Njillu Makki Sal e Nuwaasoot : Jam ɓuri Hammadi

0
246
Makki e Abdel Ajjiiju
Makki e Abdel Ajjiiju

Caggal nde reenooɓe tufnde geec Muritani mbari gawoowo senegaalnaajo, e fitina awooɓe Get-Ndar feewde e julaaɓe Muritanaaɓe wonɓe to Ndar, Makki Sal, hooreejo leydi Senegaal hoɗiima Muhammed Abdel Asiis, hooreejo leydi Muritani ñalnde 8 e 9 feebariyee 2018, ngam sammitde tooke fitina oo e moƴƴitinde jokkondiral ɓiyngu yummaagu hakkunde leyɗeele ɗiɗi ɗee.

E fawaade e bayyinaango ngo ɓe caakti caggal njillu nguu, hooreeɓe ɗiɗo ɓee njeewtidii e toɓɓe keewɗe haa arti noon e toɓɓe paatuɗe e kuutoragol ngaluuji diƴƴe, ɓe njamiri jaagorɗe leyɗe ɗiɗi ɗee, ɗe ɗum toɗɗii ɗee, nde « ƴettata e ko yaaccii denndaangal kuule katojinaaɗe ngam tiiɗɗingol gollondiral e oon fannu, e yeeso siifondirde nanondiral (portokol) hakkunde leyɗe ɗiɗi ɗee, ɗoo e maayirɗe marse 2018 ».

Ina wiyaa e bayyinaango ngoo wonde « hooreeɓe leyɗe ɗiɗi ɗee hollitii sunaare mum en mawnde e maayde gawoowo senegaalnaajo nder tufnde Muritani. Ɓe cuniima kadi e bonnugol jawɗeele julaaɓe Muritaninaaɓe to Saint-Louis ».   Ɓe mbasiyiima « ɗooftagol sariyaaji e laabi jowitiiɗi e ngaluuji diƴƴe e nafoore leyɗe ɗiɗi ɗee, ɓe ɗaɓɓiri jaagorɗe nderndere leyɗe ɗiɗi ɗee nde njooɗdotoo ko adii maayirɗe marse 2018 to Ndakaaru, ngam timminde e siifde nanondiral paatungal e yah-ngartaa e koɗgol yimɓe leyɗe ɗiɗi ɗee ».

Ko noon kadi ɓe ɗaɓɓiri e « jaagorɗe ngaynaaka nde njoɗɗinta hakkunde mars e abriil 2018 to Senegaal, Goomu hakkunde leyɗe ɗiɗi ɗee kalfinaangu rewindo e ciynugol Nanondiral carɗungal polindaaji hakkunde leyɗe ɗiɗi ɗee…, ɓe njamiri guwarnamaaji ɗiɗi ɗii, nde cosata Goomu coftinoowu kalfinaangu rewindo e ciynugol nanondire ɗe leyɗe ɗiɗi ɗee ciifondiri ɗee ». Ɓe njeewtidii kadi ko faati e geɗe kisal haa arti e « kaɓgol e warkoyaagal taccikeeriwal juɓɓungal e mbaadiiji mum kala, haa teeŋti e ownugol, e njulaagu njogitaaje ngu rewaani laawol, njulaagu dorog e yimɓe, e laɓɓingol kaalisaaji. E nder ɗuum, ɓe ndokkii jamirooje ɓurɗe toowde ngam pottitte dewondirɗe, juɓɓuɗe ɗe ɗum toɗɗii ɗee, yantude jeejeeji denndaaɗi dow njoorndi e nder geec, ina mbaɗee ». Ɓe teeŋtinii juɓɓule denndaaɗe ɗee, hono OMVS e CILSS… Ɓe njeewtii ko faati e Palestiin, e « nimsa maɓɓe e feere Amerik yowitiinde e wuro El-Qods (Jerisaalem), ɓe teeŋtini ñawndugol jamyamol, nuunɗungol, duumotoongol, tuugingol e fiɓle sariya winndereejo gonɗe e denndaangal kawraaɗe laaɓtuɗe Fedde Ngenndiije paatuɗe e Dowla Palestiin dimɗuɗo tawi ko Al-Quds Al Shariif woni laamorgo mum ».

E nder ɗuum Makki Sal bismiima Muhammed Abdel Asiis to leydi mum, oon ne jaɓii ngoon bismaango ngo lajal mum dottoytee ɗoo e yeeso.

Yimɓe fof ina njaakorinoo maa ɓe ciifondir nanondiral paatungal e awo, kono ciifondiri tawo ko nanondiral goɗngal jowitiingal e « gollagol e peccugol njeñtudi njeeygu gaas jiytaaɗo e keerol hakkunde leyɗe ɗiɗi ɗee ». Ko waawi heen wonde fof , yimɓe fof ina kawri foti wonde hakkunde leyɗe ɗiɗi ɗee tan ko jam, sibu ko woni muuyanɗe ɓesnguuji ɗii, muuyanɗe ɗe ƴeeƴe ardiiɓe potaani lorde. Ɗumɗoon noon ina ɗaɓɓi darnde yimɓe fof ngam waasde iirtude ngañgu e joñcitde ñawanɗe ɓooyɗe, sibu, no wayi fof, Jam ɓuri Hammadi.

Bookara Aamadu Bah

Woppu jaabawol

Winndu yowre maa
Winndu ɗoo innde maa