Ñalnde naasaande (alkamiisa) 07 jolal (noowammbar), goomu Catal Fedde Ɓamtaare Pulaar ngal Kayhayɗi yillima Duɗal Beelinaaɓe lollirngal Duɗal Baaba leñol e gardagol Mayram Mammadu Aan Lollirɗo Mayram Daddaa.
Terɗe Catal ngal ko ɓeeɗo ngonnoo : Hooreejo hono Usmaan Ñaan, e Kalfinaaɗo Jaŋde hono Daawuuda Sammba Ndonngo. Duɗal Beelinaaɓe ina teskee jeyaa ko e duɗe jaŋde ɓurɗe daraade. Eɓe njanngina tigi rigi, jaŋde duumiinde. Rewɓe duɗal ngal ina mbaɗa golle njeñtinooje (njeeygu, goobu, peewnugol coneeje) e kala hitaande eɓe mawnina ñalwma 08 marse, ñalawma rewɓe. E nguuɗo ñalngu min tawii ɓe tigi rigi e golle, ko tolno 1 njanngatnoo, woni heen ko almuɓɓe 30 . Ñalɗi janngeteeɗi ko alarba e alkamiisa e saanga kikiiɗe.
Duɗal Beelinaaɓe ina njogii leydi, ɓe kurlii ɗum griyaas, ɓe ndarni heen caali (E ballal Doktoor Muhammadu Faalil Sih), ko heen ɓe njanngata. Duɗal ngal ina jogii tolnooji tati janngooji. Eɗen teskoo kadi huunde moƴƴere nde ɓe naattini e jaŋde hee, so jaŋde diine lislaam. Sikke alaa en ngalaa ko ɓuri diine lislaam moƴƴude, waɗtude jannginde diine lislaam (Ɓuraana e Hadiseeji e siira) ko huunde fotnde ñemmbeede. Golle duɗal Beelinaaɓe ina keewi faayiida.
Caggal Konngol hooreejo catal ngam hollitde weltaare, musiɗɗo Daawuuda Sammba Ndonngo kalfinaaɗo jaŋde hollitii darnde sukaaɓe Beelinaaɓe, o hollitii mbaawka jannginooɓe, yarlitaare maɓɓe, njuɓɓudi maɓɓe, ɗiggingol maɓɓe gollal jaŋde e jogaade almuɓɓe nehiiɓe. Goomu nguu tawii ɗoon musiɗɗo Abdul Kader Aan jaalal mawngal to bannge pulaar, eɗen teskii darnde makko ɗoo e Beelinaaɓe, kono kadi darnde makko haa to e Nuwaasoot.
Heewɓe ƴeftii konngol, gila e Musiɗɗo Ñaŋ Muhammadukollitgol himme almuɓɓe e jannginooɓe duɗal ngal, Gardiiɗo duɗal ngal hono Mayram Daddaa Aan, kollitɗo weltaare mum e arɓe ɓee, yimi ɗoon yimre waɗnde faayiida feewtunde e nafoore jaŋde, Astel gooto e janngooɓe ɓeyduɗo heen haala moƴƴa, Jeynaba Sih gooto e jannginooɓe kollitɗo weltaare mum e hiirde nde, jaarii nulaaɓe catal Kayhaɗi.
Musiɗɗo Daawuuda Sammba Ndonngo hollitii deftere mum nde winndi e Kayhayɗi, yaltunde e ndeeɗo hitaande 2019.
Usmaan Ndonngo
