Hol baawɗo miijaade laana ka neɗɗo feewni ine waawi buñcinaade nder weeyo Naange wulngo ngoo, ɗo hay masiŋ gooto meeɗaa yahde. Ɗuum nattii miijo, laatiima goonga sibu ɓeeynirka Parker Solaar Probe kaa waɗii ɗuum.
Ñalnde 19 suwee 2025, ɓeeynirka mbiyeteeka Parker Solar weeyii laawol 24ɓol dow Naange, tawi alaa ko ɓilii hakkunde mum en so wonaa 6,2 miliyoŋ kiloomeeteer. Kanka tan woni masiŋ mo neɗɗo feewni, meeɗɗo ɓalloraade nii Naange. Ɗuum ine jeyanoo e paandaale ka neldiranoo toon, mbele ka ɓalloo naange ɗo ɓuri ɓadaade tawa ka taayaani, kaɓirɗe makka mbonaani. Kono haɗataa ma ka jokku sunnaade weeyo e yirlaade haa hitaande 2026, ka nelda en njeñtudi wiɗto ka waɗi toon.
Kono ine jari naamnaade hol no ka daɗiri e nguleeki ? Daɗndi ka ko warwarde (heɗɗaawo) nguufa ƴulɓere (karbon) ka muuraa kaa : warwarde waawnde muñde hakkunde 870°C e 930°C (degere Selsis) ! Kadi, e oon mudda, denndaangal kaɓirɗe laana kaa ine ngollina koye mum en (mode autonome) ngam roɓindaade geɗe kimmuɗe sibu, e oon sahaa, tawi ka taƴondirii e Ngaawe (Leydi).
Njaaweeki kural
Nde Parker weeyata dow Naange ndee, aka doga njaaweendi kulɓiniindi, sibu ndi yettiima 687 000 km/waktu, njaaweendi njerondirndi e waɗde leƴƴanɗe 30 fat hakkunde Pari e New York ! Gooto e aasiñoreeɓe NASA wiyi : “ɗum wayi ko no taccude wuubiliiru ɓoljam tawi e oon sahaa gooto ine ƴetta nate ujunereɓal leƴƴannde”.
Hol nafoore ɗum ɗoo fof ?
Ine jeyaa e nafooje ɗanngal Parker Solar Probe saraaji Naange :
- 1. Waawde tijjaade fitinaaji Naange bayɗi no kaanabbe naange nde tawnoo aɗa mbaawi bonnude jowitiiɗe (satelitaaji) walla yerɓinde laylayti yiite (kuraa) dow Ngaawe ;
- 2. Reende (hisnude) weeyooɓe : hisnude ɗanle weeyo faade Lewru e Mbaañ garooje ;
- 3. Faamde nguurndam Naange : Parker maa sunno Naange e gooto e muddaaji mum teeŋtuɗi yirlannde mum duuɓi 11.
Kono ɓuri yooɗde heen fof, ko ɓeeynirka kaa ƴettii nate ɗo puccitte naange pelɓondirta. Geɗe ɗe tijjotaako, baawɗe ɓeydude guubiliiji sulɗe leydiwi (tempêtes géomagnétiques).
Kono ine waɗi geɗe ɗe cuwaaka tawo faameede. Ine jeyaa heen ko inniraa “switchbacks”, hono huunde nanndunde e bempeƴƴe sulɗaande, diwooje nder keneeli naange. Parker yiytii ɗe njibintee ko he dow huurngo Naange, no “cerɗi” birniiɗi, cirƴooji pecore.
Nde ɓeeynirka Parker Solar Probe ƴeewtaa e lewru suwee (korse), tawaa ine selli ine wiyi weŋ, tee ine jokki ɗanngal mum tawi ɓooyataa Naange naata daawal mum deeƴre. Ɗoon ne kadi ko fartaŋŋe sunnaade hoodere men, haa faama geɗe mayre so nde deeƴii.
NASA saaktii e balɗe cakkitiiɗe ɗee nder Youtube, nate Naange ɗe ɓeeynirka Parker ƴettunoo nde wirtii sara mum ɗoo, nate keewɗe nafoore e wiyde annduɓe ɓee. Ɗeen nate ine kollita puccitte ɓoljam pawondirɗe, wuubiliiru naange laaɓtundu ummoriindu e weeyo boowal mum… Nate ɗee ƴettaa ko e deesto 6,1 miliyoŋ kiloomeeteer.
Ciftinen, NASA lottunoo ɓeeynirka “Parker Solar” ko alet 12 ut 2018, ngam etaade taccude weeyo naange. Ko ndeen wonnoo go’o ko kaɓirgal ngal aadee tafi, etoytoo taccude weeyo naange. Ɓeeynirka Parker foti ko e oto tokooso, njaru donngal makka ko miliyaar e feccere dolaar.Ko ndeen aadee keɓi humpito e karallaagal tafde huunde waawnde ɓadaade Naange tawa ina hisa e nguleeki ɓurtuki, sibu weeyo naange ɓuri naange ngee e hoore mum wulde fotde laabi 300. Ka taƴananoo ko taccude weeyo naange ngoo fotde laabi 24 e nder duuɓi 7.
Faandaare ndee ko etaade faamde hol ko saabii huurgo Naange ngoo, ɓurde naange ngee e hoore mum wulde fotde laabi 300, e hol ko waɗi pecoron mum (particules) semmbe ina caaboo duleeɗi yiitesulɗeeji (électromagnétiques) baawɗi haljinde gollagol yiite dow Leydi men ndii.
Parker Solar Probe (woni innde ɓeeynorka kaa e Engele) ina saawi kaɓirɗe 4.
- Kaɓirgal biyeteengal FIELDS ngam jaabaade « naamnal ɓuttal » : « hol ko wulnata meetelol (kuurhuurngal) Naange ngal ? » haa ko ina ɓura Naange ngee e hoore mum wulde. Ngalɗoo kuurhuurngal keedngal dow fof (ɓurngal woɗɗude Naange ngee), ngal miliyoŋaaji miliyoŋaaji kiloomeeteer tekkeendi, nguleeki mum ɓurii miliyoŋ daawannde (degere Selsus), tawi noon nguleeki dow naange ngee ko hedde 6 000°C. Huunde haawniinde, sibu, e ko aadoraa, so a woɗɗitiima sewnde nguleeki, nguleeki kii foti ko ustaade, kono to Naange, aɗa ɓeydoo woɗɗitaade tan, ina ɓeydoo wulde !
- Haanabere naange : « Ɓalliweeɓe (annduɓe ɓalliwal) nganndaa ko waɗi Naange ina duppitoo guubiliiji, e hol ko tagi enge wukkita kaanabbe (duppita duleeɗi) sahaa e sahaa fof ». Ɓeeynirka kaa ina nawori kaɓirgal « SWEAP » (Solar Wind Electrons Alphas and Protons Investigation) ngam ɓetde nguleeki e njaaweendi e tiɗɗeendi ɗeen kaanabbe. Humpitaade ɗum maa addan en anndude hol nde ɗiin guubiliiji naange njanata e Leydi, sibu ine hulaa hoto ɗiin guubiliiji naange mbonnude geese yiite (resoo kuuraa) fotde lebbi walla kitaale wonande won ɗiin nokkuuji dow Leydi men ndii.
- Hartaango pecoron : Kaɓirgal ISOIS (Integrated Science Investigation of the Sun) maa toppito wiɗtude pecore pattamsemmbe (haute énergie) ɗee, hono iyone tedduɗe (ions lourds, woni pecore tedduɗe, dimnduɗe). E wiyde gooto e annduɓe ɓee : « Ko pecore cemmbolinɗe no feewi, tiindiiɗe Leydi, ɗe njaaweeki kaawniiki, ki woɗɗaani njaaweeki leer. Aɗe mbaawi yettaade Leydi e nder 30 haa 60 hojom. Ñalnde njiɗ-ɗen yahde tagofeere marse fof, alaa e sago mbaawen anndude hol nde ɗee pecore nduppittoo sibu batte majje ina mbaawi warde ». Ine anndaa ɗe ngummotoo ko e meetelol naange, kono silsil kartagol majje anndaaka.
- Lonngal (lonngagol mawninoowol) : Ɓeeynirka kaa ina nawori kameraa biyeteeɗo WISPR (Wide-Field Imager for Parker Solar Probe) ngam ƴeewde Naange ngee ɗo ɓadii (miliyoŋaaji 6 km ngoɗɗeeki hakkunde mum e Naange ɓurndi raɓɓiɗde, tawi noon ngoɗɗeeki hakkunde Leydi e Naange ko hedde 150 miliyoŋ km). Annduɓe ɓee ina ɗaminii maa ka ƴettu cirƴe ñiso meeteleewo (éjection de masse coronale) pecore dimnduɗe, ɗe njaaweeki mawki, kam e bayle keewɗe goɗɗe baɗooje toon.
Ɗum noon maa kameraa oo ƴettu nate jooɗɗe wonande majjuɓe, coomɗe humpito wonande annduɓe.
————————————–
Ɓeeynirka Parker Solar Probe : Ɓeeynirka Parker Solar Probe ko ƴeewirde weeyo Naange. Feewni ka ko Nokku Amerik toppitiiɗo weeyo (NASA). Nguleeki meetelol Naange ngol kam e hartaango henndu naange duppittoondu heen ngoo, ko geɗe ɗiɗi teskaaɗe gila e feccere teem 20siire, ɗe silsil mum en faamaaka haa hannde. Ngam seertude e oon kumpa, Parker Solar maa wiɗtu diiwaan weeyo goɗɗuɗo Naange fotde 0,3 U.A. (U.A. ko goowel ɓetirgal jolɗe nder weeyo). E ngalɗoo daawal doɓindagol keɓe hakkunde 2018 e 2025, ɓeeynirka naange kaa duumotoo ko e jirlol nde lommet mum ɓadii Naange, e nde ceɓɓet mum tolnii jirlol Venus. Ɓaaƴo ndee tagofeere maa wallitore ngam ustirde seeɗa seeɗa lommet oo. Maa Parker Solaar rew laabi 24 e nokku mo ngoɗɗeeki mum e Naange jaasi 0,17 UA, tawi heen laabi tati ngoɗɗeeki kii timmaani 0,045 UA (9,68 hakkundol naange).
Ñiso Parker dow Leydi ko 685 kg. Reenata ka e nguleeki naange ɓurtuki kii ko warwarde tekkunde. Parker ina jolni dente 4 kaɓirɗe ganndal, ɗe ñiso mum tolnii e 50 kg. Ɗee kaɓirɗe maa ɓet ngesa yiiteewa e sulɗeewa, cifoo pecore semmbiije, mbiɗta bembeƴƴe rajo e ɗe ɓoljam, ɗe ƴetta kadi nate meetelol naange ngol.
- UA (Unité astronomique : ɓetirgel kuule asamaan) ko hakindo ngoɗɗeeki hakkunde Leydi e Naange, ko 149 597 870 700 meeteer. Ko yolnde nde leer taccata e nder hojomaaji 8 e leƴƴanɗe 19s.
Kelmeendi
- Meetelol naange : ——– couronne solaire
- Pecorel : —————- particule
- semmbe : ————— énergie
- pattamsemmbe : ——— haute énergie
- masse : —————– ñiso
- yiite sulɗere : ———— électromagnétisme
- Ɓeeynirka : ————– sonde
- hito : ——————- son
- ɓurhito : —————- supersonnique
- daawannde Selsus : ——- degré Celsius
- warwarde : ————– bouclier
- Hartaango : ————- accélération
- Iyon : ——————- ion
- Sirƴo : —————— éjection
- Ñiso meeteleewo : ——– masse coronale
- pecore dimnduɗe : ——- particules chargées
- jowitiingel : ————- satellite
- buɓɓirgel : ————– impacteur
- deegowel : ————– rover
- befagol : —————- navigation
- beforgal : ————— outil de navigation
- dampugol (dampo) : —— propulsion
- ndampoowa : ———— propulseur
- ballital ɓaaƴo : ———– assistance gravitationnelle
- ɓaaƴo : —————– gravitation
- dartingol : ————— freinage
- jirlol : —————— orbite
- ngesa yiiteewa : ———- champ électrique
- ngesa sulɗeewa : ——— champ magnétique
- pecore semmbiije : ——- particules énergétiques
- bempeƴƴe : ————- ondes
- ɓoljam : —————- plasma
- Lommet : (périhélie) : toɓɓere wonnde e bolol huunde taarotoonde naange, ɓurnde ɓallaade naange.
- Ceɓɓet : (aphélie) : toɓɓere wonnde e bolol huunde taarotoonde naange, ɓurnde woɗɗude naange.
Bookara Aamadu Bah
