Kabaaru ɗiɗmo belɗo kadi ummoraade e Suudu Sarɗi ngenndi : so cosgol Goomu depiteeji daraniiɗi ɓamtaare ɗemɗe ngenndiije. Ko ɗee paandaale Goomu depiteeji ɗii dotti :
– wallitde darnde pelle pine daraniiɗe ɓamtaare ɗemɗe ngenndiije ɗee duuɓi capanɗe jooni ;
– semmbinde kuutoragol ɗemɗe ɗee e nder denndaangal fannuuji nguurndam leydi ndii (kewuuji laamu, jaayɗe binndol e haala, caaktugol binndaaɗe ekn) ;
– daranaade kuutoragol ɗemɗe ɗee ɓurngol moƴƴude e nuunɗude nder jaayɗe laamu e jaayɗe keeriiɗe ;
– daranaade laawɗingol kam e naattingol ɗee ɗemɗe nder tippudi nehdi e jaŋde leydi ndii, kam e naatnugol majje nder karallaagal kumpital (Google, Apple, Facebook, Amazon, Microsoft) ;
– wallitde cosgol laylayti parlemaaniiji nder diiwanuuji Afrik ɗii, daraniiɗi ɓamtugol ɗemɗe Afrik.
Ɗeeɗoo paandaale dee ine njahdi e ko ɓuri heewde e paandaale pelle pinal Pulaar, Sooninke e Wolof ɗee ; ɗuum tan ina yona sabaabu cemmbingol pelle ɗee ndee feere cosgol Goomu parlemaan nguu.
Ko ɗii dalillaaji ngaddani Jokkorde Pelle pinal ɗee :
– hollitde weltaare mum e Suudu Sarɗi nduu, hollitndu laawol ɗiɗmol jooni, kaɓɓagol mum e ɓamtaare ɗemɗe ngenndiije ɗee kam e kuutoragol mum en e denndaangal fannuuji nguurndam leydi ndii ;
– yettude depiteeji puɗɗuɗi miijo cosgol nguuɗoo goomu, kam e denndaangal depiteeji ɗii sabu mum en jaɓde ɓenninde miijo ngoo ;
– yettude ardorde suudu sarɗi nduu kam e juɓɓule mum fof sabu mum en jaɓde e heɓtinde nguu goomu cemmbinoowu kuccam kesam ƴettaɗam ngam kuutoragol ɗemɗe ngenndiije nder golle parlemaan oo ;
– eeraade Muritaninaaɓe kala nde cemmbinta ndee feere naftoore Muritani;
– Yanti heen, e oo sahaa caɗtuɗo wonande aduna oo, sabu ñawu kuuɓtodinngu Koronaa wiris, Jokkornde ndee ina :
– duwanoo Muritani kam e winndere ndee e kuuɓal mum, nde poolata nguu ñawu ;
– ina hesɗitina noddaango mum feewde e denndaangal terɗe mum, ɗo mbaawi wonde fof, mbele ina njokka pinndingol ɓensgu nguu mbele ina ɗooftoo kuule ɗe juɓɓule laamu jogiiɗe oon hattan cakkitta ɗee.
Nuwaasoot, ñalnde 16 mee 2020
Yiilirde Jokkorde ndee
