Taariika
Fulɓe Progressive Union (FPU) ko mojobere daraniinde fiyaakuuji renndo e pinal. Ko ehitaande 1966 nde sincaa e nder Sarlon. Innde mayre aranere nden fewndo nde sincaa ko Fullah Youth Organization (FYO).
Faandaare FPU ko marde e reenude pulaagu e Fulfulde nder e yaasi leydi Sarlon ndin, e tinndingol ɓiɓɓe ɓen pulaagu janngina ɓe no ɓe heɓirta doole e cemmbe nder e yaasi leydi Sarlon ndin.
Ko woni sabu sincugol FPU
Hino jeyaa e sabuuji sincugol ndee mojobere: dartanagol Fulɓe ɓe laamu Sarlon ngun wonnoo e tooñude nannga, haɓɓa, letta, mooɓa, sokoya e leyɗe kawtalje, wi’a Fulɓe jeyaaka e nder leƴƴi leydi Sarlon ndin, etagol no ɓe heɓira ɓuuɓtu e nder leydi maɓɓe ndin.
Ko on tuma -Alla hinno- Mohamed Alieu Jalloh (ɓurɗo lollirde M. A. Jalloh Mobil) e sukaaɓe wonnooɓe e janngude e duɗe toowɗe wano Porofesoor Abubacar Bah, Alla hinno Lawyer Mohamed Sadu Bah, Porofesoor Mohamed Alpha Bah, Chernor Abdulai Jalloh, Moodi Siray Jah, Sonna Jalikatu Rahman (oo meeɗii wonde Mayor laamorde nden Firiton ɓaawo ɗum), Moodi Umaru Dumbuya,e njulaaɓe (filooɓe) mawɓe wano Alla hinno Alhajji Abbas Alie, Moodi Musa Jalloh ekn. mooɓii haaldi fotti e sincugol ndee mojobere FYO, sabaabu arano on ko danndugol leñol Fulɓe ngol, faddoo tooñe laamu ngu Dr. Siaka Probyn Steven ardinoo ngun fewndo on tuma.
E hitaande 1980, mojobere FYO nden waylii wonti Fullah Progressive Union (FPU), nde suɓii ardiiɗo keso, kanko woni -Alla hinno- Alhajji Bailor Barrie. Mojobere nden ɓeydi heftineede, nde waɗti yuɓɓinde pottite hitaande kala ka ɓiɓɓe leñol fotta ɓeydoo anndindirde e huuwondirde. Mojobere nden ɓeydii wonde darantoonde dannda ɓiɓɓe leñol ngol e baŋŋeeji ɗin fow. Yeru, nde immike, nde ƴamii laamu ngun yo accitu kala Pullo nanngaaɗo nanngiraa tooñe. Mojobere nden huuwondiri e gollanooɓe laamu ngun haa ngal huuwondiral ɓeydi wallitaade e reenugol dannda leñol ngol, faddoo tooñe ɗen.
Ɓaawo duuɓi seeɗa yawtii gila mojobere nden sincaa e hitaande 1966, yoga e sincunooɓe ndeyahi Ameriki fii ɓeydoyagol ganndal, wano Lawyer Mohamed Sadu Bah, Ambasadeer Sulaiman Tijan Jalloh,Chernor Abdulai Jalloh, Mohamed Wurie Jalloh, Seray Jah, e woɓɓe kadi, ɓe sinci salndu FPU e nder Ameriki ɓe jokkitii e golle ko FPU jokkunoo kon e nder Sarlon. Ko e hitaande 1971 nde sincaa e nder leydi Ameriki ndin, mojobere nden wonti salndu (lisal) FPU aranuru sincaandu e yaasi leydi Sarlon ndin.
Ɓe winndi mojobere nden ka laamu e nder Washington, ɓe suɓii Moodi Alpha Ibrahima Barrie (ɓurɗo lollirde Alfaajo Bari) yo wonu hooreejo maɓɓe arano on.
Mooɓondire ɗen waɗti yuɓɓineede e nder galleeji terɗe ɗen, lewru kala mooɓondiree ka gooto e terɗe ɗen, ɗum addi woowtondiral, ɓeydi giggol e yurmondiral hakkunde terɗe FPU ɗen. Toraare Alla waɗaa, yahri non haa e hitaande 2008 fewndo FPU soodi galle e nder Lanham, ɗon wonti mooɓorde e janngirde ka ɓiɓɓe ɗuuɗɓe rewi, janngi haa wonti hannde ko’e yaakitoraaɗe e nder leydi Ameriki ndin.
No jeyaa e eɓɓooje FPU kese ɗen waɗtugol ndee nokkuure Galle Jamaa ɓurɗe kelɗude haa nafoore mayre ɓeydoo yaajude e layude.
Nafoore golle e balleFPU
FPU gollii golle heewɗe nafoore nder e yaasi Sarlon sabu duumagol maɓɓe e tambitagol ndee mojobere, saloo nde lancoo maa nde feccoo, sabu wakkilaare maɓɓe e yarlitaare maɓɓe duumiinde, e gollugol golle ɗe aldaa e ngaameelo aldaa e nguddam.
FPU wonii sabu yo Fulɓe Sarlon heɓtu hakkeeji muuɗum, ɓe wona leñol finungol anndungol wonde hay gooto ɓuraa ɓe e leydi Sarlon ndin. FPU wonii sabu yo laamuuji ɗin accu tooñugol Fulɓe ɓen, maa mooɓugol ɓe naɓta ka ɓe jeyaaka, maa nannga ɓe ukka e kasooji e hoore tooñne. Hanndeere ndee, Alla e FPU, Pullo hino toowni hoore e nder Sarlon hella baŋŋeeji ɗin fow fayda, si wonaa oon Pullo waɗɗo hoore mum njanano, Pullo no mari teddungal mum timmungal. Ka ɗuuɗugol, ko Fulɓe woni leñol tataɓol e nder leydi Sarlon ndin. Ka ganndal e jawle ɓe hikkoraaki ɓaawo.
Ka duuɓi 1960-ji, 1970-ji haa ka 1980-ji leƴƴi Sarlon ɗin tawtude laamuuji ɗin salino cut yo Fulɓe naatu ka parluman, ɓe wi’i Fulɓe ko jananɓe. Yeru, e hitaande 1982 hare waɗunoonde nden hakkunde Thaimu Bangura e JusticeAbdulai Babagalleh Timbo wonno sabu yo wonkiiji Fulɓe ɗuuɗɓe bonu e nder Bombali. Ko non kadi hare waɗunoonde nden hakkunde Moodi Alpha Ibrahima Barrie (lollirɗo Alfaajo Bari) e Ahmed Bala M. Kamara e nder Kabala.
Hannde ɗin hareeji accii waɗude. Darnde Fulɓe ɓen e nder baŋŋeeji ɗin fow waylike moƴƴii, ɓe heɓtii doole, ka laamu, ka jawdi, ka ganndal ekn. Pullo hino ardii partii politik, Fulɓe jaagorɓe no heewi, Fulɓe Ambasadeerɓe no ɗuuɗi, ka Ñaawirde Sarlon Mawnde nden Fulɓe tato wonii Chief Justice: Justice Abdulai Timbo, Justice Umu Hawa Tijan-Jalloh, e Justice Abdulai Hamid Cham, jaayndeyankooɓeFulɓe no heewi, njulaaɓe kam haalaaka, ekn.
Kono e hoore ɗee lowe kelɗuɗe jaŋtaaɗe dow ɗoo fow, haa jooni no woodi Sarlonnaaɓe saliiɓe cut yo Fulɓe lime hakkunde leƴƴi jeyaaɗi e nder leydi Sarlon ndin, hay si tawii ɓe ɗuuɗaa, ɓe jogaaki doole, lorra maɓɓe hino haani faddeede. E jaka haa jooni golle no haani jokkindireede haa faandaare FPU nden jojja, haa leñol ngol daɗa e baŋŋeeji ɗin fow, ngol heɓa ɓuuɓtu.
FPU waawii mooɓindirde jawle fii wallitagol ɓiɓɓe leñol ngol yo janngu, ɓe kelɗii e njulayaagal maɓɓe ngal, ɓe wallitike Sarlon e nder cenɗe ɗen fow, ka faggudu e ka ɓamtaare leydi ndin
Salndu FPU ndun Washington battinii e dawlaaji Ameriki kadi e haa calɗi goɗɗi sincaama e nder Georgia, New York, Massachusetts, Texas e Deware Valley, wooturu kala e ɗii calɗi wallitike fota e nder leydi Sarlon ndin.
Salndu FPU ndun Georgia neldii kontineerji kontineerji lekkeele e aalaaji wallitagol ñawndorɗe ɗen e janngirɗe ɗen Sarlon, ɗum waɗaama fotde duuɓi heewɗi, tawi haa jooni hino jokkaa. Salndu FPU ndun Washington wallitike e hesɗintingol juulirde Fulɓe ɓen Firiton, neldii kontineerji kontineerji ñaameteeji fewndo hare musidal nden Sarlon.
FPU soodii galle e nder Washington, ɗen galle wontii janngirde e mooɓorde wonande mojobere nden gila e hitaande 2008.
Fulɓe Progressive Union North America (FPUNA)
Miijo sincugol FPUNA ko ka WahtsApp fuɗɗori, waɗi hitaande jooni. FPUNA hino mari calɗi ɗuuɗɗi: Washington, Boston, Delware Valley, Georgia, New York, woɓɓe kadi no ka laawol. Si Alla muuyii, mojobere nden no eɓɓi layugol haa sudda leyɗeele Ameriki e Kanadaa.
Ñannde 7, 8 & 9 lewru Morso (July), 2017 mojobere FPUNA nden fampaa e nder Washington.
Faandaare FPUNA nden ko
Ƴellitugol Fulfulde e Pulaagu. Moƴƴintingol faggudu ndun (economic transformation). Ɓaŋtugol neɗɗanke. Reerɗingol Fulɓe ɓen fow yo tawtore e dille politiki.
Goomuuji FPUNA sincaaɗi
Goomu Jannde. Goomu Cellal. Goomu Pinal e Finndingol. Goomu Danndugol. Goomu Enterepreneeryaagal
Ɗii goomuuji hino halfinaa ɗaɓɓitugol laawi e wallingol (lelnugol) eɓɓooje kañum e ɗaɓɓugol pehe no jawle heɓorta ko eɓɓooje ɗen golliree. Goomuuji ɗin hino haani diisondirde e Yiilirde Siinoore FPUNA nden.
No FPUNA fuɗɗori haa no famporaa
Jooni helmere Fullah nden lomtiniraama Fulɓe, sabu ko nii leñol ngol woni e noddirde hoore mum, ko Fulɓe Progressive Union North America (FPUNA).
Golle moƴƴuɗe kelɗuɗe waɗaama gila FPUNA sincaa ka WhatsApp haa ñannde mojobere nden fampaa e nder Washington. Yimɓe kelɗuɓe, jannguɓe e marɓe, sukaaɓe e mawɓe, rewɓe e worɓe tawtoraama e golle ɗen gila ka fuɗɗoode haa ka timmoode, golle ɗen yawtii no moƴƴiri haa yimɓe ɓen fow haarii wewlere e weltaare…
Ko adii FPUNA mooɓondirde e ngal tumbondiral aranal fampoo mojobere nden, golle heewɗe keɗuɗe waɗaama, ɗe fuɗɗori diisondiral, yahi e joɗɗingol Yiilirde Siinoore happanaande dumunna (interim executive), ko ndee yiilirde toɗɗii Goomu Rewtotoongu Tuuginorde (Constitutional Review Committee). Nguu goomu halfinaa winndugol dokimanru ɗoworteendu mojobere FPUNA nden, ko ɗum woni tuuginorde nden. Yiilirde Siinoore nden kañum e senngo mum toppitii eɓɓugol no FPUNA famportee. Njaltudi ɗee mooɓondire e diisondire kelɗuɗe, wano Algaasimu Monoma Bah, halfinaaɗo yeeynugol on, humpitiri non, ko ɗum yi’uɗen ka Tumbondiral FPUNA, ko salndu FPU Washington ndun weerni tumbondiral ngal ñannde 7, 8 & 9 Morso (July) 2017.
Ñannde 07 Morso 2017: Fottugol Salmondira
Fulɓe ɗuuɗɓe fottii ka WhatsApp FPUNA yeewtii piiji ɗuuɗɗi, jannindirii ko yahata hitaande, kono ɓe meeɗaani yiidude gite e gite, ko ɗum waɗi ñannde 7 ɓe haaldi fottude ka Galle FPU Washington ɓe salmondira, ɓe ɓeydoo anndindirde. Hino jeyaa e tawaaɓe ɓen e arɓe ton Bibata Barry jeyaaɗo Burkina Faso, golloowoe leydi Botsuwaana, Dr. Ibrahima Seaga Shaw (Soh) iwɗo haa Angalateer, Moodi Bai Kabia (gooto e Sarlonnaaɓe hooloraaɓe e nder Ameriki), Moodi Mohamed C. Bah, ko oo ardii partii National Democratic Alliance (NDA), Yiiloowo Kuuɓal (Director General) United Nations Industrial Development Organization (UNIDO) wonɗo e ɗaɓɓude laamu Sarlon, Dr. Kandeh Kolleh Yumkella, e yimɓe iwruɓe e nder dawlaaji Ameriki seertuɗi tawtoraama nden ñalaande.
Ñaameteeji welɗi no hebilaa ɓadii, yimɓe moƴƴuɓe rewɓe e worɓe hino jaɓɓoo weerna arooɓe. Ko nii yahrii haa futuroo juulaa, Moodi Alieu Dausy Wurie, ko kanko woni Koolaaɗo Kuuɓal FPU Washington e Koolaaɗo Kuuɓal Yiilirde FPUNA nden, o ardii golle anndindiral ngal haa fow anndini ko’e mum e leyɗe maa dowlaaji ɗi ɓe immorii. Ɓaawo ɗum, Hooreejo FPU Washington on, Sonna Asiatu Jalloh-Kamara jaɓɓii fow wi’i ko toolii e nder Washington, o yelanii fow jam e yo golle eɓɓaaɗe ɗen laato e jam. Jeewte daɓɓe waɗaa, anndindiral nootondiri baŋ-woo-baŋ, ɓaawo ɗum toraare Alla waɗaa si yimɓe saakitii hino hebilanoo fottoygol janngo mum ka Hotel Sheraton e njamndi 09:00 Bimbi fii ñalaande ɗiɗaɓere nden.
Ñannde 08 Morso 2017: Tumbondiral ngal
Imminaaɓe calɗi FPU seertuɗi e hoɗɓe saatinaaɓe iwruɓe e mojobe seertuɗe fuɗɗii arde gila e njamndi 09:00 Bimbi, ɓe ari ɓe jooɗii. Ɓaawo kooƴe ittaama, ittiraama ñaameteeji kelɗuɗi, ɓaawo anndindiral e salmondiral waɗaama, Dr. AlieuShaw hunaa, o ari o yeewti seeɗa ko yowitii e nguurndam makko e no o naatiri e FPU. O jaŋtii wonde ko kanko woni Sarlonnaajo arano sincuɗo telewison heeriiɗo e nder leydi Sarlon, o sifii caɗeele e beleeɗe nguurndam ko o meeɗi hawrude e nder saare aduna. O jaarni, o weltanii ɓen addunooɓe ngoo miijo moƴƴungo fii sincugol FPU e hitaande 1966, o wasiyii wonde golle FPU ɗen hino haani toppiteede nawree yeeso. O arti e hunagol inɗe yimɓe yeewtayɓe ɓen e ngal tummbondiral.
Yoga e yeewtuɓe ɓen ko wano: Imaam Mohamed Sherrif Barrie, Chernor Abdulai Jalloh (gooto e tawanooɓe e sincugol FYO nder Sarlon 1966 e nder Ameri 1971), Sonna Asiatu Jalloh-Kamara (Hooreejo FPU Washington), Chernor Ahmed Jogor Jalloh (Hooreejo FPU Texas), Imaam Babagaleh Barrie, Dr. Abubakar Bah, Dr. Ibrahima Seaga Shaw, Haja Mariama Fofanah, Moodi Abubakar Jalloh, Dr. Umaru Bah e woɓɓe kadi.
Yeewtooɓe ɓen ardiri gooto gooto, kono gooto kala e maɓɓe mani FPU gila ndee mojobere sincaa ɓurii duuɓi 50, gooto kala hino wasiyoo no nde toppitortee, e salagol nde yeeboo maa nde feccoo. Yeewtooɓe ɓen meemi baŋŋeeji ɗin fow e fiyaakeeji ɗin fow gila semmbingol e jannugol jiwɓe ɓen (ɗum woni sukaaɓe rewɓe) e yaññugol ɓerɗe men ɗen uddita ɗe fii jaɓɓagol ɓiɓɓe leñol ngol fow wonaa ɓen wowlayɓe Fulfulde tun, kono ko kala mo ƴiiƴam mum woni Pullo hino haani jaɓɓeede hollee enen fow ko e neene-gooto baaba-gooto, hay gooto ɓuraa goɗɗo. Ɓural Pullo ko fotde ko o gollani e ko o yarlitanii Fulɓe ɓen, wonaa lasli makko, wonaa dammbe, wonaa kadi jawdi maa ganndal makko.
Chernor Bah: Yeewtere Mawnde nden
Jeewte ɗen fow hino hitti fota, kono yeewtere Chernor Bah, oo teddiniraaɗo yeewtere mawnde nden (Keynote speech) hollii nden ñannde pellet si sukaaɓe ɓen halfinaama gollal hiɓe gasa waɗude ngal no haaniri non. Oo suka kecco mo Alla toowni darnde mum meeɗii teddineede e nokkuuje mawɗe nder adunaaru ndun, ka Dental Afriki o yeewtii, ka Dental Erop o yeewtii, ka UN o yeewtii, kala ka laamɓe winndere ndee noddaa yo yeewtu, himo noddee o yeewta… Kono o hollii nden ñannde wonde gila Alla fuɗɗii toownude darnde makko, ko hikka o ɓuri weltaade sabu ɗoo ko ka makko e hakkunde yimɓe makko ɓen tigitigi… alaa ko ɓuri ɗum welde.
No jeyaa e yeewtere makko:
“No jeyaa e ko haanuɗen waɗude, reerɗingol, mooɓindira doole men ɗen fow, doole gooto kala e men, enen e seertugol men, e ɗuuɗugol pine men e leyɗe men ka jeyaɗen, hiɗen haani reerɗinde Fulɓe ɓen fow yo mooɓondir, gooto kala wallira fotde ko waawi kon. Pullo hay gooto ɓuraa Pullo goo, enen fow hiɗen waawi heƴude e nder mojobere FPU nden, heƴa e nokkuure wootere.
“Enen Fulɓe ko en leñol gootol kono pellet en wonaa huunde wootere, woɓɓe e men ko iwdi Fuuta Jaloo, woɓɓe ko iwdi nokkuuje goo, no gasa ɓurɓe ɓen e men ko diina lislaamu jokki, kono no woodi woɓɓe hakkunde men wonaa kan woni diina maɓɓe, diinaaji men ɗin hino waawi seertude, mecce men ɗen, leyɗe men ɗen fow hino waawi seertude, kono wonen yimɓe jaɓooɓe koo ko seerti, waawɓe mooɓondirde e nokkuure wootere diisondira no ngol leñol ɓamtora ngol yahira yeeso.
“Yimɓe ɗuuɗɓe wonɓe hakkunde men no gasa hino waawi Fulfulde fota, kono ko ɓuri 60% e nder ɓiɓɓe leñol hannde waawataa Fulfulde, kono ɓe añaa ɗemngal ngal, ɗaɓɓen laawi e pehe no ɓiɓɓe leñol ngol wonira neene-gootooɓe baaba-gootooɓe tawa gooto kala e maɓɓe hiɗen waawi naftoraade mbaawdi mum ndin, heewɓe e ɓen ɓe waawaa wowlude Fulfulde no yiɗi ɗemngal ngal ɓuri heewɓe waawɓe wowlude ngal, ko non kadi ɓe yiɗiri leñol ngol ɓuri heewɓe. Enɗam pulaagu ɗam hakkunde men hino haani tiiɗude heɓa doole ɓuri kala huunde e nder oo aduna.”
Ngeenaariiji barkinoraaɗi mawɓe Sarlon
Ko e ndee ñalormaare FPUNA yeɗi yimɓe njowo ngeenaariiji barkinoraaɗi mawɓe Sarlon walluɓe Fulɓe walli leydi ndin balle duumotooɗe haa ñannde darngal. Mawɓe barkinoraaɓe ɓen e yimɓe njowo yeɗaaɓe ngeenaariiji ɗin hino jaŋtaa ley ɗoo:
- Ngeenaari Almaami Raasin fii Ardungal & Giɗo Jam (Almamy Rassin Leadership & Peacemaker Award) yeɗaama Ambasadeer Amadu Jalloh
- Ngeenaari Almaami Abdul Rajaak Jallo fii Basiira (Almamy Abdul Razak Jalloh Visionary Award) yeɗaama Moodi Mohamed Alpha Bah
- Ngeenaari Muusaa B. Jallo fii Hiwgol(Musa B. Jalloh Advocacy Award) yeɗaama Moodi Mohamed Wurie Jalloh
- Ngeenaari Alhajji Bayillo Bari fii Neɗɗankaagu (Alhaji Mohamed Bailor Barrie Humanitarian Award) yeɗaama Alhajji Mohamed Alieu Jalloh
- Ngeenaari Alhajji Saajaliiw Bah & Alhajji Ciwto Jallo fii Jannde(Alhaji Sajalieu Bah & Alhaji Chiwtor Jalloh Education Award) yeɗaama Moodi Sajoh Bah
Dokke kaalisi e jawle
Ka mooɓindirgol e okkugol kaalisi wonande FPUNA, gooto kala okkii fotde ko waawi, woɓɓe okki $2 000.00, wano Chernor Abdullaahi Jalloh, woɓɓe $1 000.00, woɓɓe okki kontineer lekkeele wano Moodi Mohammed L. Bah, ekn.
Fula Flute
Naalanke men jeyaaɗo e ɓurɓe waawude wuttugol ceri tawtoraama e ngal tumbondiral gila bimmbi haa jemma, kanko woni Bayillo Bah mo diɗɗalFula Flute, nden ñannde o ɓeydii welnude tumbondiral ngal kanko e ɗii ceri makko welɗi heɗaade. O jaaraama ko aldaa e keerol. Kala yiɗɗo jokkondirde e makko, ko tonngoode talifon makko nii: +137-499-3643. Himo waawi golle makko ɗen fota, sifa makko ɗuuɗaa.
Joɗɗingol Yiilirde Siinoore
Ɓay ɗee cofte jaŋtaaɗe dow fow waɗaama, goomuuji ɗin jaŋtaama, imminaaɓe calɗi FPU ɗin fow heftini tuuginorde FPUNA nden. Kadi ɓe haaldi ɓe fotti ɓe fow maɓɓe wonde hankadi jaraa woote no waɗee, hay gooto e imminaaɓe ɓen walla calɗi FPU ɗin salaaki ngoo miijo. Ɓe holli wonde yondee Yiilirde Siinoore waɗunde golle ɗen ko yahata hitaande, yo jokku golle FPUNA ɗen e ngal ardungal aranal haa fotde duuɓi ɗiɗi. Golleeji terɗe Yiilirde Siinore nden waylaama seeɗa, terɗekese ɓeyditaama.
Nde tawnoo hay gooto salaaki miijo imminaaɓe calɗi FPU ɓen, halfinaaɗo woote on noddaa, kanko woni Dr. Abdulai Barrie, o ari o inniti terɗe Yiilirde Siinoore nden gooto gooto, o yamiri ɓe yo ɓe woondu, o janngani ɓe woondoore nden ɓe woondi haa gasi e yeeso jamaa on, ko nii FPUNA jibiniraa e nder Washington e hoore jam e moƴƴere.
Yiilirde Siinoore FPUNA nden ko nii lelori:
Hooreejo: Chernor Abdulai Jalloh
Cukko Hooreejo: Chernor Ahmed Jogor Jalloh
Koolaaɗo Kuuɓal: Alieu Dasy Wurie
Ballo Koolaaɗo Kuuɓal: Almamie Razak Seray-Wurie
Maroowo Jawle: Mohamed Juma Jalloh
Koolaaɗo Finansi: Mohamed Yusuf Bah
Ballo Koolaaɗo Finansi: Chernor Baa
Koolaaɗo Yeeynugol: Algassimu Monorma Bah
Koolaaɗo Njuɓɓudi: Mohamed Baa
Ballo Koolaaɗo Njuɓɓudi: Khadijah Diallo
Sawru Parlaman: Osman Shaw
Ballo Sarwu Parlaman: Abdul Karim Barrie
Kordinanoowo Rewɓe: Kadie Ballah Jalloh
Ballo Kordinnanoowo Rewɓe: Bashiratu Bah
Joɗɗingl Jonnde Yiilooɓe
Joɗɗingol Jonnde Yiilooɓe (Board of Directors) nawraama yeeso haa salndu kala e calɗi FPUNA ɗin waawa neldude lomtotooɓe ɗiɗo ko lomtoo ɗum ka Jonnde Yiilooɓe. Ɓen lomtotooɓe wonay gollidooɓe e yiilirde siinoore nden.
Ko hella njamndi 17:00 golle ñalorma ɗen hombaa, saakitaa, haaldaa artoyeede e najmndi 21:00 fii hiirde fampagol FPUNA nden.
Jemma, gila njamndi 21:00 yimɓe tedduɓe fuɗɗii arde, yahri non, tawi hiraande no hebilaa, yimɓe ñaami haa haari, jeewte daɓɓe waɗaa. Dr. Baba Konare yeewti fii kisal e mojobere Kisal nden e ko ɓe jokki fii wallitagol Fulɓe egga-hoɗaaɓe wonɓe e tampineede e nder leyɗe ɗuuɗɗe e nder Afriki. Saajo Bah yeewti fii Fulfulde e no ɗemngal ngal lo’iri hannde nder mejaaje mawɗe wano BBC, VOA, RFI ekn. E no ɗemngal ngal faɗiri njuɓɓudi wallitotoondi no Fulfulde tabitira waawa ñiiɓude, yeru duɗe e jaaɓihattirdeeji, jaayndeeji e deftorɗi, rajooji e telewisiyonji ekn.
O sakkitori jaŋtagol yoga e ko Goomu Peeral ngun golli gila e hitaande 2008, gila e winndugol saakita winndanɗe ka internet, wallifagol defte e caggitorɗe, janngingol e eltugol hebila jannginooɓe, haa e wallitagol e golle gannde kese (ITCs) wano firde Facebook, ekn.
Ɓaawo ɗum gimi e gami tokkii ɗon, yimaa amaa haa e njamndi 02:00 jemma, FPU Washington fahin anndintini wonde janngo mum, mooɓondiral e waynondiral hino eɓɓi yuɓɓineede ka ñiiɓirde FPU, bismilla e tooli kala waawɗo tawtoreede. Yimɓe ɓen saakitii, fow hino weltii.
Ñannde 09 Morso 2017: Piknik e BBQ ka ñiiɓirde FPU Washington
Nder ndee ñalaande yimɓe arii fottude ka galle FPU Washington, teewu juɗaangu ngun yoni yok, yimɓe ari ñallii dakmitaade, anndindiral ɓeydii hakkunde musiɓɓe ɓen. Hay gooto faalanooka tultude ton, kono min Alla muuyaano yo mi tawtoree sabu hari Jalluɓe ɓen naɓorii lam.
Hiɗen sabbii tumbondiral aroowal ngal, fewndo ɗoo, salndu FPU kala hino wi’ude ko kañum weernata ngal, si Alla muuyii.
On jaaraama.
Tasko: inɗe yimɓe ɓen e yettooje maɓɓe no winndiraa mbinndudi Engeleere/Faransiire, yeru Shaw (ko Soh firti), Jalloh/Diallo (Jalloh), Barrie (Bari), Jalloh Bailor (Bayillo), Chernor (Cerno), Alpha (Alfaa), Alphajor (Alfaajo), Jogor (Jogo), ekn.
Kɗl. Saajo Bah (Peeral.com & Misiide.net).Leiden, 21/07/2017
Yo alla walu