Catal FƁPM Nuwaadibu : Hiirde mbayniigu Aamadu Saydu Kan

0
350
Aamadu Saydu Kan.png

 

 Catal F.B.P.M  to Nuwaadibu yuɓɓinii hiirde pinal ñalnde 23 saawiyee to galle Pulaar to leegal tufnde 1ɓere. Saabii hiirde nde ko waɗande musiɗɗo Kan Aaamadu Saydu, hooreejo catal ngal, hiirde mbayniigu, caggal nde heɓi fooftere mum (retraite).

 

 Catal F.B.P.M  to Nuwaadibu yuɓɓinii hiirde pinal ñalnde 23 saawiyee to galle Pulaar to leegal tufnde 1ɓere. Saabii hiirde nde ko waɗande musiɗɗo Kan Aaamadu Saydu, hooreejo catal ngal, hiirde mbayniigu, caggal nde heɓi fooftere mum (retraite).

Ko ɗuum addani hiirde nde yuɓɓineede ngam haaltude ñaamgolluuji oo gorko ngenndiyanke, e ruttude ɗum teddungal mawngal sibu golle ɗe o gollanii leñol ngol. Yimɓe fof ena ceedii wonde Kan Aamadu Saydu gollaniima F.Ɓ.P.M haa teeŋti noon e Catal Nuwaadibu, sibu ko ɗoo o ɓuri ɓooyde e jooɗaade, golle makko kadi puɗɗii ko gila e finndinde leñol ngol haa heɓi jannginde e ƴellitde ɗemngal men : o idii fof ko udditde duɗe janngirɗe Pulaar, o jannginii heen, o yuɓɓinii jeewte pinal keewɗe ngam findinde banndiraaɓe e nafoore wonnde e janngude ɗemngal mum. Omo faamnoo leñol ɓamtotaako ko maa jaŋde e winndude ɗemngal mum, ubbita pinal mum, rewa diine mum, reena ngenndi mum, wiɗta taariik mum, siftora hanki mum. Ɗuumɗoo fof Kan Aamadu Saydu gollaniima leñol ngol. Ngam raɓɓiɗinaade, mo wiyi ena haalda golle e balle makko, tampat, kono gaynataa. En ñaagiima geno toowɗo oo nde sellinta doole makko, juutna balɗe, moƴƴina battane makko (aamiin).

Golle hiirde nde ko hono nii lelorii : Idii fof ko konngol udditirgol hiirde, ngol musiɗɗo koolaaɗo kuuɓal catal, hono Caam Aadama waɗi ngam bismaade banndirraɓe arɓe tawtorrede hiirde nde. Rewi heen ko jimol Fuuta Tooro ngol Goomu pinal catal ngal, rewi heen ko njalniika nbayniigu hakkunde Kan Aamadu Saydu e catal ngal. Caggal ɗuum ko yeewrere faytunde e nguurndam Kan Aamadu Saydu, tawi yuɓɓini ɗum ko Bah Abdul Asiis.

Rewi e ɗuum ko jimdi sukaaɓe men naalankooɓe hono Jibi jeŋ, Gedda Gey, Maamuudu Bah e Ibiraahiima Saako, yanti heen ko konnguɗi huunde e hoohooɓe wuro ngo, arɓe tawtoreede hiirde nde, lomlomtondiri e haalirde nde ngam seedtaade darnde e golle Kan Aamadu Saydu hono : Yero Caam e Bah Abdul Kadeer e Sammba Jallo e Raamata Kan lollirɗo Guuro Kan. Rewi heen ko jimol yooro, e daaɗe belɗe goomu pinal catal ngal. Caggal ɗum ko dokkugol hoyreejo seedantaagal teddungal wonndude e jimol baɗngol faayida. Caggal ɗuum ko konngol mbayniigu hakkunde catal ngal e banndiraaɓe arnooɓe nootitaade e hiirde nde, e konngol ngol o huccitini e dental ngal. O idii yettude fof ko denndaangal banndiraaɓe Nuwaadibu e arɓe tawtoreede hiirde nde, e terɓe catal ngal, o yetti, o manti, o jaari denndaangal terɓe catal ngal e teddungal e nehdi e hurum mo ndokki mo gila o fuɗɗii wonde hoyreejo catal ngal. O wasiyii banndiraaɓe nde tiiɗnotoo njannga ɗemngal ngal, ndaroo, ndadoo e ƴellitde pinal men. O yaafnii kadi banndiraaɓe so tawii won pergitte ngoni hakkunde makko e yimɓe ɓe. O duwii nde geno toowɗo o ñiiɓnata catal ngal haa ɓeyda golle, yettina fayndaare F.B.P.M. O ñaggi nde Allah sellinta doole mo woni kala, juutna balɗe, ɓeyda barke (aamiin). Hiirde nde uddiraa ko jimol mbayniigu e daaɗe goomu pinal catal ngal.

Eɗen njetta denndaangal terɗe goomu pinal catal ngal nde mbaawi yuɓɓinde ndee hiirde waɗnde faayiida no feewi e dow gardagol musiɗɗo Limaan Sammba Jah lollirde ɓiyngel leydi, ɗowoowo ŋanaa kala hiirde pinal catal ngal, mo meeɗaa amande e aande ko yuɓɓinta, mo galle mum. Ko noon njettirten musiɗɗo Jibi Sih ɗowanɗo en hiirde nde haa moƴƴi, feewi, weli, weli arnooɓe fof, haa mo woni kala dañi heen weltaare e mbelemma. En njettii pelle pine e pelle gure e denndaangal banndiraaɓe arnooɓe nootitaade e hiirde nde. En ñaagiima ALLAH toowɗo o nde hono ndee hiirde waɗtatee sibu hono mayre weeɓaani. Mantude gollaniiɗo leñol, gila ena wuuri maayaani wonaa huunde weeɓde. Sibu heewii ko ngoppen haa joom mum wirnoo gite nde manten ɗum. Yo ALLAH hokku en moƴƴere e deeyre, o waɗa en e ndeenka makko, haa mbaawen ñemtinde hono ɗee golle paayodinɗe (aamiin).

Holi Aamadu Saydu Kan ?

En puɗɗoriima Innde Alla e juulde e Nulaaɗo makko Muhammadu, yo jam e kisal Alla won e mum. Jam ñalli e mon banndiraaɓe, on calminaama gooto e mon kala innde mum e yettode mum. Jettooɗe ngoodanii Alla, tagɗo reeni, hoddiri sababuuji.  Sabaabu pottital men hannde oo kikiiɗe aset ko sabaabu tiɗɗo, ko seedtanaade tampanɗo leñol, gollaniiɗo ɗemngal pulaar tigi-rigi, oon ko Aamadu Saydu Kan, hooreejo Catal F.B.P.M ɗo e Nuwadibu. Banndiraaɓe, kala ñamluɗo keñol moƴƴere, yo tijjo ko wayi nii. Nguu ñalngu bettaani en. Neɗɗo sifortee ko golle mum.

Holi oo Kan Aamadu saydu ?

Aamadu Saydu Kan yiyi aduna ko e hitaande 1949 to Likseyba Gorgol, wuro anndaango, limteteengo e gure paarnorɗe Fuuta.

En hitaande 1956, o naati ekkol to wuro makko. Ko ɗoon o janngi haa hitaande 1962, o fayi ɗuɗal hakkundeewal to Kayhayɗi, haa hitaande 1966. E hitaande 1967 o yawti, o fayi duɗal hakkundewal ngenndi to Nuwaasot (lycée National de Nouakchott).

Aamadu Saydu golliima sabu e hitaande 1970 tawi o ɓamii golle ko ina wona duuɓi tati to P.T.T (poste). Caggal ɗum, e hitaande 1970 haa 1975 o gollotonoo ko to Air Afrik. 1976 haa 1977 o fayi PNUD Nuwaasoot. 1977 ha 1978 o gollotonoo ko to Mendes Junior. Tuggi 1979 haa desammburu 2009, ko SNIM tan o gollotonoo. Ko ɗoo o ɓuri ñiiɓde, o ɓuri ɓooyde. Ha o hebi fooftere makko hannde nde (retraite) tawi omo selli, omo hisi, Alla ina accidi mo timmal makko.

To bannge dowrugol ko e heertooji luulndo tan o woni sabu makko woƴeede yooltude ndimaagu e jojjanɗe ɓesngu e leƴƴi Muritani fof. E oon fannu omo tiiɗi, omo tiiɗnii, o wonii laabi keewɗi e meeri Nuwaadibu (conseiller municipal). Ko idii wooteeji 1992 (tuggi 1990 haa 1993), 1993 haa 2001, 2001 ha 2006, o jeyaama e terɗe cosɗe UFD, AC, APP (membre fondateur). Kadi o meeɗaa waasde jeyeede e terɗe jiilirɗe ɗowooje golle ɗe to diiwaan Nuwaadibu. Kan Aamadu Saydu nana to golle SNIM, to golle dawrugol, to golle pinal. Ina jeyaa e ko ɓuri tiiɗde e golle makko, daranaade golle pinal, jaŋde ɗemɗe ngenndiije, ha teeŋti e ngal fulɓe.

Tuggi 1979 ha e oo sahaa omo golloo tigi e F.B.P.M. Ko ɗum addani mo heptineede e suɓeede caggal batu mooɓondiral ɗiɗmu yo o won hooreejo Catal Nuwaadibu. Ndeke ɗumɗoo fof ko sabu darnde makko teskinnde. Ko ina wona hannde duuɓi 27 ko kanko ardii catal ngal. Kan, ko sagata, ko jaggal mawngal e fedde nde, e catal Nuwaadibu. Ina jeyaa e golle makko tabitɗe, winnduɓe defte fuɓɓorde kelmeendi e firo mum e ɓemngal Farayse.

Ngam wallitde humpiiɓe alkule latin ɓee e tuma muusɗo 1989 ha 1992, ko kanko hisni deftordu catal ngal. O waɓiino binndanɗe keewɓe e jaaynde Nuwaadibu, hono ƴellitaare, haa teeŋti e peeje no jaaynde ɗemngal Farayse haa teeŋti e peeje no jaayde ɗemngal Pulaar njaajirta. Omo jeyaa e walluɓe catal ngal haa dañi jokkondire e balle ngalu ummoraase e Fedde CERLS (Comite Eƴécutif régional de lutte contre le Sida).

Ko Kan Aamadu Saydu ligganii leñol ngol, Fedde nde e ɓesngu Muritani waawaa haaldeede kiikiiɗe gooto. Gonaangal makko e Nuwadibu ko nafoore mawnde addani en. Yo Alla yoɓ mo ko o waɗani ɗemngal ngal ko, ko o waɗani leñol ngol ko. Aamiin. Golle makko ina njooɗi. Golle moƴƴe alaa e sago njokkee, ñemmben golle makko.  Sabaabu dental men ko leñol, ko ɗemngal ngal. Ɓeyden tiiɗnaare. Mboɗo yetta terɗe catal ngal fof haa teeŋti e sukkuɓe ɓe. Yaakaare men janngo rewɓe e worɓe ɓe e jinnaaɓe maɓɓe. Sabu gila nguu ñalngu heblaa ko ɓe dariiɓe tay. Ɓe paamii ko kamɓe njogori heɓɓitoyaade jaŋde e pinal fulɓe. Yo Alla won ballo, yettina fayndaare. Aamin

Abdul Ajiiju Bah, Nuwadibu 23/01/2010