Sunami ko wempeƴere ndiyam moolanaande. Heewi addude ɗum ko yerɓo leydi nder ndiyam walla ɗaɓɓito leydi nder ndiyam, walla puccital mboorka nder ndiyam. Nder luggere too, bempeƴƴe ɗiɗi deggondirɗe ina mbaawi daɗondirde fotde capanɗe hojom, njaaweendi majje ina waawi yettaade 800 km waktu kala, tawi tooweeki majje alaa no foti, sibu ko hedde desimeeteruuji seeɗa. Kono, so ɗe ɓadtiima powle geec, bempeƴƴe ɗee ɓadtondirat, njaweendi majje ustoo, ɗe ɓeydoo toowde (aɗe mbaawi ɓurde 30 meeteer tooweeki). Oon sahaa, ɗe ndeggintu kala ko ɗe kawri, tee aɗe ngoɗɗoya e njoorndi. Sunami jeyaa ko e musibbaaji weeyo ɓurɗi bonde, sibu, e nder ujunanɗe 4 cakkitiiɗe ɗee, 279 sunami tinaaɗi, mbinndaaɗi ɗii, njooɓiima ko ina ɓura 600 000 fittaandu. Ɓurɗo bonde oo kewnoo ko e hitaande 2004 nder geec iñnjeejo (250 000 maayɗo).
Kadi, sunami yerɓo leydi ina « tintina », woni ina tinee law, yimɓe njeertinee. Kono sunami mboorka tintintaa, ɗe mbettat. Ko ɗuum tagi ɗe ɓurde bonde. Yeru ooɗoo sunami bettii hiirde naalankaagal mawnde, reggini amooɓe e yimooɓe e yeeɓooɓe e kaake mum en fof (diɗɗal pop biyeteengal Seventeen). Mawɗo diɗɗal ngal e terɗe ɗiɗi diɗɗal ngal maayii heen, yimɓe tato woɗɓe (ina jeyaa heen jom suudu jomoowo oo) majjii… Ɗuum waɗnoo ko e jamma aset 22 desaambar 2018, sunami (tsunami) yanii e feɗoode wonnde hakkunde duuɗe Sumatra e Jawa, to Inndonoosi. E oo sahaa mo mbinndaten, o waɗii ko ɓuri teemedde tato maayɗo e ujunere gaañiiɗo, kono gasaani tawo…
Helmere tsunami ndee ko japponeere ; nde firata ko « wempeƴere tufnde ».
