Ɓeeynirka Siin mbiyeteeka Chang’e-6, njolnuka santiyoŋ leydi e kaaƴe ɗe ka ɓoftunoo he bannge lewru birniiɗo oo, ine foti artude ñalnde talaata 25/06/2024, caggal ɗanngal balɗe 53 ngal hono mum meeɗaa waɗde e winndere ndee, so fof yahrii no foti yahrude nii. Ngol lappol jeyaa ko e lappi weeyo ɓurɗi saɗtude, ɓurngol toowde ngol leydi Siin meeɗaa ummanaade.
Nokku Siin kalfinaaɗe weeyo (L’agence spatiale chinoise (CNSA)) haalaani waktu mo ɓeeynirka kaa juurotoo, kono haralleeɓe ɓee ine njaakorii ka juurotoo ko kikiiɗe talaata 25/6/2024 to nokku moraande Monngoli nderndero, to rewo Siin.
Bannge lewru birniiɗo oo (enen wonɓe he Leydi en njiyataa mo) ko nokku mo heewaani yilleede. Ko nokku mo wiɗtooɓe mbaɗi yaakaare no feewi sabu mum ñaaɗde (heewde kaaƴe e jolɓitte) nde tawnoo kam ɓuri hisde e baltugol kaaƴam mboorkaaji ɓooyɗam (anciennes coulées de lave). Ɗum noon, ine yaakoraa maa santiyoŋaaji ɗi Chang’e-6 ƴetti toon ɗii, ngaddan en ɓeydaade anndude hol no lewru ardi, e hol daartol mum ?
Ɓeeynirka kaa diwrunoo ko nokku Siin jerƴirɗo laaɗe weeyo biyeteeɗo Wenchang to bannge worgo leydi ndii, ñalnde 3 mee 2024. Hedde balɗi capanɗe tati (lewru) caggal ɗuum, ka juurii nder nadde mawnde to wuddu worgo lewru, hono ngaska buɓɓannde haayre ɓurka mawnude, nganndaaka he yuɓɓo naange. Ka huutorii ko masiŋ ngasirdi ngam ɓoftude leydi e kaaƴe lewru. Ka ƴetti nate leydi lewru, ka ñiɓi toon kadi araaraay Siin boɗeejo e oolo. Gila 4/6/2024, ɓeeynirka kaa diwi ummoraade he bannge lewru birniiɗo oo, ka woni e taartaade lewru nduu, aka rimndi santiyoŋ ka ƴetti oo, haa nde ka ɗoofii toon ngam artude he Leydi. Wonande jaaynirde laamu Siin, « ɗumɗoo ko poolgu mawngu he daartol jillagol lewru ». So goonga, ko ɗum golle caɗtuɗe to bannge karallaagal, sibu aɗe ɗaɓɓunoo rewrude e jowitiingel ƴaaŋrugel (satelit relais) ngam waɗde jokkondiral hakkunde bannge lewru birniiɗo oo e Leydi (So siñaal ummiima leydi waawaa yettaade bannge lewru birniiɗo oo sibu yiyataa ɗum, walla so ummoriima bannge lewru birniiɗo oo waawaa yettaade leydi sibu ine wirnii, ɗum noon maa ƴaaŋra nokku « toowɗo » jiyoowo nokkuuji ɗiɗi ɗii kala).
E ɗii duuɓi 30 cakkitiiɗi ɗii, Siin ƴellitii no feewi tuugnorɗe mum weeyo. Ndi waɗii heen miliyaaruuji keewɗi oroo, ngam heɓtaade leyɗe gardiiɗe to oon bannge, hono Amerik e Riisi e Orop. E hitaande 2019 ndi juurniino laana to bannge lewru birniiɗo oo (kayri idii waɗde ɗuum). E 2020 ndi ƴettii santiyoŋaaji ummoraade e bannge lewru jiyotooɗo oo. E 2021, ndi juurnii robooyel he Mbaañ (Mars). A nde anniyii diwnude lappol koɗangol faade Lewru ɗoo e 2030, nde maha toon tuddunde lewru.
Bookara Aamadu Bah
