E nder duuɓi ɗiɗi tan, nayo he ardiiɓe hirnaange Afrik ngittaama he gannginorɗe mum en, e gooto daɗɗo he folleede.
To leydi Mali, ko folloji ɗiɗi deggondirɗi mbaɗii toon (follo e nder follo), he lewru ut 2020, e lewru mee 2021 caggal nde Ibraahiima Buubakar Keyta ittaa he gannginorde mum, laamu sabbordu waɗaa he gardagol Bah Ndaw. Fawtii heen ko lebbi jeenay, Bah Ndaw ittaa, tawi kadi ko ɓeen ittunooɓe IBK he laamu , ngitti mo kadi he gardagol Asimi Goyta. To Gine konaakiri, fawtii heen tan ko lewru, koninkooɓe ɓee ndergiti laamu Alfaa Konnde he mudda mum tataɓo, he gardagol Mammadi Dummbuyaa.
Ina reɓa haa e lewru Saawiyee, piyanɗe nanaa to wuro laamorgo Burkina Faso he waktuuji juutɗi, rewi heen ko wiyeede Rok Marka kiristiyan Kaboree, gardiiɗo leydi ndii ittaama he laamu mooftoyaama he nokku mo anndaaka he gardagol Damiba. Joofaa heen ko caɗeele dawrugol e buuñaari suɓngooji e ɓeydagol seɓɓitiiɓe he bonanndeeji mum en, renndooji mbayli cabbi bawɗi. To Gine Bisaaw, ko follo moccungo waɗii toon e sahaa nde hoyreejo leydi ndii e jaagorgal mum garwaniiwal ngonnoo he batu jaagorɗe.
Leƴƴannde seeɗa e hello daartol
Ngam paamen ɗiiɗoo follooji e nder Afrik Hirnaange, ko maa ndutto-ɗen he hello daartol he jokkondire hakkunde duunde Afrik e adunaaru nduu. Ko adii seeɗa keɓgol leyɗeele Afrik jeytaare mum en tuggi 1946 haa 1991 he pusgol Dental sowiyet, teskaama follooji limti- limtinɗi ɓaawo hare aduyankeere ɗimmere. Ko caggal ɗuum mooɓondire leyɗeele pelpolɓondiri haa teeŋti he Haɓɓere fuɗnaange (Bloc de l’Est ) e Haɓɓere hirnaange (Bloc de l’Ouest ).
Pooɗondiral ceŋɗe ɗee won ko firata so ƴeewaama. Ko kaan ngonka jibinoyta ceŋɗe ɗiɗi he ngardiigu duunde Afrik, hono senngo ɓadiingo leydi Ruusi e senngo woɗngo ruttitii yoga he leyɗeele tuubakooɓe jogiiɗe doole.
Follooji keewɗi mbaɗii caggal pusgol Dental Sowiyet, kono kam deeƴre waɗiino haa 2010 he gartugol noon leydi Ruusi he dingiral dawrugol Afrikiyankeewol, follooji ɗii koko ngummiti.
Ŋakkere dawrugol renndooji ɗii
Puccitagol follooji ɗii walla laygol mum walla nii mbiyen dabbundere hirnaange Afrik, ina famminaa en galɗugol duunde ndee. Kono eɗen paama won caɗeele keewɗe gooɗɗe haa teeŋti to bannge kisal maa mbiyen ndeenka, haa ɗuum wonanii follooji ɗii hujja. Ko ɓuri heen heewde he leyɗeele ɓadtinooɗe leyɗeele tuubakeeje jogiiɗe doole, yettiima he sahaa ɗeen leyɗeele nattii joganaade ɓe kisal renndooji majje, ko ɓuri heewde he majje ina ɗeɓi fooleede he hare mum en he pelle seɓɓitiiɓe. Leydi Farayse ko leydi ngarwaniiri he leyɗeele ballodiije he nder Afrik hirnaange, ngam artirde kisal e deeƴre, kono alaa golle maantinɗe memotooɗe jiyaaɗe gila ɓe ngaddi I koninkooɓe maɓɓe he nder ɗeen leyɗeele ko ina wonaa jooni duuɓi 10.
E ooɗoo sahaa, renndo ngoo koko natti jogaade njoorto he laamuuji ɗii, koninkooɓe teettii gannginorɗe ɗee he juuɗe siwil en fawaade he caɗeele ndeenka.
Ko goonga follo wonaa huunde yiɗaande, kono teskaama ɗiiɗoo follooji renndooji leyɗeele ina jahdi heen, ko gulaali e luukaali e kuljinaali e araarayuuji ngam hollitde weltaare mum en.
Hol ko teskaa he follooji ɗii ?
• Ina teska yoga he leyɗeele baɗɗe follooji ɗii yiɗde ɗe jotondiral hakkunde majje e leydi Ruusi, sabu sikkude ko e ngaal jotondiral ɗe mbaawata ñawndude caɗeele guuraaɗe to bannge kisal. Teskaama he follooji ɗii, pooɗondiral leyɗeele tuubakeeje he nder duunde Afrik, teskaama kadi ŋakkere dawrugol renndooji ɗii, gila to bannge lanndaaji dawrugol haa e laamuuji ɗii.
Soklaaji renndooji ɗii
he golle memotooɗe
Jolal follooji ɗii he nder Afrik hirnaange, to Mali e Gine e Burkina Faso ina hollita ŋakkere suɓngooji hoyreleydaagu, sabu faawaade he dow mbuuñaari e ardinde geɗe keeriiɗe ekn. Ɗiin soklaaji noon wonaa waɗde golle ngam heɓirde yimɓe he sahaa suɓngooji e gañamtumaagu. Leyɗeele Afrik hirnaange ganndiraaɗe follooji ina mbaawi mahteede ngonta leyɗeele demokaraasi ɗooftaaɗe, tuugnorteeɗe no yoga he leyɗeele nii. Ina wayi no demokaraasi mo tuubakooɓe njogii oo ronkii safrude saɗande ndeenka he nokkuuji keewɗi. So en ƴeewi leyɗeele aduyankeeje jogiiɗe doole ɗee, woni leyɗeele dentuɗe e leydi Farayse e Angalteer mbaɗtindii ko ɓoortude paaɗe mum en to Afganistaa. To leydi Siiri, ɗee ngoppidii heen leydi Ruusi e leyɗeele ballondiije ɗum. Ɗuum noon gartugol koninkooɓe he gannginorɗe foti wonde ko noddaango ngam huccitde he oon demokaraasi mo yahdaani he gonka leyɗeele Afrik, gadduɗo peccoor leƴƴi e leyɗeele.
Waɗde eɗen mbaawi wiyde ko mbaydi demokaraasi kesiri woni e hebleede, kadi maa taƴondire hakkunde leyɗeele aduyankeeje goɗɗe mbaɗ.
Abuu Kan, Goomu kumpital FƁPM
