Ndeen noon wadde, porfesoor, njetten Alla, njetten wallunooɓe en haa cosi Fedde Ɓamtaare Pulaar e Fedde Ɓamtoore Pulaar, pelle puneeje jibidinaaɗe e Batu Mbaañ, potnoongu waɗeede Tebegut.
Ɗee pelle ɗiɗi, cosegol mumen jibinanii en ngartam mawɗam, haa leƴƴi keewɗi ɗuhii e barke majje.
E yaawde ummanaade ndeen hare law, haa laamuuji ɗii tawti ɗe heen, ndarni gollorɗi ina liggoo heen. Hay so njiɗaano, ɗi njaɓtori.
E ñallaangal hannde Fedde Ɓamtaare Pulaar Muritani ina e jam mum, ina liggoo katpat, e gardogol Mawɗo Bookara Aamadu BAH, e yiilirde mum tiiɗnde, golloore jamma e ñalawma e ɓamtaare ɗemngal. Ko noon ne kadi njettirten sagataaɓe wiɗtiyankooɓe, winndiyankooɓe, heblooɓe heblooɓe haa yettani maa Duɗal Ɓamtaare e Jaŋde Ɗemɗe Ngenndiije kesal ngal, ngal koroowo DEH woni cukko Hooreejo mum, ONEL, fedde daraniinde heɓtineede HAALWOLOSOYINKAAGAL, wonaa fedde yejjitteende e calogol mum yooleede ɗemɗe men, mi joofnira fedde am, baafal njamndi, Goomu Fulo e Wiɗto (GFW), yettinnde ɗemngal pulaar e wiɗtooji loowɗi jaŋde Duɗe Jaaɓi-Haaɗtirde.
Mawɓe men sukiti-bawɗi en darodiiɓe e men, ɓe njaɓaani fooftaade, ina kaani rutteede njettoor, ina jeyaa e maɓɓe, Mawɗo Suleymaani KAN e Mawɗo Aamadu Umar JAH, dariiɓe laŋ haa Duɗal Ɗemɗe Ngenndiije gollii golle daarteteeɗe e ɓamtaare ngenndiije e fannu janngiyankaagal… Mo limti fof juuma, kono pelle goɗɗe nokkuɗe jeyngol e FƁPM, inani toon liggoo jamma e ñalawma.
So goonga, eɗen kaani yettude darnde ɗee pelle, potnduɗe e ɓamtaare pulaar kasoo e kasanka, ɗeɗɗeede e ɗeeɗeede fof, hono no Jooburu Kunndaa, gorko mo Cilbee Mbaañ Sammba woownoo wiyrude ɗum nii.
Fedde Ɓamtoore Pulaar Senegaal gollii ko heewi, ko maantinii, gila nde nde sosaa, e kitaale gadane jeytaare haa yettani maa 1996, tuma nde hareeji ndernderiiji ngardiigu e kinɗam hinndemaagu porñinta nde. Nde dañii fartaŋŋe waɗde heblooji toowɗi ɗo Duɗal Ceerno Sileymaani tuggi 1978 haa caggal kitaale 1990.
Ko yaltuɓe e ɗiin heblooji tammbii ɗemngal ngal e nder eɓɓooje laamuyankooje, gollorɗe laamuyankooje, Pelle ɗe ngonaa laamuyankooje (PIP, ARED), pelle pine, e nder peŋɗe e cate fedde ndee.
Tuma nde hareeji ndernderiiji naati e nder fedde ndee, leydi Senegaal dañii fartaŋŋe jaɓɓaade Jooburu Kunndaa e kitaale 1986, e kitaale 1993 haa 1999, ko adii nde o majjirta winndere ndee melew.
Ko ɗam ɗoo ngartam darnde fedde men ndee jibini ngartam ndañaɗam e leydi ndii tawi wonaa ko ummorii to bannge laamu. Laamu nguu nii, nde felliti daranaade ɗemɗe ngenndiije herƴin golle fedde ndee, heli muumaa mum, nde woni e haɓtude e hoore mayre, e naatirɗe kitaale 1996, e nder kitaale Eɓɓoore PAPA e PAPF.
Ina haannoo eɓɓooje bayɗe noon so ngarii tawa ina ndiisnondira e fedde ndee, teeŋtina darnde mum, mballita ɗum e heblooji toowɗi, e ngalu. Fedde ndee wona fedde wallondirteende, diisnondirteende.
FƁP Senegaal ɓeydii kadi losde tuma nde Tabital Pulaagu darnaa e naatirɗe kitaale 2000, ko ɗoo nde maayi pak, nde ubbaa, sabu naattineede nde e fedde nde suwaa tawo gollaade hay huunde.
Gila ndeen feewde ñallaangal hannde, ñande kala e Alla FƁPS ina ɓeydoo mutde feewde njeeɗaɓiiri. Bandam en, hol to koninkooɓe sagataaɓe leñol tiiɗɓe fellitɓe faabaade ndee fedde ngoni, ngara ngitta nde e takke Tabital Pulaagu (TP) ngoni ? Hono no Muritani seerndiri pelle ɗiɗi ɗee nii, Senegaal ne, fedde heen fof ina foti heɓde ndimaagu mum, ɗo neɗɗo yiɗi heen liggaade fof winndoyoo toon.
Kono tiifondirde ɗe waɗta ɗe fedde wootere ko famɗude faamaamuya to bannge ɓamtaare ɗemngal e leñol, e famɗude humpito e hare pine.
Musidɓe tedduɓe, ngol ɗoo taartaarol ngol mbaɗ-ɗen e ɓamtaare ɗemngal pulaar e ko FƁP liggii heen koo, eɗen njoortii ma ngol duttorgol mawngol to bannge siftinde golle paayodinɗe ɗe leñol gollanii hoore mum to bannge daranaade jaŋde e pinal e bannge Muritani e Senegaal.
Yoo wuur pulaar, wuura kala daraniiɓe ɓamtaare mum.
Pooye Pelle Pulaar kuɓɓii hoto docotte ŋakku !
Kuɗol : Aamadu Tijjaani KAN, winndiyanke, wiɗtiyanke, kebloowo heblooɓe.
