Tuggi alkamiisa 21 haa alet 24 oktoobar 2021, ñalɗi diisnondiral paatuɗi e mbayliigu Tippudi Nehdi e Jaŋde (TNJ) leydi Muritani njooɗiima he laamorɗe diiwanuuji Muritani kala. Jooni, caggal nde ciimti ɗii tonngaa, aɗi poti holliteede gollordu kuuɓtodinndu potngu jooɗaade tuggi 16 haa 20 lewru noowammbar 2021. Yonaaɓe pelle pinal tawtoranooɓe ɓee mbaɗii hakke baawɗe mum en ngam famminde nafoore naatnude ɗemɗe ngenndiije he nder jaŋde ndee, mbele sukaaɓe ɓee ine ndaña no njanngiri he ɗemɗe mum en neeniije.
Tuggi alkamiisa 21 haa alet 24 oktoobar 2021, ñalɗi diisnondiral paatuɗi e mbayliigu TNJ leydi Muritani njooɗiima e laamorɗe diiwanuuji Muritani kala. Caggal ɗuum rewata heen ko lelnugol ciimtol ngenndiwol tonngowol gollorɗi diiwanuuji ɗii, potngol holliteede gollordu kuuɓtodinndu potngu jooɗaade tuggi 16 haa 20 lewru noowammbar 2021, njaajtinteendu he partiiji politik e gollooɓe politik.
Fof noon foti yuumtude ko he lelnugol laabi wonande ekkol ndenndaani, gaddanooji leydi ndii lelnude sariya kuccam ngam waylude nokku jaŋde oo, mo laamu nguu anniyii yettinde suudu sarɗi ko adii maayirɗe hitaande ndee. Ko adii ɗuum, jaagordu jaŋde nduu, ngam heblaade, jooɗodiima e batuuji diisnondiral e gollooɓe heewɓe, haa arti noon e Goomu Ngenndi ɗownoongu jeewte jaŋde kuuɓtodinɗe juɓɓinanooɗe e hitaande 2013, e Fedde huuɓtodinnde jinnaaɓe almuɓɓe ; e senndikaaji jaŋde ɗii fof, e Diisooji diiwaan, e Fedde meeruuji Muritani, e partiiji politik, e pelle ɓamtaare ɗemɗe.
Jokkorde pelle pinal (Fedde Ɓamtaare Pulaar he Muritani (FƁPM), Fedde ɓamtaare ɗemngal e pinal sooninke (AMPLCS) e Fedde Ɓamtaare ɗemngal Wolof (APROLAWO-RIM)) jooɗodinooma ko adii ɗuum e jaagorgal jaŋde ndee ñalnde 3 ut 2021. O hunaniima pelle ɗee tawtoreede diisnondire ɗee. Caggal ɗuum, nde ñalɗi ɗii payi e yuɓɓineede, ɗe jooɗodiima e makko e batu ngu o noddunoo ɓe ngam habrude ɓe juɓɓingol ñalɗi ɗii, ñalnde talaata 12/10/21. He ndeen joɗnde pelle ɗee kollitii mo ine kaawaa ko haɗi humpito Duɗal ɗemɗe ngenndiije ɓeteede, haa teeŋti noon haala ɗemɗe ngenndiije ine wiyee aɗa njogori teskeede he nder TNJ paandi ndii.
Ko he nder ɗuum ɗe ndottanaa yimɓe 3 he gollordu kala (gollorɗi 3 he diiwanuuji 3 Nuwaasoot ɗii, e gollorɗi diiwanuuji nder leydi ɗii). Nii woni, terɗe cate FƁPM mbaawii jooɗanaade pelle ɗee he Suwoyraat (3), Nuwaadibu (3), Rooso (2 fɓpm +1 fedde wolof), Eeleega (3 ummoraade catal Ɓoggee), Kayhayɗi (3), Sehilbaabi (3), Kiifa (3), Ayyuun (2), Neema (1), Aksuus (3) ; Attaar (1), yantude he diiwanuuji 3 Nuwaasoot ɗii. Ko adii ñalɗi ɗii, jokkorde pelle ɗee yuɓɓinanii fotɓe tawtoreede ñalɗi ɗii jeewte ɗiɗi mawɗe : 1. Humpito Duɗal ɗemɗe ngenndiije e 2. Dallinannde pelle ɗee. Ɗuum woni ɗe keblaniima ñalɗi ɗii.
Ginol golle gollorɗi ɗii ko jaabaade naamne ɗe jaagordu jaŋde nduu lelnunoo caggal nde ɓeti mbayliigaaji joy TNJ baɗnooɗi he leydi hee gila heɓi hoore mum, tonngaaɗe he nder naamnorgol ganndirangol « feuille de route » (ginol golle). Ɗum noon gollorɗi ɗii mbaɗiraa ko e ɓultaade miijooji tawtoraaɓe ɓee he toɓɓe lelnaaɗe ɗee.
Caggal balɗe 4 jeewte, eɗen mbaawi wiyde, e fawaade e ciimti jooɗaninooɓe pelle ɗee he ñalɗi ɗii, wonde jeewte ɗee mbaɗii he deeƴre, kadi ngoƴaaji pelle ɗee tonngaama, ko famɗi fof, he kuuɓe (PV) 12 nder kuuɓe 15 leydi ndii. Ɗuum woni naattingol ɗemɗe ngenndiije tati ɗee he nder TNJ leydi ndii no ɗemɗe janngirɗe nii, kam e laawɗingol majje.
Eɗen teskoo tan, he balɗe ñalɗi ɗii, duko waɗii ko faati he ngoƴaaji ɗiiɗoo : janngingol fannuuji jaŋde ɗii fof he ɗemngal arab ; binndirgol ɗemɗe ngenndiije ɗee alkule arab, jaltingol farayse he jaŋde ndee. So en ƴeewii hello faatungo he naamne kollitaaɗe gollorɗi ɗii, eɗen teskoo hay heen ngoƴa gooto feeñaani heen. Ma a taw ko ɓuri heewde heen ko kulhuli jogaaɗi walla toɓɓe ɗe huunde e tawtoraaɓe gollorɗi ɗii peññini. To oon bannge, jooɗaninooɓe pelle ɗee, mbaawii jaabtaade ɗum no haanirta nii.
Fooyre Ɓamtaare
