Jokkugol terɗe : Goddol kaawningol

0
389
Jokkere goddol. Natal Hopital Avicenne (AP-HP).
Jokkere goddol. Natal Hopital Avicenne (AP-HP). https://pbs.twimg.com/media/DdqCkjkUQAA9KBE.jpg

Ɗuum heɓtii ko Faraysenaajo mo goddol mum ñawnoo haa waɗti foofirde ɓoggi. Doktoreeɓe tafani mo goddol ummingol e ɗaɗol nanowol ƴiiƴam, ɗaɗol ngol waylii wonti goddol. Hannde o waɗtii yahde e haajuuji makko, haa o yejjitii nii o meeɗii ñawde…

Goddol kaawningol

Ɗuum heɓtii ko Faraysenaajo biyeteeɗo Éric Volery : ko ina wona duuɓi goddol makko ko ko ñawnoo haa o natti waawde haalde, alaa ko haali gollaade. Doktoreeɓe lomtiniri ngol taƴre tergal tafangal : ko ngaal o foofirta hannde, tee o ɓamtii golle, o dañii ɓinngel, e duuɓi makko 40, omo yaha e haajuuji makko no yimɓe ɓee fof nii.

Kanko noon, doktoor makko to wiyiino mo wonde « o seerti hankadi e giɗli e golle », kono, Eric wiyi « o juumii ». Ko goonga noon, ko ngol woni go’o ko hono ndee jokkere tergal e neɗɗo ina waɗee e aduna hee. Tee kanko Eric o yahiino haa o waɗti foofirde wuddere yulanoonde e goddol hee.

Waɗani mo tergal kesal ngal ko doktoreeɓe gollotooɓe e opitaal gooto to Pari (Farayse), ina wiyee (AP-HP). Ɓe lomtiniri goddol makko ñawngol ngol ko taƴre ɗaɗol mawngol nawowol ƴiiƴam gonngol nder reedu (aorte), itaangol e maayɗo. Ndeen ngol seŋaama ɗo goddol foti wonde ɗoo, ngol woni e wayloraade seeɗa seeɗa haa ngol wonti goddol gaadorangol, gila e tekkeendi mum, haa e gulɗe mum, haa teeŋti noon e waɗtude nawde foofaandu. E wiyde doktoreeɓe ɓee, nde ɓe njiyi taƴre ɗaɗol ƴiiƴam ngol ina wayloo, ɓe kaawaa ɗum no feewi, tee hay gooto e maɓɓe sikkaano eɗum aaɓnoo : tergal nawowal ƴiiƴam waylaade haa wonta tergal poofirgal.

Kamɓe ɓeeɗoo doktoreeɓe (kippu doktoor Martinod) ɓe cafririi hono nii 13 ñawɗo haa celli ɗeɗew, hakkunde 2009 e 2017. Won heen ko aranooɓe nguɗu (kaaseer) jofe, won heen ko ñawu goddol, won heen ko ñawu calɗi bumsuɗe, tee fof ɓe kuutorii ko ɗaɗol nawowol ƴiiƴam mawngol ngol. Ko ɗuum tagi ɗum wontude feere safrirde nde annduɓe keɓtini, wonnde e saakteede e winndere ndee. Ko ɗuum addani porfeseer Martinod wiyde « terɗe tafaaɗe (…) ko kam en njogori wayloyde ganndal safaara janngo ».

Bookara Aamadu Bah

Woppu jaabawol

Winndu yowre maa
Winndu ɗoo innde maa