Diiso Siynoowo Njuɓɓudi Adunaari Cellal (OMS) njooɗinoongo ñalnde 1 feebariyee 2017 e batu mum 140ɓu to Geneef (Genève), rokkii porfeseer Baydi Buubu Loh njeenaari Fedde Amiraaji arab dentuɗi (Emirats arabes unis), ngam teddinde « golle ɗe o gollii e nder ɗii duuɓi noogaas cakkitiiɗi ngam ƴellitde tippudi cellal (loowtugol ƴiiƴam, hare sooynaɓooji wiriseeji, VIH/SIDA e IST (Piɗe Daaɓrooje Njogoram) kam e golle njiylawu jahdooje heen ». Njeenaari ndii ummorii ko e Fedde Emiraaji daraniinde Cellal (Fondation des Emirats pour la santé). O foti totteede ndi ko e Batu Kuɓtodinngu 170ɓu Fedde adunaare cellal fotnde jooɗaade e lewru mee 2017 to Geneef.
Njeenaari Fedde Amiraaji arab dentuɗi wonande cellal, ko njeenaari ndokketeendi hitaande kala neɗɗo gooto walla yimɓe heewɓe walla juɓɓule maa pelle ɗe ngonaa pelle laamuyeeje, teskaaɓe walla tesktaaɗe won ko ɓeydani ganndal cellal.
Porfesoor Baydi Buubu Loh ko doktoor cellal, jannginoowo kadi e duɗal jaaɓi haaɗtirde cellal Nuwaasoot. O janngi cellal ko to Duɗal jaaɓi haaɗtirde Shanngaay (leydi Siin) biyeteengal jooni Shanghaï Fudan University. Caggal nde o gollii duuɓi keewɗi e leydi makko, o jokkoyi jaŋde haa o wonti doktoor Dowla fanniyanke e ganndal nguurndam cellal (Rabat 1991), o woni doktoor jom agerega (agrégé) e hitaande 2 000 (Duɗal jaaɓi haaɗtirde Muhammed V mo Rabaa, Maruk). O waɗii kadi wiɗtooji e binndanɗe lugge jowitiiɗi e fannuuji cellal ceeɓɗi nder duɗe cellal mawɗe e nder winndere ndee (Maruk, Siwis, D. D. Amerik, Danmark).
Baydi Buubu Loh heɓii kadi halfineede ngardiigu nokkuuji cellal keewɗi e leydi hee, ko wayi no CNH e goɗɗi. Omo jeyaa e lelnuɓe politikaaji e peeje ngenndiije kaɓgol e ñabbuuli keewɗi (SIDA, jontinooje, ɗoyru ekn) e ko faati kadi e diƴƴe e senaare. Omo jeyaa e sakkitɓe miijo compugol juɓɓule cellal keewɗe e leydi ndii ko wayi no Nokku ngenndiijo loowtugol ƴiiƴam e goɗɗi.
Bookara Aamadu Bah
