Jangtol doktoraa e ɗemngal Xhosa

0
453
Duɗal Jaaɓihaaɗtirde Rodes to Afrik worgo

Ɗum waɗi ko to Afrik Worgo. Ko sanɗa gooto to duɗal jaaɓi haaɗtirde Rhodes winndi jangtol mum doktoraa e ɗemngal ngal muuyni biyeteengal Xhosa. Ɗum waɗii toon oolel mawɗo, nde tawnoo ko ɗum huunde hesere, tee yimɓe ɓee mbeltiima heen sanne. Jangtol ngol ko hedde 300 hello. Kanko sanɗa binnduɗo ɗum oo, o wiyetee ko Hleze Kunju, tee omo faarnii heen no feewi. Ɗuum haawnaaki no feewi, sibu o waɗi jaŋde makko fof ko e ɗemngal o muuyni ngal. Kono nde o naati duɗal jaaɓihaaɗtirde ngal, ko maa o ñorii no feewi, sibu alaa e sago o jannga Engele. Ko ɗuum addani mo wiyde « nde naat-mi duɗal jaaɓhaaɗtirde ko maa ñorii-mi no feewi, sibu maa mi jannga Engele. Ɗum wayi e am ko no kiiɗal nii, sibu ko ɗemngal gardungal e koloñaal, baawnangal e dow amen, tawi noon kamɓe jippiiɓe e engelenaaɓe ɓee ko ɓe seeɗa e leydi hee, haa teeŋti e diiwaan amen hee. Ɗumɗoon noon wayi e am ko no fenaande nii, so wiyeede yo janngu ɗemngal goɗngal tawi miɗo jogii ɗemngal ngal muuynu mi. »

Kunju  felliti winndude jangtol mum doktoraa ngam hollude wonde gollal toowngal jaŋde ina waawi winndaade e ɗemngal nokkuwal. Hawri duɗal ngal (duɗal jaaɓi haaɗtirde Rhodes), duuɓi 3 jooni, woni ko e tabitinde keewal ɗemɗe. Hannde oo fotde 800 sanɗa ina njanngira Xhosa. E wiyde ɗowɗo mo e golle ɗee, « ɗuum jeyaa ko e eɓɓaande dimɗingol jaŋde ». O ɓeydi heen « ɓee sukaaɓe ngoni ko e saltaade njanngiin ummoriiɗo e njiimaandi koloñaal, tee ɗemngal ina teeŋti no feewi e gagga dimɗingol. So ɓe naati duɗal ngal, ɓe ngardata ko e ngenndiyaagu ŋeerngu, ɓe naamnoo hol fof jogiiɗo cuusal wiyde ina joña ɗemɗe maɓɓe jeyaaɗe e nguurndam maɓɓe ñalnde kala. »

Afrik worgo ina waɗi 11 ɗemngal ngenndiwal. Haala ɗemɗe ɗoon ina toosi, sibu ɗemngal Engele e Afrikaans njaggiraa toon ko no, ɗemɗe kalifaandi nii, tee ko kam en ɓuri doole e nder jaŋde toownde ndee tee ko kam en ngoni ɗemɗe gollorɗe.

Mbele sukaaɓe men janngooɓe e annduɓe, hono no oo suka nii, hono no Muhammadu Faliilu nii, njogotoo kiram saaktude e wiɗtude gannde e ɗemɗe men ngenndiije. Ɗumɗoo ko eeraango !

Bookara Aamadu Bah

Woppu jaabawol

Winndu yowre maa
Winndu ɗoo innde maa