Kewkewe dille dawrugol Mali : Holi kolonel Bah Ndawu ?

0
91
Kolonel Bah Ndawu
Kolonel Bah Ndawu

CNSP, Diiso koninkooɓe Mali, he gardagol Kolonel Asimi Goytaa, toɗɗiima ardotooɗe he mudda leydi Mali. Oon woni Kolonel-Majoor gonɗo he Fooftere duumiinde Bah Ndawu. Bah Ndawu jibinaa ko 23 ut (juko) 1950 to wuro Saŋ, fuɗnaange Seegu, hakkunde mum e Boobo-Julaaso. Saŋ ko leydi Wambarankooɓe tigi-rigi, nangtiiɓe haa hannde he aadaaji ɓooyɗi. Saŋ woni wuro ganndo aadaaji lolluɗe biyeteeɗo Yuusuf Tata Siiseh. Ko ɗoon he Saŋ Bah Ndawu naati jaŋde hade mum yahde Bamako haa o heɓi “bak” makko. O angisii he hitaande 1973. O naatoyi Duɗal koninkooɓe Kulikoro (fuɗɗaange Bamako seeɗa). Law (1974) o fayraa Ndenndaandi Sowiyet o janngoyi toon wonde dognoowo helikopteer.

Nde o arti o waɗaa deenoowo Muusaa Tarawele. Kono o ɗekki sabi luurdude he Muusaa Tarawele, ɗo hay gooto suusaano luulndaade. Ko he 1994 o janngoyi kadi Farayse to “Ecole de Guerre” mo Paris. O arti, o ardiima konu weeyo (Semmbe Weeyo Mali). O waɗaa kadi mawɗo “koninkooɓe ɓooyɓe” haa he 2002.

He yonta mudda gadano Ibraɗhima Bubakara Keyitaa o toɗɗaa Jaggal Ndeenka Mali he Duujal (mee) 2014, o lomtii Sumeyla Buubey Mayga caggal nde seɓɓitiiɓe kawi konu Mali he wolde Kidaal. Kono o ɗekki kadi sabi makko salaade no jihaadiyankooɓe ngartirira nder konu Mali. Cifitinen ko nde Bah Ndawu woni Jaggal Ndeenka nde, o siifondiri e Jean Yves Le Drian mo Farayse nanndiral « ndeenka » Mali he 2014. Ko ngal nanndiral addani konu Farayse huuraade he leydi Mali haa hannde yaltaani. O yiɗiino kadi waylude mbaydi konu Mali kono o dañaanu gasnude golle ɗee.

O hooti wuro makko Saŋ, o jooɗii toon, o woppi kala ko fayti he dawrugol. Ittugol makko he laamu heewi haala. Won wiyɓe o Sali siifde winndannde yowitiinde he naatingol seɓɓitiiɓe nder konu Mali, nde ɓe ciifondiral nanndiral to wuro Aljee.

Ko oo woni gardotooɗe leydi Mali lebbi 18 garooji, woni cukka makko ko Asimi Goyta, oon ne ko Kolonel-majoor hono no makko.

Aamadu Malal Gey

Woppu jaabawol

Winndu yowre maa
Winndu ɗoo innde maa