Mozilla L10n Pari 2017 : Gollordu nokkuɗinal (N8L) Pari 2017

0
177

Ñalnde 6 e 7 mee 2017, Mozilla yuɓɓinii gollordu nokkuɗinal to Paris. Goomuuji nokkuɗinal  keewɗi tawtoraama kewu nguu. Arannoo toon goomu Pulaar/Fulfulde ko Ibraahiima Malal Saar (hooreejo goomu) ummoriiɗo to Havre (Frayse) e Bookara Aamadu Bah (Muritani) e Mammadu Buubu Ñaŋ (Senegaal) e Bookar Kan (Pari).

Geɗe keewɗe kollitaama e gollordu hee, ko wayi no silsil noƴƴingol golle nokkuɗinal ngal kam e kuutorɗe firo goɗɗe. Kabaruuji keewɗi jowitiiɗi e Mozilla ndokkaama heen kadi. Yarlitiiɓe ɓee (sibu golle Mozilla tuugii ko e yarlitaare) keɓii heen humpito keso, mbaawii kadi wotondirde miijooji.

Nokkuɗinal woni ko wiyetee e Farayse “localisation”, walla «localization» e Engele. Nokkiɗinde woni waɗde feere mbele loowdi mbaandi no topirɗe (logiciels) ina yahda e pinal nokku toɗɗaaɗo, gila e waɗtude ɗum e ɗemngal oon nokku haa e feeñninde heen geɗe mum pinal goɗɗe (limlebbi, ɓetirɗe, kaalis e geɗe keeriiɗe keewɗe goɗɗe.)

Localisation walla localization ina ñonngiree nii : L10n. Limoore 10 wonnde hakkunde “L” e “n” ndee, maandini ko limoore alkule gonɗe hakkunde aklulal gadanal e cakkital helmere ndee. Ɗum noon, so en ndewii ngaal doosgal, ko nii nokkuɗinirten helmere ndee e Pulaar : N8L sibu, nder helmere “NokkuɗinaL” ndee, ko alkule 8 ngoni hakkunde N (alkulal gadanal) e L (alkulal cakkital).

Bookara Aamadu Bah

Woppu jaabawol

Winndu yowre maa
Winndu ɗoo innde maa