Fulo winndannde Caam Muhammadul Kariim ƴoogaande e jaaynde « Calame toŋ.1408 ñande 06 nov. 2024 » e ceettagol Ahmed Mahmuud lollirɗo Jemaal desndaaɗo defterdu , ko yowitii e golle Njawaar to bannge winndiyaŋkaagal.
Mi heɓii kabaaru naatnuɗo mi he sunaare mawnde, so duttagol e joomi mum Njawaar Kan. Kono ko nii tan aduna siforii. Puɗɗii-mi anndude oo gorko ko e hitaande 1971 to Pari, amo woni sanɗa duɗal jaaɓi haaɗtirde lollirngal « Panthéon-Sorbonne », ɗo kawritnoo-mi e yoga e sanɗaaji yuɓɓunooɓe he fedde wiyeteende Dental Kuuɓtidinngal Sanɗaaji Muritani (U.G.E.S.M) ngal ardinoo ɗum Taleb Muhammed wul Lemrabot. Ko Njawaar noon ardinoo catal leydi Farayse. Ko Yahya wul el Hassen anndini-mi wonde Njawaar jeyaa ko e sosɓe UGESM, Fedde wootiɗinnde pelle sanɗaaji, hono UNEMAU e AESMA.
Ngooɗoo sosngo ko huunde himmunde no feewi wonande ngootaagu ngenndi, tawde rentidini ko sanɗaaji Muritani fof he nder fedde wootere. Ɗum ɗoon noon ine ɗaɓɓunoo darnde sanɗaaji ganndanooɗi to Ndakaaru, Farayse e Fuɗɗaange ɓadiiɗo. Miin e Njawaar, Muusaa Fall, Yaakuub Jallo ngonnoo sanɗaaji heɓnooɓe nanngeede e nder sappo, e ɗiɗo ɓe laamu fellitnoo waawnude yo naat larme alaa e sago, rewrude e yamiroore ƴettanoonde ñalnde 2 ut 1972. Njeetato heddiiɓe ɓee keɓaano nanngeede ɓee ko Taaleb Muhammed Lemrabott, Bah Bubakara Muusaa, Yahya wul El hasen, Jagana Youssouf, Limaam Sheriif, El Khalil wul Ahmed, Muhammed wul Yahya et Sih Hasmiyyu. Gooto heen fof daɗiri e kuulal ngal ko rewrude e peeje ceertuɗe. Wonnoo faandaare kuulal ngal ko tonngude sanɗaaji ɓurnooɗi softude e nder UGESM. Caggal balɗe tati ɗe min cokaa he nder Yiilordu konu « Etat- Major », e min calii waawneede naatde e nder larme, minen fof min njebbilaa nder tuddule soldateeɓe. Njawaar nawaa Attaar, miin nawaa-mi Efderik, Muusaa Faal e Yaakuub Jallo nawaa Biir Mogren ngam waɗteede soldateeɓe. Kono ɗum wonti ko dummbugol he kasoo, duuɓi ɗiɗi ŋakkuɗi balɗe 45, caggal ɗum min ɗaccitaa e lewru suwee 1974.
Miin e Njawaar min meeɗaa taƴondirde, amin njokki e jokkondiral amen, e wostondirde won ɗiin miijooji. Min njeytoraama e lulnde wootere to Abijaa e Ndakaaru ngam tawtoreede jeewte ɗiɗi toɗɗiiɗe Porfesoruuji ko yowitii e Daartol e Ganndal leydi e hitaande 1976, tawi yuɓɓini ɗum ko sarwiis toppitiiɗo ballondiral Farayse leyɗeele goɗɗe (Coopération française).
Mbeɗe mettaa e oon sahaa tooñaŋngeeji ɗi o hawratnoo kanko nii e woɗɓe. Mbeɗe teskoo e makko hormaade cehilaagal e wonde aadiyanke, sabu ko ina tolnoo jooni e duuɓi tati amo etoo, hakke doole makko no potirnoo, rokkude mi, ngam golle ɗe ngon-mi e dow mum ɗee, kumpitte jowitiiɗe e won baɗe dartiyankooje, walla hoohooɓe mum ɗe ɗaɓirtunoo-mi mo, ko yowitii e kewkewe baɗnooɗe nder Muritani hakkunde kitaale 1870 e 2020.
Miɗo duwanoo ɓesngu makko he ndee sunaare muusnde
Nuwaasoot ñalnde 1 Noowammburu 2024
Caam Mohammed el Kariim,
Fulo : Maamuudu Haaruuna
Njawaar Kan, hono maa weeɓaani
Njawaar Kan ko neɗɗo mawɗo, ganndaaɗo wonnoo. O waɗi nguurndam makko fof ko e haɓanaade nuunɗal e wellitaare e ndimaagu yimɓe. He nder deftere makko tiitoriinde “Maayo saliima seerndude”, o sifiima heen nguurndam makko, o holliti heen wonde Maayo mawngo wonaa keerol, kono ko jokkorgal hakkunde yimɓe huufɓe ɗum ɓee, hakkunde pine.
Darnde duumiinde ngam nuunɗal
He nguurndam makko, o hawrii e caɗeele keewɗe, gila e daayo haa e kasoo, haa e taccingol 1989 faade Senegaal. Ɗuum fof meeɗaa addande mo tunwude e geɗe ɗe laaɓaani. O daraniima gartugol nder leydi makko Muritani ndi o horsinnoo no feewi. Ko o neɗɗo tiiɗɗo fiɓnde, daraninooɗo nuunɗal e potal kaanɗo ñemmbeede.
Koohoowo, ngenndiyanke
Ko o koohoowo mawɗo, tiiɗɗo : omo jeyaa e sosɓe pelle keewɗe daraniiɗe ndimaagu e ɓamtaare : UGESM (Fedde huuɓtodinnde sanɗaaji Muritani), FƁPM – ARPRIM (Fedde Ɓamtaare Pulaar he Muritani) e FONADH (Pottital Pelle Ngenndiije dariiɗe jojjanɗe aadee).
Sankaare makko ko baasal mawngal. Yo Alla waɗ mo he maayɓe malaaɓe, naatna e aljanna ɓurɗo toowde. Aamiin
Golle winndiyaŋke Njawaar Kan
Porfesoor Njawaar Kan, jannguɗo dowrowo fannu Ganndal leydi wayniima en, ina ɗaldi en ndonu ngu aadoraaka, maantinirngu nuunɗal, muñal e giɗli ɓiyngu yummiraagu. O heɓi seedantaagal makko jaŋde jowitiingal e Ganndal leydi ko e nder duɗe jaaɓi haatirde Ndakaaru e Pari VII.
Njawaar Kan jeyaa ko e yonta sippirtenooɓe e kitaale 1968, dillere haɓotonoonde tiimaandi koloñaal nde tammbinoo ɗum sippirooji sanɗaaji e miijooji pinal. Ɗum addaniino mo e oon sahaa mobbeede e waawnere e nder larme. Gila nde o yahrata e duɗe hakkundeeje (lycée national) o jeytoraama e ko lollirnoo « Mouvement National Démocratique » dillere ngenndiyankoore e demokarasiyankoore Moritani, o waɗti nguurndam makko fof daraniiɗo hakkeeji aadee e kala ɓure jotondirɗe e potal, gaagaa lorla e tooñanngeeji ɗi o hawratnoo.
Amo tawaa etee ko o seede muddaaji caɗeele peeñnooɗe hakkunde leƴƴi e kitaale 1966 e 1989. O reftiima ɗum e nder binndanɗe makko, haa arti e ɓurnde maantinde e majje « Maayo saliima seerndude », ɗo o seedtoto geɗe jurminiiɗe ɗe o humpitii, kollirooje ceeral hakkunde leƴƴi e tooñanngeeji ɗi o wuurnoo e lor aadee « passif humanitaire » e nder Moritani.
Ndeeɗoo winndannde maantoniri ko wonde ɗum eeraango ɓiyleydaagu, ɗaɓɓoowo beldital tawa jaŋngooɓe winndannde nde fof yoo keɓtin muuseeki e mette guuranooɗe e oon sahaa mbele ina mbaawa mahdude jaŋngo mum en.
Gila he cukaagu makko heccu, Njawaar Kan naati e Dental Kuuftidinngal Sanɗaaji e wonɓe e Heblo (UGESM) luulndinoongal e coftal laamatiri ndii. Ɗum addanii mo dummbeede duuɓi ɗiɗi tuggi 1972 haa 1974 e nder tuddule soldateeɓe. Ina moƴƴa yontaaji jooni ɗii ngannda nguurndam ɗam o wuurnoo ɗam, humpito makko heeriingo e sippirooji denndaaɗi, sabu maa ɗum addan ɗum en faamde taariik kimmuɗo e nder nguurndam Moritani.
« Laawol liiltungol », hono tiitoonde deftere makko ɗimmere nde o winndi, woni tiimtorgal makko garwaniiwal ko Demmba. Demmba noon heewi wonde ko ɓiɗɗo ɗimmo e nder ɓesngu Fuuta Tooro. He nder ngol pentol, o ardini binndol makko ko Sheek Haamiidu Kan. Faandaare ndeeɗoon deftere ko hollirde jotondire e nder galleeji fuutankooɓe e dewondiral parlinaangal sabu kecciigu ngam mawninde aadaaji pinal e diine tiindiiɗi e jaaral yeeso. Njawaar ina rutta teddungal e aadaaji fuutankooɓe ganni tawa omo hollira heen caɗeele ɗi njogii e waawde yahdude e oo aduna baylotooɗo tawi nangtagol renndo ngoo e ko ɓenni fawii ko e piɓle jowitiiɗe e kaaldigal e ballondiral. E nder binndanɗe makko, Njaawar Kan holliri ko neɗɗo jankiniiɗo, jaadiiɗo renndo e goɗɗuɗo cooyngal. O waawi taccude jolɗe keewɗe caɗeele, diwtude ɗum en ngam huccitande ko fayi arde e ƴellitde kaaldigal.
O woniino e nder nguurndam makko diisneteeɗo sara Hooreejo Ndenndaandi e gardiiɗo Booñ Ngenndi ngam Kisal Renndo (CNSS). O ƴellitii Moritani tawi amo nawdi ƴoyre (miijo laaɓtungo) e pellital ɓiyleydaagu. Ñemmbude darnde makko, ɗaɓɓiri aroyooɓe ko mahde renndo tuugiingo e muñal e kormondiral, gaddanooje gooto e men fof jeytoreede e tafgol nguurdiigu moƴƴu.
« Njawaar kan suddiima leppi leydi, leydi suddiima leppi teddungal ».
