Ngam mawninde ñalngu nguu, jokkorde pelle Ɓamtaare Pulaar e fedde Ɓamtaare ɗemngal Sooninke e fedde Ɓamtaare ɗemngal Wolof njuɓɓinii, ñalnde aset 23/02/2013, to Galle pinal Jaaje Kamara, to Socogim PS ɗoo, yeewtere tiitoriinde “Ɗemngal muuynangal e jaŋde”. Yeewti ñalnde heen ko Muhammadu Wan gandiraaɗo “Duudu” e Alasan Jah, ɗiɗo ɓee kala ko doktoreeɓe ko fayti e ɗemɗiyaagal. Muhammadu Wan ɓuri juutnaade ko e jojjugol jaŋde ɗemɗe ngenndiije ɗee : o hollitii noon, ɗemngal so ina janngee, yo a taw denndaangal peeje ina cakkaa, mbele janngooɓe ngal ɓee ina mbaawaa wuurdude ngal, ngal wona kadi ɗemngal gollorgal.
Geɗel goɗngel ko hollitde wonde daranaade ɗemngal wonaa tan e laamu fawii, kono ɓuri fawaade e ko joom en ngaal ɗemngal ngollata ñalnde kala ngam ɓamtude ɗemngal mum en.
Alasan Jah ɓuri yaajnaade ko e politik laamu Muritani to bannge ɗemɗe, politik maantinirɗo yiɗde waawnude leƴƴi Muritani keddiiɗi ɗii, ɗemngal Arab. O wiyi wonde Arab ina foti ƴelliteede sibu ko ɗemngal leydi ndii, kono ngal fotaani ɓurneede hay gootal e ɗemɗe ngenndiije keddiiɗe ɗee. O dallinii, wonde aawi jalluɗi oon politik ko Muttaar wul Daddaa, sibu, ina heewi ɗo o seedni haalna oon e hoore mum.
So ngantu ɗaccii, eɗen njiɗi artoyde e ɗee jeewte ɗiɗi baɗɗe faayiida.
