Annduɓe Siinnaaɓe peewnii ndiyam haa heewi, tawi kuutorii ko leydi ittanoondi he lewru he hitaande 2020.
Taaɓal mawngal wonande ɗanle faade lewru garooje : annduɓe Siinaaɓe peewnii ndiyam keewɗam ummoraade e leyndi (leydi lewru). Ɓe kuutorii ko santiyoŋaaji lappol Chang’e-5, ɓe tawi leyndi ine soomi diƴƴere (hydrogène) nde nganndu-ɗaa so wulnaama ine yaltina ndiyam. Ngal ɗoo jiytal ine waawi addude waklitere mawnde he nder compugol tuddule (walla koɗorɗe) dow lewru, ngaaɓna ɗanle juutɗe dow lewru. Ngal jiytal ari ko he sahaa ɗo Siin e Amerik ngoni he daɗndu idaa neldude aadee dow lewru, walla boom sompude toon koɗorɗe ɗoo e duuɓi sappo paaɗi.
E wiyde CCTV (tele laamu Siin), ɓe kuutorii ko santiyoŋaaji leyndi ɗi lappol Chang’e-5 ittunoo lewru e hitaande 2020, hono gadanol caggal ko waɗnoo e hitaande 1976, tawi oon sahaa ko URSS (Riisi) artirnoo he Leydi garaamyon seeɗa nduufdi lewru. Ɓe kollitii wonde wiɗtooɓe Siin ɓee ko he ɗiin wiiñooji ngonnoo ko ina wona duuɓi tati jooni. He millo maɓɓe, ton leydi lewru kala ina waawi yaltinde hakkunde capanɗe joy e go’o haa capanɗe jeeɗiɗi e jeegom (51 haa 76) liiteer ndiyam. E wiyde maɓɓe, ɗuum yerondiri ko he sokla yimɓe capanɗe njoyo (50) ñalawma kala.
E wiyde wiɗto saaktaango ñalnde 16 sulyee (morso) he nder jaaynde Nature Astronomy, he darorɗe nduu ɗoo lewru, annduɓe ɓee tawiino he nder santiyoŋaaji ɗii, jalboore ɓeppere (cristal transparent en forme de plaque), nde njaajeendi leeɓol neɗɗo : ɗum ɗoo noon ko “haayre lewru nde anndanooka” nde ɓe inniri ULM-1. Fotde 41% heen haayre kala ko ndiyam. E wiyde wiɗtooɓe ɓee, ko ngol woni goo ko mitte ndiyam (H2O) ine tawee he nder santiyoŋ memotooɗo. Tengiti ngal dow kadi, ko ɗii santiyoŋaaji ittaa ko he nokku lewru ɗo miijetenoo ndiyam he ndii mbaadi waawaa abada taweede toon.
Bookara Aamadu Bah
