Wonnoo ɗoo ko fowru e bojel e rawaandu.
Fowru e bojel ina ladde, rawaandu tawi ɓe toon.
Rawaandu woni e yeewtande ɓe ñaameele wuro belɗe. Fowru e bojel mbii :
– « Hol ko weli toon ? »
– Rawaand wiyi : « Ñaamde ina toon, ina wiyee kodde. »
– Fowru wiyi : « Holno kodde mbayi ? »
– Rawaandu wiyi : « Kodde ndakketee ko subaka, kono heewi ñaameede ko kikiiɗe. »
– Fowru wiyi : « Sifono mi no kodde mbayi. »
– Rawaandu wiyi : « Kodde ina rawni, ko gawri sottetee haa laaɓa, saaño koo ittee, unee haa ɗaata, waɗee ɓooɗe-ɓooɗe. »
Ngool laawol, rawaandu haalanaani fowru ɗo kodde mooftetee.
Hiiri. Fowru ari e wuro, tawi jinnde ndoondi, sikki ko kodde. Fowru muuɗi haa reedu heewi ndoondi, tan fowru arti wiyi : « Bojel, mi muuɗii kodde hanki jamma ! »
Bojel wiyi : « Eehee ! Haa Rawaandu ara, mi naamnoo ɗum taw ko kodde muuɗ-ɗaa. »
Weeti. Rawaandu ari. Bojel wiyi : « Rawaandu, Fowru dey wiyi muuɗii kodde hanki ! »
Rawaandu wiyi : « Fowru, hol to tawɗaa kodde ɗee ? » Fowru wiyi : « Taw-mi kodde ɗee ko sara caggal wuro, ina weɗɗaa e jinnde, muuɗmi heen haa kaar-mi. »
Rawaandu wiyi : « Alaa. Ɗuum wonaa kodde, ko ndoondi. Hay gooto yiɗaa. To kodde ngonata too, so a yehii toon, so a artii, kulle fof nganndan a ñaamii kodde, walla a yettiima ɗo ɗe ngoni. »
Fowru wiyi : « Hol to kodde ngoni ? »
Rawaandu wiyi : « So a naatii e galle, njahataa ko nder suudu, kooyno-ɗaa dow, ma a yiy ɗaggal – walla kaggu – ma a yiy koron ɗiɗon : ngel ina waɗi kosam, ngela ina waɗi kodde ; ma a yiy heen ñeɗdude : njowtaa korel kosam ngel, e korel kodde ngel, e ñeɗdude ndee ; ƴeɓtaa kosam ɗam, mbaylaa e kodde hee, nirkiraa ñeɗdude ndee haa ɗaata, tan njaraa haa kaaraa. Ɗuum woni kodde. »
Tan fowru acci haa futuro juulaa, yahi wuro.
Fowru ari naati galle, fayi nder suudu, yettii, yiyi ɗaggal, ndu hooynii ɗaggal ngal. Ndeke joom kodde ɗee ina nder suudu : o yiyi fowru nduu. O ƴeɓtii ɓannde… O yiyi fowru naatii suudu. Fowru tinaani. Fowru ƴeeŋii ina yowta koron kon, tan korel kosam ngel rufi e hoore fowru ! Joom kodde ɗee addi ɓannde fiyi kine fowru pat ! Tan hinere fowru fusi, ƴiiƴam werlii, ñiiƴe ɗee keli, tan cosorɗi ƴiiƴam mberlii, tan fowru dogi faati to bojel, hoore mum ina moddi kosam, hunuko mum ina silsilta ƴiiƴam !
Fowru yettii bojel. Bojel ndaari fowru, hoore ndee ina moddi kosam, hinere ndee ina feesii, ƴiiƴam ina siimta.
Bojel wiyi : « Heehee ! Kaawu fowru, hay so a yaraani kodde dey, a yettiima ɗo kodde ngoni ɗoo ! »
