Tuggi aljumaa 16 juko 2024, eɗen mbaawi wiyde Senegaal taccii daawal ceedtinngal nder daartol mum, sibu jeyaama he leyɗe jogiiɗe goodal nder weeyo, caggal nde lotti ñalnde heen njowita (satellite) mum ngadana, ka aasiñoreeɓe senegaalnaaɓe miijii, peewni, e ballondiral e Nokku weeyo jaaɓihaaɗtirde Montpellier, to leydi Farayse, hono Centre spatial universitaire de Montpellier (CSUM).
Tuggi aljumaa 16 juko 2024, eɗen mbaawi wiyde Senegaal taccii daawal ceedtinngal nder daartol mum, sibu jeyaama he leyɗe jogiiɗe goodal nder weeyo, caggal nde lotti ñalnde heen njowita (satellite) mum ngadana, ka aasiñoreeɓe senegaalnaaɓe miijii, peewni, e ballondiral e Nokku weeyo jaaɓihaaɗtirde Montpellier, to leydi Farayse, hono Centre spatial universitaire de Montpellier (CSUM).
Kaa njowita tokoosa jogii ko mbaadi kibbu mo santimeete 10 bannge kala, ka kiloo gooto teddeendi. Ka lottiraa ko lottirka (fusée) Falcon 9 ka fedde SpaceX, ummoraade Florid (Amerik). Ka wiyetee ko Gayndesat-1A (GaindeSat-1A), hono Gestion Automatisé d’INformation et de Données Environnementales par SATellite (Kuufgol otomatikeewol kabaruuji e keɓe taariindi rewrude he njowitiika). Njowita Senegaal kaa milletee ko he jowite ñille (nanosatellites) fawaade e ɓete makka ɗe cifi-ɗen dow ɗee.
Ka halfinaa ko yiilde keɓe katojinaaɗe he toppitagol ndiyam. Ndeen, denndinngol ɗeen keɓe cariiɗe ine hittunoo sibu ko maa ɗannanee walla rewree e telefon, ɗum noon ine leeli, tee ine ɗaɓɓi jawdi keewndi. Jooni ko njowita kaa tan heɓɓotoo keɓe ɗee ummoraade e ƴettirɗe (capteurs) cariiɗe nder leydi ndii, ɓetooje, yeru tooweeki ndiyam nder boyli e beeli… Ɗum noon ɓuri yuumtude, ɓuri yaawde e newaade, ɓuri famɗude njaru. Nii woni maa ɗum yuumtin, moƴƴitina huufo ɗeen geɗe nder nokkuuji ɗo kaɓirɗe walla kumpital keewaani.
Maa ka renndin kadi keɓe ummoriiɗe e Nokku ngenndi toppitiiɗo diwooje siwil kam e kaaƴweeyowal (météorologie) ngam wallude ceeɓgol tijje ngonka e kisal weeyo.
Caggal nde ka naati jirlol makka aka weeya dow Senegaal laabi 3 haa 4 ñalnde kala fotde hojomaaji jeegom haa jeeɗiɗi, ka heɓɓoo keɓe ummoriiɗe e gollorɗi cariiɗi nder leydi hee, ka neltira ɗe to Suudu renndinirdu mahaandu Jamñaajo sara Ndakaaru. Ine jeyaa e golle makka kadi ƴettude nate wertaango leydi Senegaal, ngam wallitde golle ndema e reende ladde, sibu aka jolni kameraa potɗo ƴettude nate baawɗe huutoroyeede he ko fayi.
Caggal Jibuti, ko Senegaal woni Dowla ɗiɗmo worgo Saharaa kaaloowo farayseere jogiiɗo njowita (satelit) mum keeriika. He nder Afrik, idii naatde heen ko Misra e Afrik-worgo e kitaale 1998 e 1999, caggal ɗuum leyɗe goɗɗe cukki heen. Ɗum firti tan ko Afrik fuɗɗiima tigi dañde bibje nder weeyo; ndaa boom Dental Afrik (UA) sompii Nokku mum weeyo rawane (2023), hono AfSA, jooɗiiɗo to Keer, mo faandaare mum woni jokkondirde cofte paatuɗe e weeyo he nder doŋre Afrik ndee, kam e lelnande ɗum laabi.
Ko ɗum ɗoo woni njowita Senegaal kaa, hono GaindeSat-1
Senegaal noon fuɗɗii heen ko he 2019 nde jaagordu jaŋde toownde e wiiño e kesamhesaagu leydi ndii (Mesri) waɗdi e ArianeGroup nanondiral, kono yalti heen sibu gargol Covid-19. He nder ɗuum, Senegaal sosani hoore mum Nokku toppitiiɗo weeyo e gardagol Maram Kayre (Kairé), ganndo weeyiwal lollirɗo daranaade ƴellitaare fannu oo nder leydi ndii, keɓnooɗo ardaade golle NASA keewɗe nder Senegaal e Afrik.
Ngam tafde njowita kaa, ngaaɓnaaka to Montpellier, ko nanondiral waɗdaa e CSUM, ngal njaru mum tolnii e miliyoŋ oroo (420 miliyoŋ MRO) mo jaagordu jaŋde e wiiño ndu Senegaal yaltini, ngam heblo aasiñoreeɓe njeetato e haralleeɓe njoyo ko faati e peewnugol e toppitagol kaɓirɗe weeyo. Faandaare ndee ko mbele “ɓeen ine mbaawa jannginde kattanɗe karallaagal keɓi ngal sukaaɓe Senegaal woɗɓe”.
Biiñirɗe (laboratoires) e duɗe jaaɓihaaɗtirde, e baylirɗe e leyɗe Afrik goɗɗe, ine kuccani kon njowiton tokoñillon njuumtukon, kon coggu newiingu, njontakon. Fotde capanɗe nay makkon ine mberlidee laawol gootol he lottannde wootere.
E wiyde Mustafa Joop, aasiñoor sukaajo ganniyiiɗo waɗoyde doktoraa mum caggal leydi hade mum artude Senegaal ngam jannginde e wallitde ƴellitaare ngal karallaagal nder leydi mum : “ So kon lottaama akon njirloo hedde 550 km dow leydi fotde duuɓi joy. So yahii haa ɓooyii, kon ngona e tellitoraade seese-seese, e oon sahaa akon mbaawi naatde nder hennduure leydi ”.
E oo sahaa, Senegaal ummanaaki tawo feewnude njowita ɗimma, kono ine laaɓi “ ɗum ko fuɗɗoode ” sibu maa ɓe teeŋtin heblo sukaaɓe woɗɓe ngam ƴellitde fannu oo, ɗo yimɓe heewɓe mbaawoyta gollaade.
Yahdu weeyo fuɗɗii ko he hitaande 1957 e lottugol njowita ngadana ka Dental Sowiyet tafi, hono Spoutnik 1.
Bookara Aamadu Bah
