Darapoo keso, jimol kesol, kaalis keso… ‘Muritani keso’ timmii

0
299

Ñalnde 28 Noowammbar 2017, araaraay Muritani keso oo weeynaama. Hankadi ko kanko woni darapoo leydi ndii dagiiɗo oo. Ñalnde heen, beytol kesol ngol kadi yimaa. Ñalnde heen kadi hooreejo leydi oo habri wonde ñalnde 1 saawiyee 2018, ɗereeji kaalis leydi ndii ko bayleteeɗi, woni kaalis keso sosaama. Ndeke ko yimɓe ɓee mbiyatnoo Muritani keso koo won ɗo pawnoo ɗum : hooreejo leydi ndii ko ganniyiiɗo sostaade Muritani.

Kaalis Keso

Ko ñalnde alarba 27/12/2017 laamu Muritani yaltini dekere laawɗinoowo njaru kaalis Muritani. Ko ɗiiɗoo biyeeji njogori woodde : biyee 1 000 MRU (woni 10 000 adan) ; biyee 500 MRU (5 000 adan) ; biyee 200 MRU (2 000 adan) ; biyee 100 MRU (1 000 adan) ; biyee 50 MRU (500 adan) ; kañnjarol 20 MRU (200 adan) ; kannjarol 10 MRU (100 adan) ; kannjarol 5 MRU (50 mbuuɗu adan) ; kannjarol 1 MRU (buuɗi 10 adan) ; kannjarol 0.5 MRU (buuɗi 5 adan). Ina hollitaa e dekere hee wonde ɗiiɗoo biyeeji e kannajara puɗɗotoo waɗtude huutoreede e leydi hee no diidorinoo ko tuggude 1 saawiyee 2018.

Biyeeji e kannjaraaji gadani ɗii maa njokku e wosteede to Banke Santaraal Muritani haa ñalnde 30 suwee 2018.
Coodguuli ɗii kala ina poti holliteede e kaalis keso oo e adan kala tuggi 1 saawiyee 2018, haa 31 desaambar 2020.
Dekere oo wiyi kadi wonde biyeeji e kannjara kaalis adan ɗi ngostaaka haa 31 desaambar 2018 nattii jogaade faayiida.

Tesko :
MRU
: maande kaalis keso oo
MRO : maande kaalis ɓooyɗo oo

BAB

Woppu jaabawol

Winndu yowre maa
Winndu ɗoo innde maa