Kaawisaaji : otooji nawooji koye mum en !

0
740
  • Google : Otooji ɗi wumɓe konndirta

E ko ɓenni, en kaaliino ko faati e otooji Google nawooji koye mum en, ɗi ɓe ngoni e jarribaade ko ina wona duuɓi ɗiɗi jooni. Sikke alaa, ɗiin otooji ko keewoyooji nafoore, gila e konndirde tawa ina waɗa goɗɗum haa e ustugol uddooji e aksidaaji kam e ñaamgol isaas…

Google jarribiima nafoore woɗnde, heewnde faayiida : wumɓe maa mbaaw konndirde otooji !

Ɓe njarribiima ɗum sibu, gumɗo gooto, biyeteeɗo Steve Mahan ina jeyaa e konndirooɓe otooji Google jarribteeɗi ɗii. O jolii e oto hee, nawi mo to ñaamirdu fast-food, ɓennini mo to guppoowo comci makko, artiri mo galle makko, tawi o memaani hay gootol walaŋ mum, tawa kadi alaa fof oto goɗɗo mo o memondiri, walla ɗo o waasi ɗooftaade laawol konndiir. Ko neɗɗo gooto tan joldunoo e makko, ina heedi caggal, ngam reende, so woodii ko kewi ko fotaano.

So oɗon njogii internet, oɗon mbaawi yiyde Steve Mahan ɗo joli e oto hee ina nawa hoore mum e ndeeɗoo jokkorde : http://dailygeekshow.com/2012/04/03/google-car-un-aveugle-teste-la-voiture-autonome.

  • Oto diwoowo walla ndiwoowa ndeegoowa

Caggal otooji nawooji koye mum, ko otooji diwooji. Ɗum firti, ko abiyoŋ tokooso, mo nganndu-ɗaa so juuriima, hofat bibje mum, wona e reegde no oto nii, walla no ndiwri waɗata nii. Sosiyatee Ameriknaajo biyeteeɗo Terrafugia tafii heen oto (walla abiyoŋ) gooto ngam jarribaade. O diwii hojomaaji 8 ñalnde 2 abriil 2012 ; ina gasa o waɗta yeeyeede ɗoo e maayirɗe hitaande ndee. Ɗumɗoo noon ko huunde hoyɗetenoonde ko ɓooyi, sikkanoonde aaɓnotaako.