiyii « 5G » ina winndaa, anndu ɗum ɓuri toɗɗaade tawo e sahaa jooni oo, ko telefoŋaaji jogeteeɗi e juuɗe ɗii, hono telefoŋaaji cinndeteeɗi ɗii, ɗi yimɓe kuutortoo jooni ɗii, naatnuɗi mbayliigaaji mawɗi e nguurndam aduna oo. Jolgol majji ko huunde mawnde, sibu ko adii ɗi, woodnoo tan ko telefoŋaaji jokkiiɗi e ɓoggi ɗii, joɗɗinteeɗi e galleeji walla e birooji ɗii.

So oɗon ciftora, nde ɗi puɗɗii naatde ɗoo ndee (nder Muritani), ko noddude e jaabaade tan ɗi nafatnoo : ɗiin ngoni Yonta (Génération woni « G ») gadano (1G). Caggal ɗuum, Yonta ɗimmo joli, oon woni 2G : ɗoon, ɓeydii e noddugol hee waawde neldude mesasuuji binndaaɗi daɓɓi, ɗi ɓurataa 160 alkulal/maande biyeteeɗi SMS (Short Message Service woni Sarwiis Mesasuuji Daɓɓi) walla kadi mesasuuji juutɗi, walla mesasuuji hito, maa nate, biyeteeɗi MMS (Multimedia Message Service). Caggal ɗuum, yonta tataɓo oo, hono 3G, yimɓe mbaɗti seŋoraade telefoŋaaji mum en he enternet : ko he oo yonta tataɓo njahraten ɗoo e Muritani. Telefoŋaaji men ina ceŋoroo mo he Facebook, e WhatsApp, e Google, eɗen njeeɓra mo filmuuji ekn, kono enternet oo, ina leeli seeɗa. Mi yiyii, so sukaaɓe ina ngawtoo filmo ngam yeeɓoyde ɗum, ko maa ɓe pada fotde waktuuji keewɗi, nde filmo oo gasa tellaade. Waamo (débit) enternet makko (ko o jippinta he keɓe e mudda dotaaɗo) oo heewaani ɓurde 2 Mbps (megaabituuji 2 nder leƴƴannde kala). Yonta nayaɓo oo, hono 4G walla LTE (Long Terme Evolution), suwaa tawo naatde Muritani, kono waamo enternet makko ina sowoo mo 3G oo fotde laabi 10, ko waamo toowngo, ango yaha haa hedde 150 Mbps, kadi enternet makko ina yaawi no feewi : ko neɗɗo awtotonoo he waktu, maa waaw awtaade ɗum nder hojomaaji 5 haa 6. Ooɗoo yonta naatii leyɗe mawɗe ɗee gila 2011, ɓooyaani ko o fuɗɗii naatde Afrik (Yeru o naatii Senegaal ko ina wona hitaande jooni).

Fotii, en njettiima e 5G gulleteeɗo oo. Ooɗoo Yonta dee addani TRUMP finnande Huawei, nde tawnoo ko kañum tan tawo, he ooɗoo sahaa ɗo mbinndaten ɗoo, heblanii ɗum ; daɗi heen sosiyateeji Amerik e ɗi leyɗe hirnaange goɗɗe ɗee. Waamo makko pattamlamo to bannge tooweeki, sibu, kanko fof wonde e telefoŋ, maa ɓadoyo, walla nii o ɓurtoo  waamo leeɓol giiɗal (fibre optique), woni ko ɓuri 1 Gbps (jigaabit leƴƴannde kala). Tee njaaweeki makko maa sowoyo mo 4G oo fotde laabi 100, sowoyoo mo 3G oo fotde laabi 2 500.

Kanko “5G” oo, so o arii, maa on njiy antenaaji mbayloo seeɗa, tawa njokkondirta tan ko e kaɓirɗe ceŋiiɗe. Ɓure makko kanko 5G oo, ko kaɓirɗe keewɗe ina mbaawi seŋodaade laawol gootol he enternet (telefoŋaaji, teleeji enternet, montoruuji, otooji nawooji koye mum en, e miliyoŋaaji miliyoŋaaji geɗe goɗɗe…). Hay safrooɓe maa mbaɗtu huutoraade mo ngam oppirde ñawɓe tawa ko he ayaawo. Maa yimɓe wonɓe he nokkuuji ceertuɗi mbaɗtu yeewtidde tawa ayaawuuji mum en ina ngoni ɗo gootel, e geɗe goɗɗe keewɗe ɗe en mbaawaa limtude : ko mbayliigu mawngu “5G” naatnata he nguurndam yimɓe e denndaangal fannuuji. Ɗumɗoon noon ardata ko e telefoŋaaji kesi, jahdooji heen.

Ɓetirɗe

l Kilobits (Kb) : woni ujunere bit ;  Megabit woni Miliyoŋ bit ;  Gigabit woni Miliyaar bit.

Bit ko limre : « 0 » walla « 1 ». Ko ɗuum ordinateer gollortoo. Ɗum noon, Megabit, ko miliyoŋ « 0 » e « 1 ».

Kilobit/leƴƴande (Kbps), Megabit/leƴƴannde (Mbitps), Gigabit/leƴƴannde (Gbits) ko ɓetirɗe keeweendi kabaaru. Ɓetirgal goɗngal ina woodi, biyeteengal : Oktee (Octet he Farayse walla Byte he Engele). Oktee ko lime 8 tawa ko « 0 » e « 1 ».

Bookara Aamadu Bah