Woni ko miijo pelle pinal cakkitnoo ngam moƴƴitingol eɓɓaande sariya ndee, nde neldaa to Diiso Jaŋde Ngenndi (CNE)
– To kuulal 55 (ko yowitii he jaŋde mawɓe), Jokkorde pelle pinal ine sakkita taƴre aroore ndee : « Jaŋde mawɓe waɗetee ko he nder ɗemɗe ngenndiije arab, pulaar, sooninke e wolof ».
– To kuulal 65 (ko yowitii he jaŋde ɗemɗe ngenndiije)
– Ine winndaa heen :
« Jaŋde ndee ine waɗee he ɗemngal Arab he denndaangal tolnooji jaŋde e heblo, he nder janngirɗe laamu e janngirɗe keeriiɗe fof. »
« Ɗemɗe ngenndiije pulaar, sooninke e wolof maa naatne, ƴellitee, ɓamtee he denndaangal tolnooji jaŋde ndee, gila he nder janngirɗe laamu haa e janngirɗe keeriiɗe fof, ɗe naatnee he nder tippudi jaŋde e heblo, no ɗemɗe jokkondiral e no ɗemɗe janngirɗe nii wonande heen ɗemngal neeniwal kala, e dow ɗaɓɓaande heen ɗemngal kala. »
Jokkorde pelle ɗee ine ɗaɓɓi nde taƴre dow ndee lomtinirtee ndeeɗoo taƴre : « Ɗemɗe ngenndiije pulaar, sooninke e wolof maa naatne, ƴellitee, ɓamtee he denndaangal tolnooji jaŋde ndee, gila he nder janngirɗe laamu haa e janngirɗe keeriiɗe fof, ɗe naatnee he nder tippudi jaŋde e heblo, no ɗemɗe janngirɗe nii e no ɗemɗe jokkondiral nii ».
– Ine winndaa heen :
« He jaŋde lesre hee, suka muritaninaajo kala janngirta fannuuji gannde ɗee ko ɗemngal mum neeniwal, e dow teskaade ngonka nokku mum e jojjanɗe kisnugol mahondiral renndo ».
Jokkorde pelle ɗee ine ɗaɓɓi nde taƴre dow ndee lomtinirtee ndeeɗoo taƴre : « He jaŋde lesre hee, suka muritaninaajo kala janngirta denndaangal fannuuji ɗii ko ɗemngal mum neeniwal e dow teskaade ngonka nokku mum e jojjanɗe kisnugol mahondiral renndo »
– Ine winndaa heen:
« Arab ine jannginiree denndaangal sukaaɓe ɓe arab wonaa ɗemngal mum en neeniwal no ɗemngal jokkondiral nii e no ɗemngal jannginirgal nii ».
Jokkorde pelle ɗee ine ɗaɓɓi nde taƴre dow ndee lomtinirtee ndeeɗoo taƴre « Arab ine jannginiree denndaangal sukaaɓe ɓe arab wonaa ɗemngal mum en neeniwal no ɗemngal jokkondiral nii ».
Jokkorde pelle pinal ɗee ine wasiyii nde ooɗoo sariya kuccam sakkitta « laawɗingol ɗemɗe pulaar, sooninke e wolof haa laatoyoo ɗemɗe dokkooje denndaangal fartaŋŋeeji ɗi ɗemɗe ngenndiwal goɗngal ngal, hono arab, ɗokkata ɗii ».
– He nder cinndol gardungol he sariya kuccam hee, ɗo kuulal 88 paatungal he « kuule cabborɗe keñoraaɗe » ruttinta ɗoo, jokkorde pelle pinal ɗee ine ɗaɓɓi :
1. Kaaɗtingol jarribo ɗemɗe ngenndiije ngoo he lajal duuɓi 2 (2022-2023 e 2023-2024) e kuuɓtodingol jaŋde ndee he hitaande 2024-2025. He nder ɗii duuɓi ɗiɗi (2), njuɓɓudi kalfinaandi ƴellitgol ɗemɗe ngenndiije ndii ine foti wallitoraade humpito Duɗal Ɗemɗe Ngenndiije yuumtungo ngoo ngam moƴƴinde golle keblugol kuuɓtodingol jaŋde he nder ɗemɗe ngenndiije pulaar, sooninke e wolof.
2. He tolno jaŋde lesre, wonande sukaaɓe ɓe arab wonaa ɗemngal mum en neeniwal, yo woppire no woori jooni nii (mbayliigu ngoodngu nguu). Ɗum firti ko, ɓee almuɓɓe naatooɓe hitaande tataɓere jaŋde lesre he oktoobar 2024 e oktoobar 2025, maa njokku jaŋde mum en he no woori jooni nii, fotnde ñifoyde he hitaande 2028.
Jokkorde pelle pinal
