Nder renndo yiylotoonde ɓamtaade, jaŋde ganndiwe nder ɗemngal neeniwal sukaaɓe, ko daawal gorworal. Ɗum tuugii ko he wiɗtooji luggi ganndiwe nehdi e jaŋde. Ndee yiyannde ina wallita koonagol janngooɓe, tawi ine kuutorii juɓɓondiral hakkunde ɗemngal neeniwal e ɗemɗe koɗe.
Wiiñooji ɗii fof ine kawriti he ndee toɓɓere : janngirde ɗemngal neeniwal ina wallita haa ɗoon waawi haaɗde paamgol fannuuji gannde, newna kadi baawgol ɗemɗe goɗɗe. Ɗuum waɗi kala jannguɗo goƴaaɗo ɓamtude ganndiwal nder renndo mum, ine foti addude ballal mum e compugol ngonka mballitoowa ndee yiyannde. Yiyde won he yimɓe ine njoofoo caɗeele ciynugol ngam haaytinde eɓɓaande leeltunde ko ina ɓura duuɓi capanɗe joy, ko huunde haawniinde, haaɓniinde. Waɗi noon ndeen darnde alaa ko wallitta so wonaa doŋkal. He Muritani, ko goonga sariya jaŋde kesa kaa ine foti jeertinde, haa teeŋti ɗo teeɗantoo waɗtude arab ɗemngal gootal janngirgal ɗoo. Miɗo teeŋtina baɗtugol hakkille he ngal geɗal.
Mi werloo eeraango faade e jeertotooɓe mbele aɓe njoofoo saɗeende goonga-goonga ndee – hono tippudi nehdi e jaŋde hannde ndii e njiimaandi mum to bannge ɗemngal – ɓe mbaasa aybinde peeje baawɗe huutoreede ɗee. Ñiŋde kuutoragol ɗemɗe he nder ekkol sabu sikkude ine waawi jogaade won ɗeen baɗte, gila nii ndiin tippudi jaŋde suwaa nii fuɗɗeede siyneede, ko waasde jogaade hakkille. Ko waawi heen wonde fof, ndiin tippudi ndi suwaa siyneede waawaa yooɓtoreede caɗeele ɗe sukaaɓe Muritani gondi hannde ɗee, Ko saabii ɗeen caɗeele koo ko goɗɗum…
Yontii tippudi nehdi e jaŋde leydi men ndii, waylee to ɓuri luggiɗde, sibu mayri gallude duuɓi capanɗe, ngam rokkude sukaaɓe men he nder ciiri mum fof, jaŋde moƴƴere.
Ñalnde 13/10/24, Muhammadu Sih
