Ñalnde 16 bowte (desaambar) 2022, piɓondiral siifaama to Wasinton D.C. (USA) hakkunde Dental Yaakaare Ndema e Ngaynaaka (GIE DYNN) e Fedde African Agriculture Inc. (AA) ngam toppitaade eɓɓaande ndema njulaagu to Ɓoggee. Piɓondiral ngal siifaa ko e les njiimaandi jaagordu Geɗe Faggudu e Ƴellitaare Senngo Yeñtinoowo e tawtoreede Hooreejo leydi hono Muhammed Sheex wul Gaswani e sawndo Batu USA-Afrika (hakkunde Dental Dowlaaji Amerik e Afrik).
Ngalɗoo ciifondiral naatti ko e politik keso mo Hooreejo leydi ndii ummini ngam moƴƴingol timmungol leyɗe ndema. GIE DYNN ine jogii 2 000 ha leydi ɗi demgol mum en waɗi caɗeele gila heɓaa e hitaande 2018. Gollondiral nafa mi naf maa e muritaninaaɓe gollantooɓe koye mum en, ñiiɓɓe to Rooso, yuumtaani e ko yaakoronoo e mum koo. Ine anniyaa dartinde ngaal gollondiral nder paamondiral.
Ko noon kadi, gollondiral enndanoongal waɗdeede e antampiris maruknaajo biyeteeɗo AQUAMAG, yuumtaani caggal termondiral juutngal e hitaande 2022 ndee fof. Ɗum fof e waade noon, ɗoon ɗo GIE DYNN yaaɓanta siifondirde piɓondiral e AQUAMAG ɗoo sibu waasde dañde ko ɓuri ɗum, haa AA ari, rokki daande ɓurnde heewde ɓural. Piɓondiral e AA tuugii ko e toɓɓe garooje ɗee :
(i) Kasdi 80% leyɗe peewnaaɗe e jaajtingol CPB ɗee, hono 1 626 ha ngam ndema ñaamdu jawdi njeyoyteendu caggal leydi, ɗi AA difii fereeje mum fof to bannge kaalis. Kasdi nanondiraandi ndii artata ko he 300 USD/ha/hitaande, woni fof hawra 487 800 USD hitaande kala. Yanti e ndiin kasdi, kasɗo oo ine wersa GIE DYNN 5% pawnaari dañi he bannge kasaaɗo oo, ngam huuɓnude gollagol DYNN e tiiɗtinde kattanɗe mum, woni, ko famɗi fof, 121 800 USD nanondiraaɗe.
(ii) Demangol GIE DYNN 20% leyɗe keddiiɗe ɗee (400 ha) ngam soklaaji terɗe mum, tawi kadi ko AA difii denndaangal fereeji mum.
(iii) Ɓure goɗɗe jahdooje heen, ko wayi no jeyegol DYNN e Diiso Njuɓɓudi AA, e gardingol gollingol jeyaaɓe e nokku hee, e keblugol sukaaɓe nokku oo to bannge karallaagal, ko jiidaa e golle goɗɗe ƴellitaare renndo jeyaaɗe e baɗɗiiɗe renndo pawiiɗe e antampiris oo (RSE). Tuugnaade e ngalɗoo piɓondiral, maa Nanondiral siife wonande mudda duuɓi 20, kono ɓetteteengal e kala sahaa, kadi baawngal yedditeede so woodii bannge he banngeeji ɗiɗi ɗii baasɗo huuɓnude ko huninoo koo.
E miijo am, go’o ko hono ngalɗoo piɓondiral ine dañee he Muritani, walla nii, e ko kumpitii-mi, he nder diiwaan oo. A ngal waɗi ɗeeɗoo ɓure :
– Kalfingol gollodiiɗo baaɗo nii, ndema ngalɗoo kolongal ine waawi udditande diiwaan oo fartaŋŋeeji kesi ;
– Kulol teetteede leydi fof alaa heen sibu leydi ndii luɓaaka, yeeyaaka, kono ko kasaandi fawaade e sarɗiiji dottaaɗi ;
– Jeyterogol timmungol GIE DYNN, kuufɗo denndaangal kolangal CPB ngal, e tamgol mum pellital mum timmungal he nder kaaldigal hee ;
– Yenaneede ko waawi wonde heen fof, maa tam hitaande kala kaalis gaddanoowo ɗum ummanaade geɗe goɗɗe ; e, e joofirde,
– Fartaŋŋeeji ciirɗi golle kam e keblugol cukaagu.
E fawaade e ɗee ɓure memotooɗe limtaaɗe ɗee, kam e baɗte faggudu jaakoraaɗe he wuro Ɓoggee e saraaji mum ɗee, e kulhuli paatuɗi e jeyi leydi, kam e bonanndeeji baawɗi heɓtaade taariindi kaaɗɗi e juuɗe. Nanondiral siifoyteengal caggal piɓondiral ngal, ine foti joopaade alaa e sago lelnaaɗe ŋeerɗe ngam ɓeydude wakilaagal GIE kam e reende yimɓe ɓee. Ko noon ne kadi lelnaaɗe to bannge sariya maa toɗɗe heen, paatuɗe e kisal taariindi e renndo ɗe nanondire dewre lomtingol potɗe eɓɓeede poti reende so tawii cellal ɓesnguuji ɗii, kam e ngaluuji denndaaɗi e keeriiɗi, e taariindi woodii ɗo mbonnaa ko aldaa e teyaaɗe.
Miɗo yenanaa nafoore soomiinde he ngalɗoo nanondiral kadi maa binndannɗe mawɗe ndañe he ngalɗoo gollondiral. Sikke alaa ine woodani Dowla oo jokkude e huufde GIE oo nder njuuteendi silsil oo kam e reende nafooje mum. E joofirde, ine waɗɗii kadi nokkuuji ɗii kam e Renndo Siwil ngoo jokkude e jeertaade e tintinde kala moygol ngol faamnaaki walla cikkingol.
Aamadu Umar Bah
