Ɗemɗe ngenndiije to ENAJM (Duɗal Ngenndi ngal Njuɓɓudi laamu e Jaaynugol e Ñaawoore)

0
1220
Ɗemɗe ngenndiije to ENAJM (Duɗal Ngenndi ngal Njuɓɓudi laamu e Jaaynugol e Ñaawoore)
Ɗemɗe ngenndiije to ENAJM (Duɗal Ngenndi ngal Njuɓɓudi laamu e Jaaynugol e Ñaawoore)

Ñalnde 15 oktoobar 2020, kewu yuɓɓinaama to Duɗal Ngenndiwal Njuɓɓudi laamu e jaaynugol e Ñaawoore (ENAJM), hono duɗal keblowal jagge njuɓɓudi laamu nder ñaawirɗe, e waaliiji e haakemaaji kam e jaaynooɓe ekn. Jaagorɗe tati nootitiima heen.    Jokku hello 3

Laamu Moritani fellitii naatnude ɗemɗe ngenndiije (pulaar, sooninke e wolof) e nder duɗal biyeteengal ENA. ENA noon ko duɗal keblowal ñaawooɓe, jaayndiyankooɓe wondude e gollotooɓe laamu woɗɓe…

Ko ñalnde alkamiisa 15 oktoobar 2020 waktu 10ɓ° , jaagorɗo nuunɗal wondude e jaagorɗo geɗe ndernderiije wondude e jaagorɗo golle laamu (fonction publique) ngari to ENA ngam udditde golle heblo ngoo. Heblo ngoo noon fuɗɗorii ko e ñaawooɓe ɓee (qaadiiji). Woni faandaare ndee ko heblude janngooɓe ENA ɓe e ɗemɗe ngenndiije, mbele gooto e maɓɓe fof ina haala ɗemɗe leydi ndi, nde wonnoo ko e ɓesnguuji ɗi ɓe njokkondirata, ɗuum noon ina jojji  nde ɓe nanondirata e ɓeen. Mbiyen tan ENA ina waɗi catal toppitingal ɗemɗe, kono noon ɗemɗe ngenndiije (pulaar, sooninke e wolof) ngalaano heen; wonnoo heen tan ko arab, farayse egele ekn…

Heblo ngoo noon ko ngo duumatoongo e wonande ko ɓe kaali, yanti heen, maa defte jowitiiɗe e heblo ngoo keble e ko fayi arde. Heddii noon, ko waɗaa ko, heɗum fof e famɗude fawaade e ko naamni-ɗen ko, siko laawɗingol ɗemɗe ngenndiije, eɗen poti nanngude heen, njokken naamnaade nde ɗemɗe ɗee naattintee e tippudi nehdi njaŋde wondude e gollorɗe laamu.

Eɗen nganndi jokkondiral pelle pine tati ɗee ( Fedde Ɓamtaare Pulaar, Fedde Ɓamtaare Sooninke e Fedde Ɓamtaare Wolof) ina waɗi dallinannde ko faati e laawɗingol ɗemɗe ɗee, tee njoorto moƴƴo ina jogaa heen.

Eɗen teskoo kadi jokkondiral ngal hooreejo suudu sarɗiyeeji waɗdi e jokkondiral pelle tate ɗee, tee o tottiiɓe ko ɓura kelme teemedde joyi ngam ɗe pire e ɗemɗe ngenndiije ɗee, yantude e goomu ɗemɗe ngenndiije cosaangu e nder suudu sarɗiyeeji e gardagol Kajjata Maalik Jallo, wonndude kadi e jamirgol firo ɗemɗe ɗee e nder suudu sarɗiyeeji ; ɗeeɗoo maale fof ina kollira wonde laawɗingol ɗemɗe ɗee ngoni ko e laawol. Tee ina woodi kadi dente goɗɗe ndee ngonaa laamuyankooje jeyaaɗe e nder leydi ndi ko wayi no dental biyetengal junngo e junngo (main dans la main) wondude e dental El Fethaa, wondude e yimɓe heeriiɓe tawa ngonaa fulɓe, tawi ina njogii nokkuuji ɗo keblata yimɓe mumen e ɗemɗe ngenndiije ɗe (pulaar, sooninke e wolof).

Ɗuum ndeen janngingol majje e nder heblorde ENA ko gootal e daawe hee. Ɗuum ndeen mbiyen yoo yimɓe ɓee njokku golle e nuunɗal, ngacca luure puuyɗe ɗee, mbele faandaare ndee waawa yotteede.

Muusaa Jibi Taal

Jaŋde ɗemɗe ngenndiije to ENAJM

Bayyinaango pelle pinal ngenndiije Ko faati e naatnugol jaŋde ɗemɗe ngenndiije he Duɗal Ngenndi ngal Njuɓɓudi laamu e Jaaynugol e Ñaawoore (ENAJM) Jokkorde pelle pinal ngenndiije pulaar, sooninke e wolof (FƁPM, AMPLCS, APROLAWO) nanii, rewrude e jaayɗe, kurmbitgol, ñalnde alkamiisa 15 oktoobar 2020, tumbudu heblo he nder ɗemɗe ngenndiije wonande doge « ñaawoore » e « njuɓɓudi laamu », to Duɗal ngenndi ngal Njuɓɓudi laamu e Jaaynugol e Ñaawoore (ENAJM). Pelle amen ɗee, sabu mum en wonde pelle-baafal hare ngam keɓtingol timmungol ɗemɗe men ngenndiije rewrude e laawɗingol mum en, e kuutoragol mum en he nder denndaangal fannuuji nguurndam leydi ndii, mbaawata tan ko weltaade e ndee feere, so janngingol ɗemɗe Pulaar, Sooninke e Wolof to ENAJM, ngam, e yeru, « kalfinaaɗo njuɓɓudi laamu ine waawaa haaldude, hunuko e nofru, e ɓiɗɗo leydi he nder ɗemngal ngal ɓuri nande ». Kono tan, e miijo amen, ndee feere hesere ine luurondiri e hoore mum, sibu ko toɗɗii « kalfinaaɗo njuɓɓudi laamu » e « ñaawoowo » koo, ɓuri toɗɗaade kadi ko jannginoowo e cafroowo, kam e denndaangal mecce jowitiiɗe e mbaawka laamu. Ko ɗuum tagi, so en njiɗii ndee feere yettoo no moƴƴi faandaare mum toɓɓaande ndee, alaa-e-sago nde naatta e feere ɓurnde yaajde, so mbayliigu tippudi nehdi e jaŋde tuugiingu e janngingol ɗemɗe men ngenndiije ɗee kala, nde tuugoo e politik goonganteejo laawɗingol ɗemɗe Pulaar, Sooninke e Wolof. Ko ndeen tan ENAJM e denndaangal juɓɓule jaŋde e heblo ngonata nokkuuji mahooji ngootaagu ngenndi, ɗi ngona kadi kuutorɗe baawɗe rokkude halfinaaɓe njuɓɓudi laamu ɓee, ñaawooɓe ɓee, e jaaynooɓe ɓee, e denndaangal fanniyankooɓe « geɗe ndenndaandi », gannde paatuɗe e ɗemɗe, e pinal e renndo, gaddanooje ɗum en waawde jokkondirde e yimɓe ɗo ɓe ngollotoo ɗoo, kam e waawde ardaade gardagol juumtungol.

Nuwaasoot ñalnde 20/10/2020 Jokkorde pelle pinal

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.