Ndee winndannde ko he farayseere winndanoo, pul-ɗen nde e yamiroore binnduɗo oo, hono Ceerno Alhajji Buubu Sanngoot. Oo ceernaajo kumpitiiɗo jeytoraama e kareeli pinal gila he kitaale 1970, nde o woni tergal kareeli dawrugol sukaaɓe Senegaal yahrunooɓe senngo « mawoyaagal » nder lannda AJ-MRDN. Caggal nde o heɓi seedantaagal to duɗal njuɓɓudi laamu « ENA » mo Ndakaaru, o jooɗaniima leydi Senegaal he leyɗe keewɗe. Baaba makko ko Golleerenaajo. Kono o hoɗii aduna ko Mbummba, wuro neene makko, ɗo o nehii kadi, o mawni, o janngi, takko kaaw makko en. Ndeen noon eɗen mbaawi wiyide ko o Mbummbanaajo, nde tawnoo, no Fulɓe ngoowi wiyrude nii tan, « nehɗo moniima jibinɗo ». Kanko woni Hooreejo « Kawtal Pelle Fulɓe », mooɓal jaajngal e nder nokkuji Fulɓe he nder Senegaal. Sabi makko jogaade humpito he ɗemɗiyaagal e marde ɗemngal makko pulaar, o jaabii winndannde nder jaayɗe oo biyeteeɗo Muhammadul Muttaar Kan, kollirɗo yo wolofeere waɗte ɗemngal laawɗinaangal takkoo farayseere, hay sinno ngal pellital waawnete leƴƴi keddiiɗi ɗii. Taree nde winndannde haa mbaawon huɓindaade ko o haali he laawɗingol ɗemɗe e innitgol gure jogiiɗe inɗe arani en.
Jaabtawol faade e Ceerno Muhammadul Muttaar Kan, he kuɗol Alhajji Buubu Sanngoot.
« Kawtal Pelle Fulɓe » ina hokka les ɗoon yiyannde e naamne : « Wolof, ɗemngal laawɗinteengal punewal Farayseere » kam e « Innitde sahre Saint-Louis (Seŋ Liwis) ».
He tonngoode 9711 nde ñalɗi 14 e 15 juko (ut) 2024, jaaynde Walf Quotidien bayyinii nder lowre mum « Contribution », winndannde Ceerno « Muhammadul Muttaar Kan, Karallo kumpital, Ɗowoowo denndaanɗo, gollordu KNG Consulting, Wiɗtiyaŋke he pinal Islaam e jokkondiral hakkunde leyɗe, Winndiyaŋke », nde tiitoonde « (Pastef/ngenndiyaŋkooɓe keɓii laamu : toɓɓere yaawnoore jeytaare pinal)».
He ndee winndannde, caggal nde Ceerno Kan waɗi naatirka, o yaaɓani ko toɓɓe nay :
- – Halfunooɓe ittooɓe kalifaandi ɓe nuunɗaani, ittaaɓe he kalifaandi ne kadi nuunɗaani ;
- - Wolof, ɗemngal laawɗinaangal sara Farayseere ;
- - Jomaay e Sonko he jolngo ittude kalifaandi ;
- - Initde sahre Saint-Louis (Seŋ Liwis).
« Kawtal Pelle Fulɓe » addata miijo mum ko he toɓɓe 2 ɗe Ceerno Kan luggiɗinii he winndannde mum, woni laawɗino wolofeere e innitde sahre Saint-Louis.
Wolofeere, ɗemngal laawɗinteengal sara farayseere. Duko ɗemɗe ngenndiije ko ɓooyngo. He dow ɗuum, Ceerno Kan wiyi :
« He Senegaal, eɗen ngaadorii faɓɓitde kala ko ina ñawnda caɗeele men. Saɗere kuutoragol ɗemɗe ngenndiije nder duɗe jaŋngirɗe e Njuɓɓudi-laamu ko yeewtere ɓooynde nde meeɗaa yumtude. Keddi-ɗen tan ko he haala, ɗum firti ko gostondire e sakkitde miijooji. Fotii naatanen baɗe ».
Ceerno Kan yiɗi wiyde tan ko ko winndiyaŋkooɓe Ngugi Wa Thiong’o mo Keniya e Bubakara Boris Joob mo Senegaal yaltinnooɓe winndannde he lewru duujal (mee) 2024, nde ɓe cakkitta Pastef nde tabitinta, ko waawi jarde fof, fodoore maɓɓe waɗtude wolofeere ɗemngal laawɗinaangal Ndenndaandi Senegaal sara ɗemngal Farayseere.
Ko goonga noon miijo ngoo wonaa heso. Ko goonga kadi ko ina wona duuɓi keewɗi, moojobbe ina ndilla ngam wolofeere laawɗinee, heɓtinee, hay so wonaa kam tan, ngal takkondira e ɗemngal farayseere.
Woodii ƴakkuɓe naforu « Yarhamu » Lewopool Sedaar Senngoor, jermininooɗo he ɗuum. He hitaande 1986, goomu sosaa wiyaa “Goomu ngenndiiwu ngam waylo Nehdi e Jaŋde” , he gardagol Pr Iba Der Caam. Caggal gostondiral miijooji caɗtungal, ɓe korii hawrude he maslahaa, ɗum addani Pr Suleymaan Ñaŋ yowde golle goomu ɗee, gila ndeen artaaka heen. Ko laaɓti heen, ko Pr Iba Der Caam e yahdiiɓe mum ngonannoo ko suɓaade wolofeere yo won « ɗemngal gootiɗinoowal Senegaalnaaɓe», pulaar wona « ɗemngal naatnaattondirowal diiwaan ». He oon tuma, Fedde Ɓamtoore Pulaar salii haa woni. Ko fodde maɓɓe noon !
Duuɓi jeegom caggal ɗuum, he 1992, Pr Iba Der Caam, e Sakhiir Caam, e Paate Jaañ, ngarti kadi, ɓe ɗaɓɓiri Hooreejo Abdu Juuf nde waɗtata wolofeere ɗemngal Dowla, pulaar wona ɗemngaal saraaji dowri. Nde Abubakiri Kan e Dr Oumar Woon, e Yero Dooro Jallo (yo Geno yurmo ɓe, yaafoo ɓe, naatna ɓe Firdawsi) njanti e mawɗo Sheek Haamiidu Kan (yo Geno ɓooynu mo he jeese men), ɓe njiyoyi Hooreejo Abdu Juuf, ɓe ndeentini mo, ɓe njaɓaani ko haalatee koo, kadi kala nde ɗuum waɗaa, ɗum naatnat Senegaal he caɗeele ɗe baɗte mum ko mawɗe ngonata !
Hooreejo Abdullaay Waddu, to bannge mum, ummanii tabitino nde o jooɗii he jappeere laamu hitaande 2000. Fulɓe ndarii kadi mbiyi « niet », ɗo soklaani artude he dallilaaji mum sabi ko ɗi luggi jangtaaɗi ɗee kitaale fof.
Ɗemɗe Ngootaagu Afirik
He ko luulndii ɗum, Hooreejo Abdullaay Waddu e nanndo mum Maawiya wul Siid’Ahmed Taaya kolliino salaare mumen nde Mu amar Kaddaafi wiyi yo pulaar yantine he ɗemɗe Ngootaagu Afirik. Daliilu maɓɓe ko so ɓe njaɓii ɗuum, ɓe kawrat e caɗeele he leyɗe maɓɓe. He oon tuma, gooto e terɗe sete Senegaal, wulli daande dow nder batirde ndee, o wiyi « Holi sabaabu pulaar ? »
Caggal ɗuum, Hooreejo Abdullaay Waddu yamiri yo sete Senegaal tawtore Mooɓondire Ngootaagu Afirik jooɗinooɗe Addis Abeba (Ecopi) ñalnde 3 colte (feebariyee) 2003 e 11 morso (suliyee) 2003 to Maputo (Mosambiki), yo sete oo wonan yo ɗemngal siwahili waɗte ɗemngal gollorgal mooɓal ngal.
Ko refti heen koo eɗen nganndi : 50% kelmeendi Siwahili ummii ko he ɗemngal aarabeere ; ko heddii koo ummii ko he Kerewol e ɗemɗe goɗɗe. Siwahili jaɓaa, laawɗinaa ɗemngal Ngootaagu Afirik. Eey kay, siwahili dañii poolgu dow pulaar, ɗemɗe ɗiɗi cippiratnooɗe duuɓi keewɗi. Siwahili jaɓaa ko he batu kuɓtidinngu 35ɓu Ngootaagu Afirik ñalɗi 05 e 06 colte (feebiriyee) 2022 to Addis Abeba.
Yiɗde Kaddaafi wonnoo ko yo pulaar e siwahili njeye he ɗemɗe gollorɗe Ngootaagu Afirik takko engeleere, e aarabeere e españoleere, e farayseere e portugeere.
Nde Makki Sal wootanaa yo won Hooreejo Senegaal he 2012, o waɗi ko hay gooto e Hooreeɓe Senegaal waɗaani ! Tigi, « Mbeñuganna », dono Aamadu Abdul Sal e Kummba Cimmbo yaltini pellital laawɗinoowal ɗemngal wolofeere nder Ndenndaandi Senegaal. Ndee jinnngere Hooreejo Makki Sal wonaa bettere, sabu hay e nder daartol nguurndam makko ko yowitii he ɗemɗe ɗe o haalata, o wiyi ko « wolof, farayseere, pulaar, seereer e engeleere ». Ndeke hay sinno Hooreejo Makki Sal wiyii ko « Tekeruurjo » to jibnaaɓe mum etee Seereer to pinal mum, o jinngani ko wolofeere sabi o wiyi ko ngaal ɗemngal woni ɗemngal makko garniwal.
Ciimti he pulaar nder RTS kaɗtaama
Haaɗaani ɗoonn ngati he hello 51 deftere yaltunde he lewru siilto (settambar) 2023, deftere nde jaayndiyaŋke-dawriyaŋke Yoro Jah winndi naatirdi mum, nde tiitoonde mum woni « Macky Sall : derrière le masque » (Makki Sal : nder cuuɗndi), Jaayndiyaŋke-winndiyaŋke Madiambal Jaañ binnduɗo ndeen deftere oo, habrii en ko « Laam-Tooro » e hoore mum haɗti ciimti he pulaar, he kala dille ngenndiije he RTS : « …Ñalngu ngootu, jaayndiyaŋkooɓe Papa Sammba Kan (PSK) e Abdu Salaam Kan (ASAK) ɗaɓɓi yiyde Hooreejo Makki Sal ngam jeertin’de mo geɗe kese he jaayɗe laamu hono RTS, geɗe dokkuɗe ɗemngal pulaar joɗnde yilliinde teeŋtunde hesere, ko baɗe baawɗe feraade won ɗiin hakkillaaji he kaa ngonka kolliroowa jinngere leñol fawaande he laamu Maki Sal.
« Ciimti baɗeteeɗi tuma dille guurtinooji jeytaare mbaɗetenoo tan ko he farayseere (ɗemngal laawɗinaangal) e wolof (ɗemngal ɓurngal heewde haalooɓe), mbaɗtii jooni waɗeede he pulaar. Hooreejo Leydi bismii ɓe bottaari ñalnde 4 siilo (saawiyee) 2016. Nde ɓe ceerti, o ƴetti pellitte dartinooje ɗee baɗe nder ciimti RTS ».
Alaa majjuɗo, gila o suɓaa Hooreejo Dowla Senegaal he 2012, ko ina tolnoo he 99% jeewte telewisoŋ mbaɗetee ko he ɗemngal wolofeere gootal (ngonka kaa waylaaki haa hannde oo) etee, ɗum ko yaɓɓude kuule Doosɗe Ndenndaani Senegaal. Ndeke noon, Hooreejo Makki Sal rasii ngesa mbele wallude lomto mum haa waawa joofnude gollal “wolofinde” ɓesngu Senegaal he kuuɓal ; ko yaakaare ɓeen asanooɓe ngootaagu ngenndi e deeƴal renndo. Ko ɗuum tan woni ɗoon he mbunndi-mbunndi. Alaa ko heddii so wonaa laawɗinde ngal gollal. Woytoraandu dañaama he keɓe “ Limoore Joyaɓere Huɓtodinnde Jibinannde e Koɗki ” nde hollitaa ko ɗemngal wolofeere woni ɗemngal ngenndiwal Senegaal ɓurngal haaleede, tonngungal fotde yimɓe 8 525 098 haalooɓe ngal, hawrata ko 53,5% ɓesngu nguu fof, refti heen ko pulaar ina moofti yimɓe 4 175 468 haalooɓe ngal, wonata ko 26,2% ɓesngu Senegaal, Laamu Ceerno Basiiru Jakaar Jomay Fay waasataa ummanaade ƴettude pellital tabitinowal ɗemngal wolofeere ko laawɗinaangal ɗiɗmal Ndenndaandi Senegaal ! Ko ngol laawol juutngol rewaa !
Ko ɓuri haawnaade he ɗee geɗe, ko ɓee laamɓe e ɓee annduɓe ɓe njangti-ɗen ɓee fof, alaa heen jeyaaɗo he leñol Wolof en. Mbiy-mi ko hay tan ɗokko e maɓɓe !
Eɗen ciftina darnde soofaaji ɗemngal pulaar ko hannde fof ɓuri wonde goonga celluɗo. So tawii won doole niɓɓe njiɗi firtude Senegaal mo ɓe cikkata ko taaniraaɓe maɓɓe tan njeyi, maa Ñaawoowo Toowɗo Oo ñaaw ɓe, Ñaawoowo mo Juumataa. Min nganniyaaki waɗde ko jaasi ko baabiraaɓe amen Fulɓe mbaɗnoo koo, ɓee tawoynooɓe Hooreejo Abdu Juuf, ɓe mbiyi mo maa winndere ndee fof seedo ko Fulɓe tigi rigi mbaawi so neɗɗaagal mumen yaɓɓaama, so woodii ennduɗo firtude leñol mumen !
He ndii leydi, Kanhanɓe e Salsalɓe ko miliyoŋaaji, ronɓe Almaami Abdul Qaadiri Kan, Elimaan Bubakar Kan, Abdul Bookar Kan, Abuubakri Kan, Sheex Haamiidu Kan, Laam Tooro Siddiki Sal, Mammadu Yero Sal, ɓe njiidaa he terɗe « Club de la Suprématie Wolof » -pellel ɓurnaare wolof- (amin nganndi woɗɓe, gollooɓe he suuɗaare, tuuntiniiɓe, ɓe potaani heppude kam enne).
Minen, min njaɓataa waɗde ko « Yahuudu en » wiynooɓe ko taaniraaɓe Nulaaɗo Alla Ibraahiima ; ɓee taaniraaɓe ɓe Nulaaɗo Iisaa ɓiy Mayram yedditinoo laataade ɗum en taaniraaɓe Nulaaɗo Alla Ibraahiima, ɗuum tawatee ko he aayeeje 39, 41, 44 e 47 nder deftere Injiil mo Yuhanna : « sinno ko on ɓesngu Ibraahiima, mbaɗaton ko ko o waɗi… ngollon golle makko. Onon baaba mon ko seyɗaane, ciynaton ko golle baaba mon seyɗaane ». Eɗen mbaawi wiyde hono ɗuum ko fayti e Yaam hakkunde mum e baaba mum Nulaaɗo Alla Nuuhu nde o haaldata e Geno, nde Yaam ndaarata yoolaade he Ilam Ɗuufaan, Nuuhu ñaagii Geno wiyi : « Ooy Laamɗo Laamɓe, sikke alaa ɓiy am jeyaa ko he ɓesngu am, Fodoore maa (ko feewti he kisal ɓesngu makko) ko goonga celluɗo. Ñaawooɓe fof Aan ɓuri wonde Goongante … » . (Simoore 11, aayeeji 45 e 46). Etee eɗen nganndi ko Nulaaɗo Alla Nuuhu jibini Yaam. Kono nde wonnoo Yaam ko kefeero, o gollaani golle baaba makko, Geno Toowɗo yaltini mo ɓesngu Nuuhu.
Min turantaa keeceeje hay gooto
Ndeke min tiimtotoo ko he Almaami Abdul Qaadiri Kan en, e Elimaaan Buubakar Kan en, e Abuubakri Kan en, e Sheex Haamiidu Kan en, e Laam-Tooro Sidiki Sal en, e Mammadu Yero Sal en, min mbantirtaa ɗemngal amen, coomngal pinal amen. Ko min Fulɓe, min mbartotaako min nguurta amin ngonti jolfuɓe ! Min mbiyaani noon won mo min ɓuri ; anndi liimanaagal tan ko Geno Ganndo Mbirniindi, oon Gooto anndi ɓurɗo rimɗude, nde tawnoo, e no Lislam jaŋnginiri ɗum nii : ndimaagu fawii tan ko he ɗoftaare Geno, ɓurɗo ɗoftaade Geno fof, ko kañum wonde dimo, kono min njebbilantaako hay tagoore wootere he les oo kammu.
Min ngoondi min ndewata ko he teppe taaniraaɓe amen harbiyankooɓe hono Ceerno Sileymaani Raasin Baal e haralde mum Pir Sañokor, kanko e ngenndiyankooɓe « Haalpulaar en » teɗɗinnooɓe becce kaɓtii koloñaal haa nguurndam mum en yiƴƴi heen ngam ndimaagu Fuutankooɓe. Eɗen mbaawi limtude e ɓeen Sayku Umar Taal e Bees konu mum Alfaa Umar Ceerno Baylaa (mo Kanel), Hammaat Bah lollirnooɗo Maba Jaxu Bah, Baydi Kacce Paam (mo Giyaa), jahratnooɗo e duuɓi 24 fat nde waɗata ñalaande mum ndee, Pennda Muusaa Bukari Saar (mo Ŋawle), Ceerno Sammba Jaadanaa Njaac (mo Madiina Njacɓe maa Juuwde), suka tokooso Aali Yero Joop e yahdiiɓe mum 44 (ɓe Fanay), Abdul Bookar Kan (mo Daabiya), Demmba Taal lollirɗo Kalmbaan (mo Ngijilon), Mbummbalnaaɓe Mammadu Biraan Wan, Demmba Daramaan Wan, Bookar Abdul Gurmo, Baylaa e Hammadi Kuro, ekn. Etee min ndeestotaako, min pergittaako, Insha Allah ! Haa noon ɗo haaɗaa haaɗi kala.
Holi leydi ndi ɗemngal gootal?
« He winndere ndee fof, ina saɗi yiyde leydi ndi ɗemngal gootal, ɗemngal kaaleteengal ngal yimɓe fof paamata. To USA (Dowlaaji Dentuɗi Amerik) haalooɓe ɗemngal español ko dental goodngal to bannge renndo e to bannge ɗemɗiyaŋkaagal, hay sinno ko engeleere ɓuri jaalaade. To Farayse ko ɗemngal farayseere woni laawɗinaangal, kono ngal hoɗdi ko e beroteneere et korseere. To Maruk, laawɗinaa ko aarabeere e farayseere, ɗe ndenndi dingiral e ɗemngal amaasig, ɗemngal Berbeer en. Hono ɗii yeruuji ina keewi, ɗum hollata ko keewal ɗemɗe nder leydi ngootiri, riiwtaani suɓaade gootal heen wona laawɗinaangal ».
Paamen noon, USA alaa ɗemngal laawɗinaangal tigi rigi. Alaa ɗemngal toɗɗangal ko laawɗinaangal kam tan, hay sinno yoga e doosɗe e pellite mbinndaa ko he engeleere e españoleere. Farayse ne kayne ko he 1992 tan farayseere laawɗinaa ngam haɓaade engeleere, fawaade he kuulal 2, taƴre arwannde Doosɗe maɓɓe, kam e kuulal 2, taƴre 2 laawol toŋ 94-665 mo 04 juko (ut) 1994, ko kam teeŋtini ko farayseere woni ɗemngal Njuɓɓudi Laamu.
Caggal ɗuum eɗen teskoo yoga he leyɗe ko wonaa tan Farayse e Maruk ina mari ɗemɗe keewɗe gollorteeɗe. Ndokken yeru Beljik (ɗemɗe 3 : neerlandeere, farayseere e almañeere), Fidji (ɗemɗe 3 : engeleere, fidjeere, e hinndi), Luxemburg (ɗemɗe 3 : luxemburgeere, farayseere, almañeere), Sri-Lanka (ɗemɗe 3 : enngaleere, tamul, engeleere), Wanu atu (ɗemɗe 3 : bislameere, engeleere, farayseere), Pakistaan (ɗemɗe 3 : urdu, punjabi, engeleere), Papouasie Nouvelle-Guinée (ɗemɗe 4 : engeleere, tok, pisin, hiri-motu), Singapuur (ɗemɗe 4 : malseere, engeleere, mandarin, tamul), Espaañ (ɗemɗe 4: españoleere, katalan, galiseere, baskeere), Siwis (ɗemɗe 4 : almañeere, farayseere, italeere, romansh), Afrik Worgo (ɗemɗe keewɗe), Niijariya (ɗemɗe keewɗe), Simbabwe (ɗemɗe keewɗe), ekn. He tonngol, ko ina tolnoo he leyɗe 30 ɓurii ɗemngal gollorgal gootal !
« He Senegaal, jannguɓe cakkitiino yo wolofeere laawɗine ngati keeweendi haalooɓe ngal, nanooɓe ngal. Ina he maɓɓe meeɗnooɗo wonde sarɗiyaŋke, hono Sammba Juulde Caam, Haalpulaar yumma mum e baaba mum, joginooma jaambaraagal he duuɓi ɓennuɗi ɗii, ngoo miijo nder winndannde bayyinaande nder jaayɗe ».
Hay sinno tuugni-ɗen ko he lime goɗɗuɗe ɗe RGPH-5 yaltini ɗee, hono wonde 53, 5% ɓesngu Senegaal ina nana wolofeeree, en potaani wiyde «… ɗemngal ngal keewal timmungal ɓesngu nanata ».
Waylude miijo mum ko hakilantaagal
Ceerno Muhammadul Muttaar Kan juumii nde o wallini Pr Sammba Juulde Caam tawi o yenanaaka so tawii miijo oon gorko waylaaki, sibu wonii duuɓi keewɗi deggondirɗi nde ndee winndannde bayyinaa (so tawii kay ina sellii Pr Sammba Juulde Caam winndii ko soofaa wolofeere, (ko neɗɗo laamu Pastef wiyi o wiyii koo). Ceerno Kan fotnoo ko ƴeewde so miijooji Pr Sammba Juulde Caam mbaylaaki, no o yiyrata aduna. Sabi waasde wiyde ko fuuyɓe tan ngoni ɓe mbaylotaako, njahden e miijo Patrick Ortet biyɗo « Waylude miijo mum ko mbaydi hakilantaagal. Heɗtaade jiyanɗe haaldiiɓe arta tawta ɗumen caggal nde heɓi haqiiqa ko yiyannde mum ndee wonnoo nde sellaano, ko huunde naftoore ».
Ko waawi heen wonde fof, oo Sammba Juulde Caam hiisiyanke dowrowo, waawataa juumde ad vitam aeternam (haa abada). He winndannde heewnde faayiida nde o bayyini ñalnde 28 mbooy (marsa) 2019 nder jaaynirgol « neneweb.com », kanko Sammba Juulde Caam gonnooɗo cukko-Hooreejo Sarɗirdu Ngenndi, o winndii o wiyi (ɗuum e geɗe goɗɗe), ko yowitii he ɗemɗe ngenndiije : « He leydi men, ina woodi ɗemɗe, ko he mayri tan kaaletee, wonaa banngeeji goɗɗi. Goodal majje he oo aduna jokkondiri ko he goodal majje he nder Senegaal. Mbele eɗen mbaawi, maa eɗen poti, jaɓde ɗeen ɗemɗe momtee he natal aduna ? Abada, so wonaa ɗuum, wonata ko warngo leñol ƴiiƴiiwo, kersiniingo. Wontata ko serwinde Senegaal e Senegaalnaaɓe. Ɗum noon, so eɗen caloo huunde he men ittee he aduna, mbele eɗen mbaawi jaɓde ndee huunde maa kuuje he men, karminee nguurndam dow leyɗe men ? Alaa, alaa ! Ndeke nguurden enen fof, njuɓɓidinen nguurdiigu men he nafoore men enen fof ».
O renndunoo ɗoon miijo ko e fasilante Sileymaani Bashirr Jaañ, biyɗo « Duɗe jaŋde Afiriknaaɓe poti ko wontude wertaango heew-ɗemɗe tawa ina yahda e dawrugol ɗemɗiyaŋkaagal cellungol, pawotoongol e doolnude mbaawka farayseere kam e naatnude ɗemɗe afiriknaaɓe nder tippudi jaŋde, mbele aɗe ngonta ɗemɗe gannde e tafngo ». Sabi, Pr Sileymaani Bashiir Jaañ e woɗɓe adiiɓe e wattindiiɓe mo « tiglito ko heew-ɗemɗiyaagal, kadi ko heew-ɗemɗiyaagal, haa abada ko heew-ɗemɗiyaagal nder tippudi men nehdi ».
Ɗum ina laaɓti, soklaani firo. O haalnoo ɗum ko he guurtingol « Journée de la Francophonie » (Ñalaande haal-farayseere). Duuɓi sappo (10) ko adii, he 2009, o bayyinii winndannde « wallitoore njuɓɓudi cañiindi ngam koɗdigal ».
Ñalnde 18 morso (suliyee) 2022, oo kohowo Maatamnaajo, hollitii kuutoragol ɗemɗe keewɗe nder Njuɓɓudi Laamu e tippudi nehdi Senegal (Nduttanoo-ɗee yeewtere hakkunde makko e jaayniyankooɓe* « Bes Bi »). Miijo Hooreejo Sammba Juulde Caam he saɗɗa ɗemɗe ngenndiije nder Sarɗirdu jilɓaani hay batte: « Nde ngon-mi to Sarɗirdu ndee, mi huuttoriima kala fartaŋŋe ngam haalde ko feewti heen. Kaaldu-mi ɗum ko yiɗde deeƴal hakkille e yarlitaare tawa ngoƴa heen nduumiika ko hisnude leydi am he bone ceerundal sabi eɗen njogii leƴƴi keewɗi potɗi hormeede naftorteeɗi. Hoto hay gooto ɗaɓɓu hoto goɗɗo won ko woni koo, sibu ɗuum ko ustude innama-aadee. Mo woni kala yo hormo mo woni kala nder hurum neɗɗaagal mum, ko hono ɗum diineeje tellinaaɗi e tawaaɗi njanngini en ». Oo hiisiyaŋke ŋanaa tonngi haala mum wiyi : « Yo wuur keew-ɗemɗiyaagal, daabaa dental e jokkere enɗam ngenndiire e afriknaare, e ruŋtaade koloñaal ngam kisal e deeƴal».
Ko ɓooyaani koo, he lewru duujal (mee) 2024, Hooreejo Sammba Juulde Caam haalii ko aldaa e jilɓere : « … so wonaa tawa ko miin juumi, mbeɗe sikki Senegaalnaaɓe heddiiɓe ɓee ina « tappila » e wolof, kono Wolofaaɓe ina ɗeŋii haalde ɗemɗe keddiiɗe ɗee. …Daliilu mum ko wemjeende, tee joomi mum bayyintaa ɗuum… Ndeke noon, holi no njettorto-ɗen dente dawrugol e faggudu he Afirik, so tawii mo woni kala ina ɗeŋoo reende, tawa ko he baawal e hakilantaagal, keewal ɗemɗe men e leƴƴi men, yiyloo yaaɓande yiɗde moɗde heddiiɓe ko wartaare ? ». A yettaama Pr ! Junngo maa fuuɗaama, seydi Caam !
Keewal ɗemɗe nder leydi ko ngalu
Ceero Muhamadul Muttaar Kan jokki wiyi « Yiɗde ndee wonaa nuskude ɗemɗe keddiiɗe, he miijo men ɗemɗe fof poti horma. Njaggu-ɗen ko ɗemɗe fof njerondiri. Fotde men ko ɓamtude ɗe e ƴellitde ɗe gila he nder ngenndi men haa he tolno hakkunde-leyɗe. Suɓaade wolofeere ko fawaade he ngonka ɗemɗiyaagal e hakilantaagal to bannge kuccam …, gahgah Senegaal, wolofeere ina haalee Gambi e Muritani, e seeɗa to Gineeji ɗiɗi ɗii e Mali ».
Hoto kulol reedu heɓto ma, Muhammadul Muttaar Kan ! Njaɓee onon e hono mon en, njogani-ɗon ɗemɗe ngenndiije Senegaal tan ko kutuya, so wonaa wolofeere. Laato-ɗee goonganteeɓe, ndartinon jaggirde min ko min ngonaa ; ko min ngoɗɗi nii wonde !
Goonga noon ɗemɗe fof poti horma fawaade e binndanɗe doosɗe men. Kono to ciynugol, laamuuji deggondirɗi ɗii fof, gila jeytaare Afirik 1960, pawii wolofeere dow ɗemɗe keddiiɗe keɓtinaaɗe ɗee. Ɗuum, hay jibidinaaɓe e pahɗugol kam e muumndam e ngumndam, ina nganndi ɗum !
Goonga noon ɗemɗe fof poti. Ndeen noon pamminee min hoto fawii nder jeewte RTS, noogaas-e-jeegom yeewtere ko he wolofeere, ɗo ɗemɗe keddiiɗe ndokkaa gootal fof yeewtere wootere, gila aaɓnde (altine) haa mawnde (aljumaa) ; ko wolofeere tan huutortee he kaalanɗe Hooreejo ; ko wolofeere e farayseere e engeleere tan kuutortee to Kaggu Piirooje (boowal diwooje) Blaise Jaañ, to TER, he Dental ngenndiwal piirooje Air Sénégal ; wolofeere e farayseere to BRT inniraaɗo « SUÑU BRT » ; wolofeere to Dakar-Dem-Dikk ; eɓɓaaɗe laamu jogii ko inɗe he wolofeere, kam e nokkuuji toɗɗaaɗi, he geɗe njuɓɓudi-laamu, e Pelle denndaaɗe, ekn.
Goonga ɗemɗe fof poti horma. Paamnee ndeen noon holi laawol pawi-ɗaa, aan Ceerno Muhammadul Muttaar Kan, haa mbiyaa yontii nde wolofeere ɓamtatee haa wonta « ɗemngal laawɗinaangal punewal farayseere », wona ɗemngal kuutorteengal nder njuɓɓudi laamu ?
Alaa, Ceerno Kan, wolofeere haaletee tan ko Senegaal e Gammbi e worgo Muritani, kono wonaa kay Mali e Gineeji ɗiɗi ɗii. Haalooɓe wolofeere Mali ɓee e Gineeji ɓee ko Senegaalnaaɓe uujɓe toon.
Ceerno Muhammadul Muttaar Kan dey wonaa majjuɗo pulaar ina haalee nder leyɗe ko wonaa Senegaal tan (ɗo haalooɓe neeniwal ngal ɓuri), angal yaaji nder Gammbi, he Muritani, he Gineeji ɗiɗi ɗii, he Mali, he Nijeer, he Niijeriya, haa he Burkina Faso, Kodduwaar, Liberiya, Siyeera Lewoon, Capo Werde, Gaana, Togo, Benin, Kameruun, Santarafirik (RCA), Caad, Sudaan, seeɗa he nder Aljeri, to Keer, he to Ecopi ! Yerondir ɗum, Ceerno Kan, ƴeewaa so tawii ko gootum !
Ndeke, cuɓagol ɗemngal fawotoo ko e « dallilaaji memotooɗi ngonka ɗemngal e hakilantaagal to kuccam », so en tuugniima e ɗuum, Ceerno Kan e yahdiiɓe mum ina ŋakkiraa kaa ngonka e ngal hakilantaagal ! Ndefto-ɗen mbiyen, ɓe pulaar fof e heewde ɓe woni ɗemngal mum en neeniwal nder Senegaal, kanngal kadi ɓuri feewnitanaade naatnaattondiral Afirik, sibu ngal haaleede nder ko ina wona noogaas e tati (23) leydi, ɗoon ɗo wolofeere haalatee nder leyɗe tati (03) tan ; hay nih to bannge Karalle e Kabri kese, kam e Kumpital.
To kuccam ko españoleere, e aarabeere e pulaar
« He duuɓi teemedere (hemere) ɓennuɗi ɗii, almañeere jaalinoo nder aduna to bannge « gannde siyaas », farayseere heedi bannge jokkondiral hakkunde leyɗe. Hannde oo ko yonta engeleere e manndariire (ɗemngal Siin). Yonta maa ar ko españoleere e aarabeere e pulaar. Holi to fawii noon eɗen kaɗa koye men feewnitanaade ɗee geɗe garooje …»
« Nde wojere ƴoƴi ndee, fayi ko ladde ! Ndeen noon anndu a famɗirii wiyde aɗa fuunta min, Kan yel !»
Goonga oo ko kala ɗemngal ngal yaajnaaki deestoto, ngal ɓelsa huunde he nafooje maggal to bannge kumpital, so tawii ngal siyniraaka he geɗe nguurndam ñalnde kala, so tawii to bannge faggudu ngal alaa ngartam. Ina anndaa : soobulee so juutii, ko geɗe bonɗe addanta innama aadee, ɗoon ɗo caragol ɗemɗe wonata kuutorgal winndere. Miijiyaŋkooɓe njeewtii tigi rigi he ndee yiyannde, haa ɓe tonngi so pinal naattinaama he pinal goɗngal, ɗemngal mum waɗtinta ko ñifde. Ko he ɗuum yiɗaa rewnude min. Min mbiyii loppet ! Min mbiyii alaa he ɗii kulhuli goodaangal amen sabu renndinde ɗemɗe fof waɗta gootal ! Yo wolofeere fad !
Mumtugol ɗee ɗemɗe yo woƴ en no woƴiri ciiri kullon e puɗi. So eɗen njaɓi he kuuɓal keewal pine ko sarɗi ngam ƴellitaare neɗɗo, ndeke noon reende keewal ɗemɗe ko huunde himmunde, sibu ɗemɗe binndaanɗe jangtaaɗe ko kam en ngoni daabaa pine.
Min paɓɓittaa kuutoragol pulaar. Maa min kuutoro ñalnde kala ɗemngal amen, etee amin mbasiyoo laamiiɓe Senegaal yo tottu min ko Doosɗe Ndenndaandi ndokki min koo. Min nanii he ko yowitii e ɗemɗe ngenndiije, wonii jaɓɓe daarol Babel, wiyde keewal ɗemɗe ko malkisu « ngu Geno fawi e yimɓe ngam kuugal ɓurteende winndere », ko huunde moƴƴere ummoriinde to Jaafotooɗo, Jarlotooɗo Kuɓtodinɗo. Ɗum fof ina woɗɗi goongɗude. Renndo ngo ɗemngal gootal heewi wonde ko sewnde caɗeele e ŋurtu-ŋurtu.
Sikke alaa yoga he boneeli baɗaaɗi he aduna hee haa hannde, hono warngo Yahuud en haa warngooji to Rwannda, ina jeyaa e ko jibini ɗum en, kutuya won ɓeen njoganii heddiiɓe ɓee. Warngooji baɗaaɗi to Kambodjiya e Wiyetnaam e Yugoslawiya e Irlannda Rewo, e sara men to Rwannda, to Burunndi, to Kodduwaar, ina hesɗi haa jooni he hakkillaaji. Leyɗe keewɗe ganndiraaɗe ɓamtude ɗemngal gootal, nguurii kareeli leƴƴi (yo Allahu Ta aalaa reen en he ɗuum); ɗemngal woni jeloode renndo. Maa en keɓ raay so en njanngirii naftoore ɗii humpitooji.
Senegaalnaaɓe kala ndenndi ngalu Senegaal fof
«…Eɗen nangtii he ɗemɗe men tawa eɗen kujjinoo to jaayɗe e binndanɗe men ngam semmbinde keewal ɗemɗe e pine gila he nder leydi hee haa he nder winndere nde …ko keewal jibinta coftal pinal he leydi hee, so tawii kay teskaama he nokkuuji ».
He dow luulndaade ko Ceerno Muhammadul Muttaar Kan e yahdiiɓe mum ko mbiyata ina ndaranoo koo, Dowla Senegaal waɗii peeje kala mbele wolofeere ina laatoo ɗemngal gollorgal nder tuugnorɗe nehdi, e jaayɗe e dingire denndaaɗe, he kuutoragol dañe Senegaal fof, dañe leƴƴi Senegaalnaaɓe kala.
Min ɓooyii salaade e wiyde ko e ceede Senegaalnaaɓe fof « Maison de la Presse » (Galle Jaaynde) mahaa hakkunde 2007 e 2012, ko heen kadi ballal jaaynde fotde 1 400 000 000 FCFA rokkaa haa waɗtaa he jolal (nowambar) 2023, 1 900 000 000 FCFA. Ko he innde Senegaalnaaɓe fof ñamaale Senegaal fotde miliyaruuji 40 e ñamaale pelle fotde miliyaruuji 30 (fof wona miliyaruuji 70) mumtaa haa laaɓi he lewru mbooy (marsa) 2024. Ko he pellital Hooreejo Maki Sal, ustude kubbe pawanooɗe e rajooji e telewisoŋaaji tolninooɗe e 1 000 000 FCFA, ngustaa, mbaɗtaa 500 000 FCFA, ekn.
Wonaa ceede banndiraaɓe men leñol Wolof en tan RTS sosaa etee terɗe mum mbaawi yoɓeede gila sosaa haa e ñallunge ngee ! Ko noon ne kadi wonaa ceede leñol Wolof en tan gallorde RTS hesere ndee mahiraa fotde 33 865 000 000 de FCFA. Wonaa e innde Wolof en tan ne kay ɓe ndokkaa galleeji koɗki to Jamñaaƴe e saraaji Kees, ekn !
Ceerno Muhammadul Muttaar ina anndi min ndaranii ko keewal ɗemɗe gila he duuɓi. Kono hay gooto jaɓaani heɗtaade min e kaan haala mbaawka ɗowde he laawol peewal to bannge dawrugol ɗemɗe timmungol. Ina woodi he ndii leydi sete yimɓe daraniiɓe ɗemngal gootal, wiyooɓe nih yo wolofeere waawne so jojjii. Ina he ɓee Hooreejo Makki Sal e Jaagorgal hannde Kumpital Aliw Sal, karallo to kumpital, yantude e wiɗtiyanke winndiyanke Muhammadul Muttaar Kan, e jaayndiyankooɓe Pap Sammba Kan e Abdu Salaam Kan e wayɓe no Aamadu Elimaan Kan en.
Kala leydi yoo waawnu ɗemngal gootal
He winndannde bayyinaande he jaaynirgol Le Quotidien ñalɗi 07 e 08 Colte (fabiriyee) 2015 nde tiitoonde « Cheikh Anta Diop, un bâtisseur : Un Etat fédéral, un des leviers de la renaissance africaine». Aamadu Elimaan Kan sakkiti yoo laamuuji leyɗe Afirik mbaawnu ɗemngal gootal cikkangal ko kam jogii keewal. He wiyde mo «ngootaagu ɗemɗe rewata tawo ko mumtude ɗemɗe ɓuraaɗe keeweendi e waawnude ɗemngal gootal . He miijo makko, wonan’de Senegaal « ɗemngal wolofeere foti ko waawneede dow leñƴi leydi ndii kala, lomtoo farayseere ».
Keɗo-ɗen kadi Hooreejo Sammba Juulde Caam nder dallinannde mum wonan’de tabitino keewal ɗemɗe naamndii he miijo makko (ngo kormi-ɗen) ko « hakilantaagal, e ƴoyre, e seese haa saroo nder sappooji kitaale. Kono wonata siynude kuccam, woni keewal ɗemɗe, woni marde so famɗii ɗemɗe tati wonan’de kala almuudo gaynoowo daawal gadanal. Firo ɗuum wonan’de leydi Senegaal : so famɗii ɗemɗe ɗiɗi ngenndiije njanta e farayseere ».
Ndeke, laawol goɗngol kadi, wonan’de Pr Sammba Juulde Caam, ko keewal ɗemɗe so famɗii ɗemɗe tati (ɗemɗe ɗiɗi ngenndiije njanta e farayseere) waɗɗii.
Innitde sahre Saint-Louis (Senluwi) : Yedditaare jokolɓe Saint-Louis
« Nde Pastef heɓi laamu, yaakaare ina huɓtodinnoo ngam yettinde ngol laawol (ndlr : Ceerno Jaagorgal Garwaniwal Usmaan Sonko wiyiino ina yiɗi waylude inɗe laabi wuro Cikisoor joginooɗi inɗe koloñaal). Eɗen teskoo yonta jooni Senegaalnaaɓe ina mari yiɗde jeytude donaaɗi men… Mbeɗe yiya ɗum he salaare sukaaɓe jokolɓe Saint-Louis nde sehre Faidherbe ndee artirtee he digniral Baya Ndar ».
Minen ne kay, amin ngoongɗini, oo Louis Léon César Faidherbe gonnooɗo « guwerneer » Senegal laabi ɗiɗi (hakkunde 1854 e 1861 e hakkunde 1863 e 1865), joɗnde sehre mum fotaani wonde Saint-Louis, fotaa nih wonde hay nokku gooto he Senegaal, fotaani wonde hay he Afirik he kuuɓal ! Yo Hooreejo Emmanuel Macron aran sehre Seneraal mumen baɗboniijo, mo ngañgu mum he Sheek Alhajji Umar Taal e kala dartinooɓe koloñaal, yerondiri e aybeende mum kam e nguyka ngaluuji men.
Yo o woɗɗin en haa abada sehre oo ƴiiƴiijo, binndunooɗo yumma mum ɓataake he korse (suwee) 1851 e tuma mo o wonoo Alseri, omo wasoo bonandeeji ɗi o waɗiri juuɗe makko, biyɗe cebek ƴiiyam: « Mi firtii haa memi leydi gurel ngel teemedde ɗiɗi galle e nammbeeji mum. Ɗum hulɓini hoɗnooɓe heen ɓee haa ngari nii hannde jebbilanaade min ».
Yo o aran ndee sehre ngel ɗeɗɗel añamleñamel binndungel he 1859 wiyi «Ɓaleeɓe ko koninkooɓe timmuɓe, sibu ɓe njiyataa kasaare, kadi tippudi ngaanndi maɓɓe timmaani » ; o fawti heen o wiyi « lesɗiyaagal maɓɓe fawii, sikke alaa, ko he yuɓɓo ngaanndi maɓɓe famɗundi ».
Yo o ar, o woɗɗina leydi men e doŋre men oo taƴoowo duppunooɗo gure men, wujji jeyi men, yani e ɓiyɓe men rewɓe. O dahiino suka debbo ina wiyee Joŋkunnda Siidibe mo duuɓi 15, mo o waɗtunoo korgel-pijirgel-giɗtirgel tuuyo makko. Guwerneer dewɗo e makko oo ne, jaggi suka debbo pullo biyetenooɗo Mayram (mo o inniti Marie), waɗti ɗum dakmitorgel mum, nawori ɗum nii haa Farayse, wiyi ko korgel mum !
He deftere makko nde tiitoonde « Essai sur la langue Poul et comparaison de cette langue avec le Wolof, les Idiomes sérères et les autres langues du Soudan occidental », Louis Léon César Faidherbe wiyii « Pularal ina wiya so a naatnii debbo pullo nder galle maa, hay sinno ko mbinndaan, o wontat gardiiɗo galle ».
Yo Faraysenaaɓe ngar ittana men ndee sehre oo barhooro, ƴiiƴiijo caɗtuɗo, caabiiɗo geɗe ɓurɗe bonde, « joftoriiɗo » teemedde sabu neɗɗo gooto, duppuɗo gure keewɗe sabu gooto he yimɓe mum en waɗii ko haanaani (wonande mo) !
Yo Farayse ar nawa batte oo gorko jooɓiiɗo sahodinɓe men, lelnuɗo ngañgu feewde e dartiiɓe koloñaal Farayse, teeŋti e Fulɓe/Tekuruurnaaɓe ɓe o jaggirnoo ko añɓe koloñaal Farayse, o duñi leƴƴi goɗɗi nde ngañata ɓe caggal nde o wiyi: « Wonande leƴƴi ɗi kalfu-ɗen ɗii fof, ina heen leñol ngol jaɓataa muk e aduna njiimaandi men. Etee ngool leñol ina sarii nder diiwe kalfu-ɗen ɗee kala. Ina heñoraa sibu goodal men nder Afirik nde ceerndaten ɓe, mbaɗten leƴƴi goɗɗi ɓurɓe jaɓan’de en ɗii añɓe maɓɓe. Sabi ñalnde kala Fulɓe ndenti, aɓe kattani moññude semmbe koloñaal dariiɗe e jeese maɓɓe, mbiyi ina paloo ɓe no potirnoo ».
Ndeke noon kala ko ina woɗɗina en oo gorko battamboniijo balwaltinɗo ƴiiƴe jaambureeɓe, uujnuɗo yimɓe heewɓe nder Senegaal e nder Afirik, ko huunde moƴƴere ! Ina hersinii gaa yiyde sehre makko nder nehaande Get-Ndar, gootal e leeɗe ɓurɗe lollude, tawi ina winndaa les natal makko : « Feewde e guwerneer Louis Faidherbe, mo Senegaal yejjittaa ».
Yo lomtine ɗoon mahateeri (so tawii ɗuum luulndaaki Lislaam) he teddungal Sheek Alhajji Umar Taal, walla mahateeri (he nder mum wejee ko wayi no silaama oo waliyyu, mo koloñaal Farayse tottiti), darnee ɗo nokku « Place Baya-Ndar » ɗoo !
Hay gurwernuuji (hono Louis Léon César Faidherbe, Kolonel Louis ARCHINARD, Yves-Jean Saint-Martin, Eugène MAGE, Jules BELIN de LAUNAY, Robert CORNEVIN, ekn.), ina ceeɗtii ko Alhajji Umar e almuɓɓe mum Fulɓe/Tekuruurnaaɓe e kuuɓal laatinoo añɓe Faidherbe e wondiiɓe mum (Nduttano-ɗee to Jaabawol am feewde e Aamadu Bakaw Jaw, winndannde bayyinaande he SenePlus ñalnde 22 morso (suliyee) 2024).
Ndeke ina haani nde sehre oo waliyyu lomtotoo ngal guwerneeryal koloñaal ɗo « Place Baya-Ndar » ɗoo. Ɓayri kay ko wiyetenoo « Lycée Faidherbe de Saint-Louis » inniraama waliyyu Halwaar e Bannjagara. Hay nih Sala Faidherbe (“Pont Faidherbe”) foti ko inniteede inniree « Poŋ Sheek Alhajji Umar Taal »!
Gonnooɗo Saint-Louis mo Farayse
«…To bannge goɗɗo, innde Saint-Louis foti ko inniteede ruttinee he donaaɗi : Ndar…». Ina moƴƴi ciftinen holi gonnooɗo Saint Louis inniraaɗo wuro ngoo oo, mbele Senegaalnaaɓe ina paama, njaɓa ɗum tawa ko e ganndal tuugnii. So en tuugniima he ko Wikipédia haali, Louis 9ɓo, lollirɗo « le Prudhomme » ina wiyetenoo kadi Saint Louis. O wonnoo ko laamɗo Farayse. O laamiima Farayse kitaale 43. Katolik en piili mo walliyuu he 1297.
Kanko woni laamɗo 9ɓo Farayse, ummiiɗo he lefol « Carpétiens » en. Kanko wonnoo ɓiyɗo nayaɓo laamɗo Louis 8ɓo lollirɗo « le Roin Lion », yumma makko ko Blanche de Castille. Ko yumma makko nehi mo nehdi tiisndi pawiindi e diine gila ko o suka. Nde baaba makko maayi, o yahratnoo tan ko duuɓi 12. O fiilaa laamɗo ñalnde 12 jolal (nowambar) 1226, kono ko yumma makko laamii hade makko hellifeede.
Nder kareeli makko, o tawtoraama golwole katolik en nde ɓe kaɓata e leyɗe Juulɓe, woni golwole ganndiraaɗe “Les Croisades”. Saint Louis ko laamɗo annasaarayaŋke, kaɓnooɗo e juulɓe tuggi hitaande 1248 haa heɓi 1254. Fayndaare makko he ndeen hare ko jiimde Misra e Kuds. He 1270 kadi o haɓiino e Sultaan Mamluk Baybars mo Turkiya. Ko ndeen konu makko teeri Kartaaja (Tuunus), piɗtaali fotde 15 000 koninkooɓe makko keddii heen caggal nde ndogu reedu fiyi ɗum en. Tigi, ko ɗoon juulɓe pooli ɓe, ñabbuuli njokkiti heddinooɓe ɓee. Ko ɗoo golwole Katolik en feewde e juulɓe ñifi. Ko oo dey wuro Seŋ-Liwis inniraa.
Ndar ko Nderi Soh
Ko goonga ko en Juulɓe; ndeen noon ko en ɓe Saint-Louis haɓinoo Diine mumen. Kono ɗum fof e wayde noon, haɗataa en seedtaade won e geɗe moƴƴe, jerondirɗe e ko Lislaam yamiri ɗe o waɗatnoo, etee ɗe o daraninoo laŋ. Eɗen mbaawi limtude he ɗeen geɗe lislaamyankooje ko wayi no teddingol makko ñaawooje pawiiɗe e goonga, laamu udditiingu (ko roŋkaa e yoga e laamɓe juulɓe haŋki haa nii eɓe hannde ɓee). Ko oo dey woni Saint Louis, mo laamorgo adanngo Senegaal inniraa oo !
So tawii noon yiɗaa ko innitde Saint Louis, yo rutte e innde cosɗo wuro ngoo oo: Nderi Soh (wonaa Ndar) ! Tigi, innde cosɗo wuro anndiraango Saint Louis ngoo, ko Nderi Soh ! Ahaa kay, aan Muhammadul Muttaar Kan, aan Ceerno Karallo he kumpital, ɗowoowo denndaaɗo « Cabinet » KNG Consulting, Biɗtoowo pinal juulɓe e jokkondire hakkunde leyɗe, winndiyaŋke, anndu ko Nderi Soh sosi wuro Ndar (ko innde makko waylaa ɗoon), hade mum wontoyde Saint Louis mo Senegaal !
So tawii noon alaa e sago Saint Louis innitee, hoto haaɗ ɗoon tan. Yo laabi e nokkuuji keewɗi gonɗi he nder Ndakaaru e nokkuuji goɗɗi inniraaɗi yimɓe ɓe Louis 9ɓo hono Saint-Louis ɓurnoo fof nuunɗude kam e hulde Geno ne innite. Wonande inɗe gonɗe he wuro Ndakaaru, min njiɗi wiyde ko : Faidherbe, Escarfait, Pinet Laprade, Maurice Delafosse, Gambetta, Blanchot, Léon Delmas, Carnot, Adrian, Alfred Goux, André Lebon, Aristide Le Dantec, Armand, Berenger, Berthe Maubert, Bouflers, Braconnier, Belfort, Emile Zola, Franklin Roosevelt, Charles de Gaulle, Jean Jaurès, Jacques Bugnicourt, Jules Ferry, Jean 13ɓo, Léo Frobenius, Malenfant, Mangin, Monteil, Noel Balley, Petersen, André Peytavin, Washington, Parchappe, Parent, Paul Holle, Pierre Martin, Rocade Fann Bel-Air, René Caillé, Robert Bru Valmy, Victor Hugo, Félix Faure, ekn.
Ɗum noon noddi ko lelnude goomu keeriingu, ngam innitde laabi, nokkuuji, leeɗe e gure, goomu njaambureewu, nuunɗungu, njaajngu, ngu jiidataa e goomu cosanoongu yo toppito Daartol Kuuɓtodinngol Senegaal : gila to iwdi haa hannde.
Defterdu pulaar ina alɗi
«…mbeɗe faami ɗum rewrude he binndannɗe winndiyankooɓe ŋanaa hono Bubakar Boris Joob en e Sheek Aliw Ndaw en, bayyinɓe defte he wolofeere. Winndiyankooɓe jeyaaɓe he annduɓe faamɓe kuccam e caɗe payaaɗe ».
Hasiima kadi siftinde defterdu pulaar ina alɗiri ko ina tolnoo e defte ujune sappo (10 000) binndaaɗe kañum en kala he pulaar, ɗe winndiyaŋkooɓe Fulɓe Senegaal e Muritani tan mbinndi. Hah goree ! Ma a taw nii winndiyanke Muhammadul Muttaar Kan añii Fulɓe haa ronkiti jaɓde ɓeen ina kattani bayyinde he pulaar ? Holi bone bonɗo ɓiliiɗo hakkunde oo gorko e Fulɓe jibinɓe mo etee nehi mo ?
Ƴeewto-ɗee koye mon onon fof, gila kelle ko law, mbaason laataade moojobenkooɓe ɗee golle seytanaayaagal e warngo yarngo-colel pawangal he ngol leñol, mi wiya ndii Ngenndi Fulɓe ngol ummi-ɗon he mum !
Ndakaaru ñalnde 20 juko (ut) 2024, Alhajji Buubu Senngoot, Hoyreejo Kawtal Pelle Fulɓe, (Collectif d’Associations de Fulɓe)
