Geɗe kaantare baɗeteeɗe e cukalon ndewon e nder janngirɗe ko tiitoonde ñalawma hirjino, ñalnde 15 lewru saawiyee 2015 baɗaaɗo to Duɗal Limaam Hadraani nder leegal Mendees to ElMina Nuwaasot. Waɗi hirjinoo ngoo ko Dental Juɓɓule Muritaninaaje ngam Nehdi, tonngirteende COMEDUC e gardagol Siidi Wul Budiid e cukko mum Ahmed Saalem wul Buh.
Waɗi yeewtere ndee ko Dewel Joop e ballondiral e Tabaara Bah, caggal ngardiindi Ashraf Mohammed Weydarago. Waɗanaa nde ko sukaaɓe janngooɓe ɓee e tawtoreede seernaaɓe mum en. E nder ndeen yeewtere, Dewel Joop limtii heen denndaangal caɗeele rewɓe, mawɓe e sukaaɓe, tuggude e nder galleeji haa to nder janngirɗe. O joli e pille ɗo rewɓe joñaa walla lesɗinaa e nder renndo ngoo, ɗawre hujjaaji, owre nde ɓe ngondi haa wontani won e heen faayre mawnde, ɗo o duuɗaani warngooji e geɗe kaantare baɗeteeɗi jamma e ñalawma ɗii. Nde o rowi yeewtere ndee ko cukalon dewon e ngoron duɗal ngal ƴetti konngi ngam hollude jiyanɗe mumen e ngonkaaji ɗii e yeeso janngidiiɓe mumen haa teeŋti no ɓe poti reentoraade e no ɓe poti waɗde ngam daɗde e boneeji tommbotooɓe ɓe ngalaa njurum e hurum. Suɓngo Dental Juɓɓule Muritaninaaje ngam Nehdi e ngalɗoo leegal Mendees ko fawaade e farweende maggal e waɗde kadi ko Fulɓe mbiyataa koo : “ñawndaade gila ñawaani ɓuri ɗaccude haa ñawa wiya ena ñawndoo”.
Njaay Saydu Aamadu
