l Jaagorgal Jaŋde
Ñalnde 12/9/23 jokkorde pelle pinal (FƁPM, AMPLCS e APRLAWO) njooɗodiima e jaagorgal jaŋde. Ɓe mbaɗanii mo daartol daɓɓol pelle ɗee. Caggal ɗuum ɓe njettini mo ngoƴaaji pelle ɗee paatuɗi e jaŋde ɗemɗe ngenndiije ɗee, gila e keblugol IPELAN (Duɗal Ɓamtaare e Jaŋde Ɗemɗe Ngenndiije). To oon bannge miijo pelle ɗee ko golle ɗee ine taaɗi, alaa e sago ɗe toppitee no haanirta nii : toɗɗagol ko ɓuri yaawde juɓɓule gardotooɗe IPELAN (Diiso Njuɓɓudi e Diiso Ganndal) haa e ƴettugol jannginooɓe laamu heblaaɓe waɗtooɓe jannginde e ɗemɗe ngenndiije tati ɗee. Nde o ƴetti konngol kanko jaagorgal ngal, o wiyi miijo makko, ko jannginooɓe haralleeɓe hattanɓe poti suɓeede heen, enen ndenndi miijo. O seedni Gardo IPELAN wonde golle ɗee ine njahra yeeso… Haa yeeso ko laawol.
l Mawɗo Jaagorɗe
Ñalnde 20/9/2023 pelle ɗee njooɗodiima e Mawɗo Jaagorɗe. Caggal bismaango e calminaali, pelle ɗee kolliti mo haaju gadduɗo ɗum oo faati ko e keblugol jaŋde ɗemɗe ngenndiije e yiɗde mum en geɗe ɗee kirjinee. Hade maɓɓe yaajnaade, tawi kanko Mawɗo Jaagorɗe oo o ƴettii konngol, o fuɗɗorii yettude pelle ɗee sabu darnde mum ngam yo ɗemɗe ɗee njannge, ɓamtee. Caggal ɗuum ko kanko e hoore makko ruttii e caɗeele goodaaɗe to oon bannge e oo sahaa. O ɓami ko gila ñalɗi diisnondiral, e ko adii ɗum, darnde pelle ɗee haa ɗemɗe ɗee keɓtinaa… alaa ko o woppi. O holliti ko enen fof ndenndi ngoƴa kaa, tee omo yahdi e men to bannge faayre ndee e hirjino fotngo waɗeede ngoo. Wonande jannginooɓe, o wiyi alaa e sago ko humpitiiɓe poti ƴetteede, gila e nder duɗe ɗee haa e gollotooɓe nder Duɗal ngal. Humpitiiɓe yahɓe alateret alaa e sago ƴeftitee ngam mballita golle ɗee, woɗɓe kadi keblee heblo moƴƴo. Maa jamirooje ndokke to oon bannge wonande Duɗe Keblooje Jannginooɓe kam e keblooje keddiiɗe ɗee. E dow yonaaɓe pelle ɗee, o noddi Jaagorgal Jaŋde e Jaagorgal pinal ngam rokkude ɗum en jamirooje yo ngollodo e pelle ɗee, mballitoroo hmpito mum en, mballita ɗum en no ngollorii. O siftini Jaagorgal Jaŋde wonde pelle ɗee ine poti jeyeede he Diiso Njuɓɓudi (Conseil d’Administration) kam e Diiso Ganndal (Conseil scientifique).
l IPELAN
Janngo mum ñalnde 21/9/23 Jaagorgal Jaŋde noddi Gardo IPELAN ngam ɗaɓɓirde ɗum keblugol, e nder ñalawma hee, doggi terɗe Diiso Njuɓɓudi e Diiso Ganndal, kam e kominikee faade e jannginooɓe yiɗɓe waɗtude jannginde e nder Ɗemɗe Ngenndiije.
l Hooreejo HCE
Ñalnde heen (21/9/23) Hooreeɓe pelle ɗee njooɗodiima kadi e Hooreejo Diiso Toowngo Jaŋde (HCE). Haaju oo ko gooto. Ɓe njettinii mo miijo maɓɓe ko faati e baasgol haa hannde mbayliigu jaŋde nguu huccaneede sibu ko fotnoo fuɗɗoreede koo alaa heen ko waɗaa tawo.
Fooyre Ɓamtaare
