28 feebariyee haa 2 marse 2014 : Kawtal Demokaraasi e Ngootaagu

0
604

Tuggi 28 feebariyee haa 2 marse 2014, luulndo politik leydi ndii (COD e Tawaasul e AP), yantude e pelle renndo (senndikaaji e hoohooɓe jaambureeɓe, pelle jojjanɗe aadee ekn) njuɓɓinii pottital mawngal ngam yeewtude e kuccam leydi ndii e « nanondirde e peeje no leydi ndii yaltinirtee e iiñcuru politik wonndu e leydi ndii gila Muhammed wul  Abdel Asiis heɓti laamu ñalnde 6 ut 2008 ».

Caggal balɗe 3 jeewte, ɓe njaltinii bayyinaango hollitoowo caɗeele leydi ndii to bannge ngootaagu ngenndi, ngootaagu renndo, woote hooreleydaagu 2014 e geɗe goɗɗe. Yeru, ɓe kawrii e jojjugol ñawndugol jaawngol ñawanɗe mawɗe ɓurɗe wonde ngoƴa muritaninaaɓe, hono koɗdigal, bonanndeeji ɓennuɗi, njiyaagu, cabbingol fenaande e caɗeele golle.

Hol ko addani ɗeeɗoo pelle ceertuɗe e ɓee yimɓe fof nanondirde ngam yuɓɓinde ɗii ñalɗi ? Ɓe mbiyi waɗi ɗum ko « yenaneede ɓe kamɓe fof wonde leydi ndii waawaa yaltude caɗeele wondi hannde ɗee so seertaani e laamuuji ndoolndoolaagu, so mahaani dowla nuunɗuɗo, tuugiiɗo e calɗi demokaraasi, gaddotooɗo ngootaagu ngenndi tuugiingu e potal ɓiɗɓe leydi ndii kala to bannge hakke e baɗɗiiɗe, so laamu nguu e juɓɓule mum ngonaani jaambureeje e nder wooteeji. »

E miijo maɓɓe « alaa fof ɗo fawii Muritani ina heeda caggal, ina heddoo e juuɗe laamu ngardungu kuudetaa militeer ». Ko ɗum tagi ɓe wiyde wonde mbayliigu laamu kala foti rewrude ko e woote e peeje jamyame. Tee aɓe njenanaa mbayliigu mbaawngu naftude ɓurɓe heewde ko mbayliigu ummoriingu e pelle politik e renndo jogiiɗe miijo laaɓtungo e peeje moƴƴe wonande renndo men.

Ngam yettaade ɗee paandaale, ɓe mbiyi alaa e sago kaaldigal nuunɗungal waɗee. E nder ɗuum ɓesngu nguu kala ina foti hirjineede mbele ina daranoo ɗum, tawa huutorii ko golle jamyame.

Tawtoraaɓe ñalɗi ɗii keɓii, e nder ɗuum, yuurnitaade geɗe mawɗe dookɗe leydi men, ketɗe goodal mum e janngo mum. Ɓe kollitii kaɓɓagol maɓɓe e diine men e diiwtugol kala ko ina tunwina ɗum. Ɓe kuniima daranaade ngootaagu ngenndi ndii mbele hay leñol gootol  ina natta joñeede walla heedeede, leƴƴi ɗii kala keɓta hakkeeji mum en e ngenndaagu mum en timmungu. Ɗum ɗoon noon ina ɗaɓɓi ñawndugol ñawanɗe nannduɗe e ndonaandi aadeeri (passif humanitaire) kam e mumtugol njiyaagu e batte mum, kam e jeytoregol timmungol rewɓe e sukaaɓe e nguurndam leydi ndii.

Tawtoraaɓe ñalɗi ɗii pellitii sompude njuɓɓudi inniraandi « FORUM NATIONAL POUR LA DEMOCRATIE ET L’UNITE » (Kawtal Ngenndiwal Demokaraasi e Ngootaagu), jogingal juɓɓule ɗiɗi duumiiɗe, hono « Joɗle Kuɓtodinɗe » e « Njuɓɓudi Diisnondiral e Rewindo Kawraaɗe Kawtal ngal ».

Fooyre Ɓamtaare