Ñalnde 11 feebariyee 2013, Masawuud wul Bulkayri hollitii miijo sakkiti ngam wallitde leydi ndii yaltude e kiris politik wuuri hannde oo. Ceŋɗe politik leydi ndii kala tawtoraama kewu ngu to Galle Mooɓondire, gila e CAD, haa e COD, haa e UPR e yahdiiɓe mum, e pelle renndo e hoohooɓe teelɗuɓe.
O inniri feere makko ndee ko « Muritani tawo !». E nder konngol makko ñalnde heen, o wasiyiima Muritani nde wallondirta e aduna oo, haa arti noon e leyɗe keediiɗe ɗee, ngam wallitde Mali hisnude ngootaagu mum e goodal mum. O wiyi faandaare feere makko nde ko tiiɗtinde kaɓɓondiral yimɓe leydi ndii rewrude e nanondiral politik mbele yimɓe ina mbaawa yuɓɓinde woote bellitiiɗe, nuunɗuɗe, koolniiɗe. Eɗen ciftina tan Abdel Asiis hollitiino wonde jaɓaani miijo compugol guwarnama nanondiral, sibu, e miijo makko, caɗeele ngalaa e leydi hee. Senngo politik wiyeteengo COD ngoo, wiyiino ina fadi haa Masawuud laɓɓitina miijo mum nde yeewta heen.
FƁ
