Ɓoggee Muritani : Kummba Ñaŋ teddinaama

0
62

Ɗum waɗnoo ko ñalnde aljumaa 8 mbooy (mars) 2024 to Ɓoggee. Yuɓɓini teddungal ngal ko Dental ballondiral (koppe) Umakala Wan kam e Jokkorde rewɓe hoohooɓe Ɓoggee, ngam teddinde e jaarde Kummba Ñaŋ, gooto e rewɓe tutiiɓe pelle rewɓe to Brakna, haa teeŋti noon nder Ɓoggee. Ine tawtoraa kewu nguu fiilaaɓe nokku oo, tuggi Muusaa Jah, carɗoowo, haa yettii hoohooɓe e yonaaɓe koppe sappo e jeeɗiɗi gonɗe ɗoon ɗee. Konngol jooɓorgol teddungal ngal ko « ɓeydaade rokkude rewɓe jawdi ngam yaawnude ƴellitaare duumiinde wonande yimɓe fof ».

Caggal nde Quraana janngaa, jimol leydi ngol yimaa, ko Defaa Wan, hooreejo koppe Umukala Wan, ƴetti konngol,  jaari bismaaɓe ɓee sabu nootagol mum en e keewal, o siftini « ko hare rewɓe sirŋiniiɓe nder winndere ndee ngam rimɗinde e findnde rewɓe jibini ñalawma 8 mbooy ». O holliti caggal ɗuum ñalawma oo ko fartaŋŋe haɓde e ɓurondire e heedi-heedaaji e ndoolndoolaagu pawaangu he rewɓe, e daranaade faamninde ngonka debbo, haa teeŋti noon e rewɓe wonɓe nder dowri ɓee. Caggal ɗuum o teeŋtinii maanaa tiitoonde ñalawma oo, o holliti wonde « ɗoftude ummannde wallitoore rewɓe waawande koye mum en ine ɗaɓɓi wallitde ɗum en dañde gollodiiɓe to bannge kaalis e karallaagal ». Ko ɗuum addani koppe Umukala Wan e Jokkorde rewɓe hoohooɓe Barakna mawninirde ñalawma oo semmbinde « darnde rewɓe remooɓe e nder ƴellitaare duumotoonde yimɓe fof » e teddinirde mo Kummba Ñaŋ « jaalal daraniingal rewɓe he nder diiwaan hee, sabu coftal mum e hare mum duumiinde ngam ƴellitaare debbo »

Kanko Kummba Ñaŋ ne, o yettii no feewi yuɓɓinɓe kewu nguu, o jaari ɓe. O waɗani tawaaɓe ɓee daartol pelle rewɓe nder Ɓoggee, gila e kitaale 1970 haa e ñalawma 8 mbooy 2024. O semmbini sukaaɓe ɓee nde njokkata golle mbele rewɓe ine mbaawana koye mum en. Caggal ɗuum, Ceerno Alhuseyni Sih janngtanii yimɓe ɓee nguurndam Kummba Ñaŋ, gila nde gollotoo e PMI Ɓoggee, haa nde woni Hooreejo Dental Koppe rewɓe Barakna, caggal ɗuum Hooreejo Koppe Umukala Wan to Ɓoggee, haa nde woni diisneteeɗo komin Ɓoggee. Winndannde ndee ine feññini « juumtugol jiyanɗe makko e tiiɗgol fiɓnde makko » kam e ballal ngal o addi ngam compugol renndo doolnungo, mahiingo, rentungo. Ine hollitaa heen kadi ko o debbo baawɗo maslahaa, jamyamo, jokkoowo enɗam.

Ittaa ko e winndannde Jah Abdullaay e Barahim Eli Saalem / Barakna

Firo e tonngol Bookara Aamadu Bah

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.