Ballal mon e mahngo Galle Pulaar

Galle Pulaar (Joɗnde Fedde Ɓamtaare Pulaar he Muritani)

Ko e hitaande 1979 Fedde Ɓamtaare Pulaar he Muritani (F.Ɓ.P.M.) heɓnoo boowal ngal 3 600m² wertallo, ɗo mukaata Sebka nder Nuwaasoot. Caggal ɗuum nde heɓoyi yamiroore hoɗde (Permis d’occuper) caggal nde nde yoɓi fereeje domen hakkunde 1981 e 1982. Oon sahaa wonnoo he boowal ngal ko barakuuji. Nde barakuuji ɗii egginaa nokku oo e hitaande 1993, Fedde ndee waɗi heen peŋɗe. Kono laamu teetti nokku oo, rokki ɗum Jaagordu Golle laamu e Cukaagu e Coftal Ɓalli ngam mahde heen Galle sukaaɓe kam e Boowal pijirlooji (Estaad) tawi nii tintinaani joomum en ɓee.

Fedde ndee rewi heen ko ɓuri duuɓi noogaas ngam yooltude hakke mum, ɗaɓɓi lomtiniraneede boowal goɗngal. Ñalnde 24 feebariyee 2010 Joɗnde Jaagorɗe jaɓi lomtinirande FƁPM boowal goɗngal to Tafrak Seyna nder Nuwaasoot, rewrude e dekere tŋ 2010.072/MF/DGPE/DD, ngam mahde heen jooɗorde mum ; e sarɗi joɓgol 1 893 200 MRO fereeje timmbere e keertagol. Ngaal boowal ngal 3 600 m² lomtii ko boowal teettanoongal to Sebka ngal. Boowe ɗiɗi ɗee poti wertallo waɗde.

Caggal nde fedde ndee yoɓi ɗuum e hitaande 2010, nde huccani yiylaade kaalis ko nde mahri joɗnde mayre ɗoon e boowal hee. E hitaande 2012 ɗaɓɓaande kaalis lelnaa, wondude e kaayitaaji karallaagal timmuɗi katojinaaɗi, hono ciimtol karallaagal wondude e millo njaru eɓɓaande ndee kam e nate mahdi njiɗaandi sompeede ndii. Tuugnorgal hirjino kadi lelnaa. E ñalngu hannde nguu, e ballal biro mahngo biyeteeɗo Betaco, nate mahdi ndii kesɗitinaama fawaade e peccitagol golle ɗee e daawe daawe, cifaaɗe e doosiyee karallaagal hee.

Nuwaasoot ñalnde 18 mbooy 2024

Hooreejo