Sinsinaatinaaɓe mbaɗii hiirde weɗɗaande jamma 28 jofi 29 mee 2023. Jallel (Muhammed Jallo) heɓii fartaŋŋe hawirtde e hiirde nde. Ngel weltii heen sanne. Ngel faami ndeke jaŋde Pulaar ina wuuri to wuro ngo. Wonii sago maggel hoɗoyde toon tuma nde ngel yiyi ɓee sukaaɓe worɓe e rewɓe ñaaƴirooɓe Fulfulde tawa kadi ngemmbi ɗumen ko mawɓe tilimɓe, ardiiɓe renndo mumen, wallooɓe, moƴƴuɓe. Eɓe njotondiri e tuubakooɓe leydi ndi, eɓe kolla ɗum en finaa-tawaa maɓɓe e pulaagu maɓɓe. Yimɓe leydi ndi kaalii e men ko seedtini. Ɓe kolliri wonnde fulɓe ko yimɓe jamyamɓe, moƴƴuɓe, haaraysireeɓe. Ɗum ɗoon tan yonii teddungal kono ndeke ɗum haaɗaani ɗoon. Ɓe noddaa, ɓe nootii, ɓe kaali baawal maɓɓe e fellitɓe gollodaade e ɓiɓɓe fulɓe ngam wallude ɗumen e geɗe mum’en. Tawtoraama ñalaande nde ñaawooɓe mawɓe e safrooɓe mawɓe.
Caggal ɗuum, ko ŋarɗi yiyaa to hiirde fulɓe nde. Cosaan holliraama toon, jime pulaar njimaama toon, hay pulareeje kaalaama toon. Mi weltaniima Sinsinaatinaaɓe e darnde mumen yooɗnde fattamlamre. Ɓe kollirii ko ɓe fulɓe tigi rigi, ɓe ngonaa furɓe. Ɓe kollirii jaggondiral maɓɓe e nanondiral maɓɓe. Renndo so wayii noon, ko ko moƴƴi tan heɓata. Weltaare ina waɗi mi ngada-mbeña tuma nde keɓ-mi fartaŋŋe tawtoreede ndee hiirde. Mi gaynataa winndude noon tawa mi yettaani musiɗɗo am, giɗo am, giɗo leñol ngol Aysata Soh (Debbo Pouloh ) tintinɗo-mi goodgol hiirde nde. Eɗen njetta kadi denɗi men Demmba Nanaa Bah Souleiman Sidi Bah e golle mum jooɗɗe ɗe waɗi e hiirde nde. On njettaama sanne. Yoo wuur fulɓe.
E kuɗol
Mohammed Jallo
