Catal FƁPM Nuwaadibu : “eɓɓaande dowla nuunɗal”

0
3132

Catal Fedde Ɓamtaare e Pulaar e Muritani jiitiima eɓɓaande golle yowitiinde e ganndingol e daranagol hakkeeji yimɓe to ñaawirɗe, ɓurnde anndireede “Eɓɓaande Dowla Nuunɗal”. Kewu nguu yuɓɓinaa ko to Nuwaadibu ñalnde 2 noowammburu 2017.

Faandaare eɓɓaande ndee ko wallitde wallitde Nuwaadibunaaɓe haa mbaawa faamde, kadi ngannda hakkeeji mum en e baɗɗiiɗe e mum en e jojjanɗi mumen, mbaawa daranaade ɗum en e dow nuunɗal e humpitaade ko poti gollude e no poti gollirde denndaangal fiyakuuji mumen fayde to ñaawirɗe, e to juɓɓule laamu kala, e kala geɗe renndo baɗɗe jiiɓooje naamniiɗe ballal ngam reftinde ɗum laawol nuunɗal e goonganteewol.

Ko Dental Orop (Union Europenne), e rewrude e catal mum biyeteengal Dowla Nuunɗal (Etat de Droit), rokki ngalu Eɓɓoore ndee. Ngalu mayre tolnii ko e miliyoŋaaji sappo ugiyya.

Eɓɓoore ndee huufi ko leeɗe jeenay e nder Nuwaadibu, ko e nder ɗee ɗoo leeɗe jeenay mbaɗetee : Awoyna, Sharmel Sheekh,  Karaa Ekhayre, Fummul Baas, Mutafijjiraat, Hayyi Madrid, Sedeygaat, Saale Yaabisa, e leegal tarhiil. kono firttaani ko hoɗɓe e ɗeen leeɗe tan golle eɓɓoore nde toɗɗii, ɗe toɗɗɗii ko kala koɗɗo e nder wuro Nuwaadibu, e kala leegal ɗo o hoɗi. Ko ɗee ɗoo leeɗe jeenay (9) woni ɗe Eɓɓoore nde toɗɗii e mbaydi keertiindi, kono Eɓɓore ndee ko Nuwaadibunaajo kala jogiiɗo caɗeele potɗe yettaade to ñaawirɗe ende toɗɗii ɗum.

Eɓɓoore ndee hurmbitaama ñalnde 02 Nowammburu 2017, saanga waktuuji 11 pawɗi hojomaaji 30, e tawtoreede yimɓe heewɓe sanne, ina e ɓeen Koohowo mawɗo e diine, Ceernal Seerenɓe, ganndo ceniiɗo jumtuɗo ganndal, mo ɓurnaaki balloowo leñol kaaraysire, mo innde mum woni sifaa, hono Ceerno Muhamadel Kaamiilu Baro, ko kanko udditiri golle ɗee deftere Alla toownde ndee,  jaŋde Ɓuraana e daande makko welnde ndee. Ina heen Hooreejo Yiilirde Ngenndi Fedde Ɓamtaare Pulaar hono Musidɗo Aamadu Umaar Jah, wondude e Kalfinaaɗo Eɓɓooji Fedde Ɓamtaare pulaar, hono Musidɗo Maalik Saar, e hoohooɓe ardiiɓe renndo siwil e Nuwaadibu, e ardiiɓe pelle ɗe ngonaa laamuyaŋkooje ɗoo e Nuwaadibu : FONAD, KOMEDUK, APLS e ardiiɓe galle siwil mo Nuwaadibu, e pelle goɗɗe nootiiɗe, e hoohooɓe wuro Nuwaadibu.

Ko jiiloowo huufo eɓɓoore nde hono musidɗo Abdul Ajiiju Bah ƴetti konngol ngam yettude yimɓe ɓee e hurmbitde eɓɓoore ndee, caggal jaŋde Ɓur’aana, Caggal konngol jiiloowo o ko Musidɗo hooreejo Fedde Ɓamtaare pulaar ƴetti konngol ngam faccirde faayida eɓɓoore ndee e sifaade hol no eɓɓore dañiraa e hol ko faanditaa e njeñtudi mayre, hoohooɓe woɗɓe heewɓe ƴettii heen konngi, ngam hollude nafoore mayre e kadi yettude Fedde Ɓamtaare Pulaar, wonɓe sabaabu kewu oo ɗoo, e sabu darnde mumen haa ndee eɓɓoore dañaa.

Caggal nde njaram saraa e yimɓe ɓee, ko Muhamedel Kaamiilu Baro waɗi duwaawu keeriiɗo, ngam jumtugol eɓɓoore ndee e joofgol golle mayre e dow jam e kisal, e jahrugol yeeso denndaangal golle naftooje renndo. Golle ɗee njoofi ko waktu w13 e h15, e dow weltaare yimɓe tawtoraaɓe ɓee kala.

Aadama Alasan Caam To Nuwaadibu

Woppu jaabawol

Winndu yowre maa
Winndu ɗoo innde maa

Ce site utilise Akismet pour réduire les indésirables. En savoir plus sur comment les données de vos commentaires sont utilisées.